Antigua república romana

La República romana (en llatín: Rēs pūblica Populī Rōmānī, Rōma o Senātus Populusque Rōmānus) foi un periodu de la hestoria de Roma carauterizáu pol réxime republicanu como forma de gobiernu, que s'estiende dende'l 509 e.C., cuando se punxo fin a la Monarquía romana cola espulsión del últimu rei, Lucio Tarquinio el Sobeyosu, hasta'l 27 e.C., fecha en que tuvo'l so entamu'l Imperiu romanu.

Antigua república romana
Alministración
Xeografía
Demografía
Economía
Códigu ISO / /
Cambiar los datos en Wikidata

La República romana consolidó la so poder nel centru d'Italia mientres el sieglu V a. C. y nos sieglos IV y III a. C. impúnxose como potencia dominante de la península itálica sometiendo a los otros pueblos de la rexón y enfrentándose a les polis grieges del sur. Na segunda metá del sieglu III a. C. proxectó'l so poder fuera d'Italia, lo que la llevó a una serie d'enfrentamientos coles otres grandes potencies del Mediterraneu, nos que ganó a Cartago y Macedonia, anexionándose los sos territorios.

Nos años siguientes, siendo yá la mayor potencia del Mediterraneu espandióse el so poder sobro les polis grieges; el reinu de Pérgamu foi incorporáu a la República y nel sieglu I a.  C. conquistó les costes d'Oriente Próximu, entós en poder del Imperiu seléucida y pirates. Mientres el periodu que toma'l final del sieglu II a.  C. y el sieglu I a.  C., Roma esperimentó grandes cambeos políticos, provocaos por una crisis consecuencia d'un sistema avezáu a dirixir namái a los romanos y non afechu pa controlar un gran imperiu. Nesti tiempu intensificóse la competencia poles maxistratures ente l'aristocracia romana, creando irreconciliables quebres polítiques que solmenaríen a la República con trés grandes guerres civiles; estes guerres terminaríen destruyendo la República, y desaguando nuna nueva etapa de la hestoria de Roma: l'Imperiu romanu.