Nueva Zelanda
Nueva Zelanda (n'inglés New Zealand, y en maorí Aotearoa) ye un estáu insular soberanu allugáu nel océanu Pacíficu sudoccidental. El país ta formáu por dos islles principales, la Islla Norte (Te Ika-a-Māui) y la Islla Sur (Te Waipounamu), y otres 600 islles menores. Nueva Zelanda ta asitiada a unos 1.500 km al este d'Australia, de la que la separta'l mar de Tasmania, y a unos 1.000 km al sur de les islles de Nueva Caledonia, Fixi y Tonga. Foi, pola so situación xeográfica remota, una de les últimes fasteres del mundu en tener población humana. Primero d'ella, nos llargos milenios d'aisllamientu, estes islles desarrollaron una fauna y flora propies y estremaes de les de los demás continentes. Lo accidentao de la so orografía desplícase polos llevantamientos de tierra provocaos polos pliegues tectónicos y pola actividá volcánica. La capital del país ye Wellington, y Auckland la so ciudá más poblada.
Los primeros humanos instalaos en Nueva Zelanda fueron polinesios, qu'aportaron ellí ente 1250 y 1300 y desarrollaron una cultura maorí singular. En 1642 l'esplorador holandés Abel Tasman foi'l primer européu n'avistar Nueva Zelanda. Dos sieglos dempués, en 1840, representantes del Reinu Xuníu firmaron colos xefes maorís el tratáu de Waitangi, que declaró la soberanía británica sobre les islles. En 1841 Nueva Zelanda convirtióse nuna colonia dientro l'Imperiu británicu, y en 1907 nún dominiu. Algamó la independencia en 1947, magar que'l monarca británicu sigue inda siendo'l so xefe del estáu. La mayoría de la población actual del país, d'unos 4,8 millones d'habitantes, son descendientes d'europeos: la principal minoría son los indíxenes maorís, siguíos de pobladores d'orixe asiáticu y de les islles del Pacíficu. Acordies con ello la cultura del país deriva principalmente de la del amiestu de la maorí cola de los primeros pobladores británicos, y l'inglés y el maorí.
Nueva Zelanda ye un país desarrolláu, y ocupa los primeros puestos nos ránkings internacionales de calidá de vida, sanidá, educación y llibertá económica. La so economía ta dominada pol sector servicios, siguíu pol industrial y pol primariu (agroganadería). El turismu internacional ye tamién una fonte importante d'ingresos pal país.
L'autoridá llexislativa recae nún parllamentu unicameral, y la executiva nún gabinete de ministros lideraos pol primer ministru. La reina d'Inglaterra ye'l xefe del estáu, y ta representada por un gobernador xeneral. La cadarma alministrativa del país complétenla once conceyos rexonales y 67 conceyos. El Reinu de Nueva Zelanda inclúi, amás del país, un territoriu dependiente, Tokeláu; dos estaos con autogobiernu llibremente asociaos a Nueva Zelanda, Islles Cook y Niue; y la Dependencia Ross, qu'abarca'l territoriu antárticu que reclama Nueva Zelanda. El país ye miembru de la Organización de les Naciones Xuníes, la Mancomunidá de Naciones, l'ANZUS, la Organización pa la Cooperación y el Desarrollu Económicos, l'ASEAN Plus, el Foru de Cooperación Económica Asia-Pacíficu y el Foru de les Islles del Pacíficu.
Historia
editarNueva Zelanda foi una de les caberes porciones de tierra nes qu'hebo asentamientu humanu. Tien dataose, por datación radiocarbónica, por investigación de la pauta de deforestación[21] y pola variabilidá del ADN mitocondrial na población maorí[22], alredor de 1250-1300 como la fecha na que pobladores polinesios, dempués d'una llarga serie de viaxes poles islles del Pacíficu sur, aportaron a Nueva Zelanda[23]. Nos sieglos vinientes estos pobladores desarrollaron una cultura propia y estremada que güei conocemos como maorí. La población dividíase n'iwi (tribus) y hapu (clanes) que delles veces cooperaben, otres competíen ya otres lluchaben ente sí. En dalgún momentu un grupu d'ellos emigraron a Rēkohu, les actuales islles Chatham, aú desarrollaron una cultura específica, la moriori[24]. Los moriori foron cuasimente esaniciaos, pola mor de la invasión de los maorís taranaki y la so esclavizacion, y poles enfermedaes trayíes polos colonos europeos, ente 1835 y 1862. Pa 1862 nun quedaben más que 101, y el caberu moriori morrió en 1933.
