Bagdag

Bagdag
Alministración
País	Iraq
Gobernaciones	Gobernación de Bagdag
Tipu d'entidá	gran ciudá
Cabezaleru/a del gobiernu	Manhal Al habbobi
Nome oficial	بغداد (ar)
Nome llocal	بغداد (ar)
Códigu postal	10001–10090
Xeografía
Coordenaes	33°18′55″N 44°21′58″E / 33.3153°N 44.3661°E
	Bagdag Bagdag (Iraq)
Superficie	673 km²
Altitú	34 m
Demografía
Población	8 126 755 hab. (2018)
Porcentaxe	100% de Gobernación de Bagdag
Densidá	12 075,42 hab/km²
Más información
Fundación	762
Estaya horaria	UTC+03:00
Llocalidaes hermaniaes	Amán, Beirut, El Cairu, Damascu, Sana'a, Teḥrán, Yeda, Concord, Rabat, Pavlodar, Pyong Yang y Dubái
	amanatbaghdad.gov.iq

Bagdag^[1] o Bagdad^[2]^[3] (n'árabe: بغداد, Baġdād) ye la capital d'Iraq, y tamién la de la provincia que lleva'l so nome. La so población, en 2016, estimábase que yera de 7.180.889 habitantes, que faen d'ella la mayor del país, la segunda del mundu árabe dempués d'El Cairu y la segunda mayor d'Asia occidental dempués de Teḥrán.

Asitiada a la vera'l ríu Tigris, la ciudá fundóse nel sieglu VIII y foi la capital del califatu abbásida. En perpocu tiempu dempués de la so fundación convirtióse nún centru cultural, comercial ya intelectual de primer orde dientru del mundu islámicu. Esto, xunto a la fundación nella de delles instituciones académiques destacaes, dio-y a la ciudá sonadía mundial como centru del conocimientu. Na Alta Edá Media Baghdad yera considerada, colos sos 1.200.000 habitantes, la mayor ciudá del mundu. La ciudá foi destruyida polos mongoles en 1258, y esto provocó l'entamu la so decayencia, que siguió por dellos sieglos por culpa de les plagues y de les lluches pol so control ente distintos imperios. Col reconocimientu, a partir del antiguu mandatu británicu de Mesopotamia, d'Iraq como un país independiente en 1938 la ciudá recuperó della de la so antigua importancia como centru cultural del mundu árabe.

Nel sieglu XXI la ciudá tien sufrío importantísimos daños como resultáu de la invasión de 2003 y la guerra que la siguió y que duró hasta avientu de 2011. La firma de la paz, por embargu, nun traxo la tranquilidá a les sos cais, porque los opositores al gobiernu iraqí tienen el vezu de perpetrar nella los sos atentaos, de forma que nel 2012 foi considerada una de les ciudaes menos acoyedores pa vivir^[4] y como la peor d'ente 221 megaciudaes no que cinca a la so calidá de vida.