Los primeros europeos qu'aportaron a l'actual Nueva Zelanda foron l'esplorador holandés Abel Tasman y la so tripulación, en 1642[25], que colaron tres d'un recibimientu poco amistosu nel que morrieron cuatru de los son marineros[26]. Los siguientes en visitar les islles foron los ingleses: en 1769 l'esplorador inglés James Cook cartografió bona parte de la so costa[25]. Tres d'elli visitáronla bien de barcos mercantes, balleneros y de cazadores de foques, europeos ya norteamericanos, que intercambiaron colos maorís comida europea, ferramientes de metal, armes y otros productos a cambio de madera, alimentos y agua[27]. La llegada a eses tierres de les pataques y del mosquete camudaron pa siempres l'agricultura y les rellaciones ente les tribus maorís. Les pataques permitíen tener un superávit d'alimentos que facía posible desarrollar campañes militares más llargues, y les armes de fueu revolucionaron la forma de guerrear. Nes guerres intertribales, les conocíes como Guerres de los Mosquetes, hebo más de 600 batalles ente 1801 y 1840, con ente 30 y 40.000 muertos[28]. Al tiempu, y de magar entamos del sieglu XIX, empezaron a aportar a les islles misioneros cristianos, que convirtieron a la mayoría de los maorís. La guerra y les enfermedaes trayíes polos europeos ficieron menguar a la población maorí, demientres el sieglu XIX, a un 40% del so nivel anterior al contactu colos europeos[29].
En 1788 el capitán Arthur Phillip tomó posesión como gobernador de la nueva colonia británica de Nueva Gales del Sur, en territoriu australianu, qu'incluyía a Nueva Zelanda. En 1832 el gobiernu británicu, tres d'un pidimientu de los maorís de la islla Norte[30], nombró a James Busby como residente británicu, y en 1835, tres del anunciu de la inminente creación d'un asentamientu francés, les Tribus Xuníes de Nueva Zelanda unviaron una declaración d'independencia al rei británicu Guillermu IV y pidiéron-y la so protección[30]. Los disturbios continuos, la propuesta de colonización del territoriu pola Compañía de Nueva Zelanda, que yá enviara un primer barco con funcionarios de so pa mercar tierres a los maorís y la dubiosa validez llegal de la declaración d'independencia de les nomaes Tribus Xuníes llevaron a la Colonial Office a unviar al capitán William Hobson a reclamar la soberanía de les islles pal Reinu Xuníu y a negociar un tratáu colos maorís[31]. El 6 de febreru de 1840 roblose, na badea des Islles, el tratáu de Waitangi. En rempuesta a los intentos de la Compañía de Nueva Zelanda d'establecer un asentamientu independiente en Wellington[32] y a los intentos de colonos franceses de mercar tierres n'Akaroa[33], Hobson declaró la soberanía británica sobre toa Nueva Zelanda el 21 de mayu de 1840, pese a que les copies del tratáu entá circulaben pol país pendientes de la firma de dellos xefes maorís[34]. Tres de la firma del tratáu el númberu d'inmigrantes, especialmente británicos, entamó a medrar enforma[35].
Nueva Zelanda, entá parte de la colonia de Nueva Gales del Sur, convirtióse nuna colonia independiente, la Colonia de Nueva Zelanda, el 1 de xunetu de 1841[36]. De siguío entamó un conflictu armáu ente'l gobiernu colonial y los maorís por diferencies sobre la propiedá de la tierra y la soberanía. Esta guerra, desarrollada principalmente na islla Norte, fizo que llegaran miles de soldaos y marinos a Nueva Zelanda, y pasó a ser conocida como la Guerra de les tierres de Nueva Zelanda. A la derrota maorí siguió-y la confiscación pol gobiernu de grandes estensiones de tierra p'atender les demandes de los colonos[37]. La colonia entamó a tener un gobiernu representativu en 1852, y el so parllamentu aconceyó por primer vegada en 1854. En 1856 algamó l'autogobiernu, asumiendo la responsabilidá de tolos sos asuntos internos sacante les polítiques rellacionaes cola población nativa[38]. El mieu a que la islla Sur quixera formar una colonia separada el primer ministru Alfred Domett espublizó una resolución pa tresferir la capital dende Auckland a una llocalidá averada al estrechu de Cook[39]. Escoyose, pola so posición central nel conxuntu la colonia, a Wellington, aú aconceyó'l parllamentu por primer vegada en 1865[40].
En 1891 el Partíu Lliberal xubió al poder como primer partíu políticu organizáu del país[41]. El gobiernu lliberal, dirixíu por Richard Seddon el más del tiempu, aprobó munches lleis, sociales ya económiques, importantes. Asina, en 1893 convirtióse nel primer país del mundu que garantizaba a les muyeres el derechu al votu, y en 1894 estableció que hubiera que recurrir obligatoriamente a un arbitraxe pa resolver los conflictos ente patronos y sindicatos obreros[42].
En 1907, por pidimientu del parllamentu, el rei Eduardu VII proclamó a Nueva Zelanda dominiu del imperiu británicu, un estatus xurídicu que reflexaba los sos amplios poderes d'autogobiernu. En 1947 el país adoptó l'Estatutu de Westminster, confirmándose asina que'l parllamentu británicu nun diba poder volver a llexislar pa Nueva Zelanda ensin el consentimientu del so parllamentu[38].
Dende entamos del sieglu XX el país foi aumentando la so participación a nivel internacional, participando na Primer y Segunda guerres mundiales[43] y sufriendo les consecuencies de la Gran Depresión[44]. Esta facilitó la elección del primer gobiernu llaborista, y l'establecimientu d'un estáu del bienestar y una política económica proteicionista. De magar la Segunda Guerra Mundial el país foi arriqueciendo[45], y los maorís entamaron a dexar los sos hábitat rurales tradicionales y colaron pa la ciudá a buscar trabayu. Foi desarrollándose un malestar maorí pol eurocentrismu del gobiernu, y formóse un movimientu que reivindicaba la cultura maorí y pidía que se respetara'l tratáu de Waitangi[46]. En 1975 establecióse un tribunal especial, el tribunal de Waitangi, pa investigar los posibles incumplimientos del tratáu, y foi facultáu p'atender reivindicaciones históriques del pueblu maorí. De magar el gobiernu tien negociao reasentamientos con delles tribus, magar que nun hebo acuerdo sobre las reclamaciones, na década del 2000, sobre la propiedá de la costa y los fondos marinos[47].
Política
editarXeografía
editarEconomía
editarDemografía
editarCultura
editarReferencies
editar- ↑ URL de la referencia: https://thecommonwealth.org/our-member-countries/new-zealand. Data de consulta: 21 ochobre 2022. Tipo de referencia: official member page.
- ↑ URL de la referencia: http://mtcr.info/partners/. Data de consulta: 4 avientu 2017.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: http://www.nuclearsuppliersgroup.org/en/participants1. Editorial: Grupu d'abastecedores nucleares. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: https://www.state.gov/documents/organization/76043.pdf. Data de consulta: 8 avientu 2017.
- ↑ URL de la referencia: https://www.alu.army.mil/alog/issues/sepoct11/ABCA_Coalition_Works.html. Data de consulta: 8 avientu 2017.
- ↑ URL de la referencia: https://www.dst.defence.gov.au/partnership/technical-cooperation-program. Data de consulta: 8 avientu 2017.
- ↑ URL de la referencia: http://jitc.fhu.disa.mil/projects/pki/pke_lab/partner_pki_testing/cceb_pki_status.aspx. Data de consulta: 8 avientu 2017.
- ↑ URL de la referencia: http://www.airstandards.org/about-asic.html. Data de consulta: 8 avientu 2017.
- ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
- ↑ URL de la referencia: https://www.iea.org/countries/membercountries/. Editorial: Axencia Internacional de la Enerxía. Data de consulta: 8 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://www.dhs.gov/visa-waiver-program-requirements. Data de consulta: 7 marzu 2020.
- ↑ URL de la referencia: https://public.wmo.int/en/members/new-zealand. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 9. Supports qualifier: data de principiu.
- ↑ (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.
- ↑ McGlone M, Wilmshurst JM, Dating initial Maori environmental impact in New Zealand. Quaternary International, 1999;59(1):5-16. doi:10.1016/S1040-6182(98)00067-6.
- ↑ Murray McIntosh, RP, Scrimshaw BJ, Hatfield PJ, Penny D, Testing migration patterns and estimating founding population size in Polynesia by using human mDNA sequences. Proceedings of the National Academy of Sciences of the United States of America, 1998:95(15);9047-52.
- ↑ Wilmshurst JM, Anderson AJ, Higham TFG, Worthy TH, Dating the late prehistorical dispersal of Polynesians to New Zealand using the commensal Pacific rat. Proceedings of the National Academy of Sciences, 2008:105(22);7676-80.
- ↑ Ross C, "Moriori and Māori: the linguistic evidence", en Sutton D (ed.), The Origins of the first Newzealanders, páxs.123-35. 1994, Auckland, Auckland University Press.
- ↑ 25,0 25,1 Mein Smith P, A Concise History of New Zealand, p. 23. 2005, Australia, Cambridge University Press. ISBN 0-521-54228-6.
- ↑ Salmond A, Two Worlds: First Meetings Between Maori and Europeans, 1642-1772, p. 82. 1991, Auckland, Penguin Books. ISBN 0-670-83298-7.
- ↑ King M, The Penguin History of New Zealand, p. 122. 2003, New Zealand, Penguin Books. ISBN 978-0-14-301867-4.
- ↑ Brailsford B, Arrows of plague, p. 35. 1972, Wellington, Hick Smith and Sons. ISBN 0-456-01060-2.
- ↑ Lange R, May the people live: a history of Māori health development 1900-1920, p. 18. 1999, Auckland University Press.
- ↑ 30,0 30,1 Rutherford J, James Busby, in An Encyclopaedia of New Zealand 1966.
- ↑ McLintock AH, Sir George Gipps, en An Encyclopaedia of New Zealand 1966.
- ↑ McLintock AH, Settlement from 1840 to 1852, en An Encyclopaedia of New Zealand 1966.
- ↑ McLintock AH, French settlement at Akaroa, en An Encyclopaedia of New Zealand 1966.
- ↑ Simpson K, Hobson, William - Biography, en Dictionary of New Zealand Biography.
- ↑ Phillips J, British immigration and The New Zealand Company, en The Encyclopedia of New Zealand.
- ↑ Crown colony era, na web New Zealand History.
- ↑ New Zealand's 19th-century wars, na web New Zealand History.
- ↑ 38,0 38,1 Wilson J, Story: Nation and Government, en The Encyclopedia of New Zealand.
- ↑ Temple P, Wellington yesterday. 1980, John McIndoe. ISBN 0-86868-012-5.
- ↑ Parliament moves to Wellington, na web New Zealand History.
- ↑ Wilson J, History - Liberal to Labour, na web The Encyclopedia of New Zealand.
- ↑ Boxall P, Haynes P, Strategy and Trade Union Effectiveness in a Neo-Liberal Environment. British Journal of Industrial Relations, 1997:35(4);567-91.
- ↑ New Zealand at war, na web The New Zealand History.
- ↑ Easton B, Inter-war years and the Great Depression, na web The Encyclopedia of New Zealand.
- ↑ Easton B, Economic history - Great boom, 1935-66, na web The Encyclopedia of New Zealand.
- ↑ Royal TA, Māori - Urbanisation and renaissance, na web The Encyclopedia of New Zealand.
- ↑ Barker F, Debate about the foreshore and seabed, na web The Encyclopedia of New Zealand.
| Países d'Oceanía | ||
| Australia | Islles Fixi | Islles Cook | Kiribati | Marianes del Norte | Islles Márxal | Micronesia | Nauru | Niue | Nueva Zelanda | Paláu | Papúa Nueva Guinea | Islles Salomón | Samoa | Tokeláu | Tonga | Tuvalu | Vanuatu | Wallis y Futuna | ||
Datos: Q664
Multimedia: New Zealand
