Campa Torres

Campa Torres
	Bien d'Interés Cultural
	xacimientu arqueolóxicu
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Xixón
Coordenaes	43°34′10″N 5°42′14″W / 43.5694°N 5.7039°O
	Campa Torres Campa Torres (Asturies)
Patrimoniu
BIC	RI-55-0000256

La Campa Torres ye una estensión de tarrén que s'alcuentra nel cabu de Torres, península que se deita so'l mar Cantábricu, nel norte de la Península Ibérica. Domina'l puertu d'El Musel y asítiase al oeste de la ciudá de Xixón (Asturies) a unos siete quilómetros de distancia.

Trátase d'un enclave que dende abeyaná habitárase por desemeyaes tribus asina como polos romanos como atestigüen los restos y xacimientos arqueolóxicos afayaos na faza'l cabu de Torres asina como'l cercanu monte Areo. Por too esto destaquen los siguientes xacimientos arqueolóxicos como son les istalaciones del Parque Arqueolóxicu-Natural de la Campa Torres y contemplar los restos del xacimientu arqueolóxicu del oppidum Noega, un primitivu castru au vivíen los cilúrnigos.

Dende otru puntu de vista, el cabu Torres qu'encadarma la campa posee una doyura biolóxico y xeológico de gran importancia, cola esistencia d'un sustratu vexetal carauterísticu.

La fauna del cabu nun desmerez a la vexetación siendo un enclave d'alta importancia pa la observación d'aves marines.

Parque arqueolóxicu editar

Vista xeneral de la Campa Torres

Los primeros estudios nel parque daten de caberos del sieglu XVIII, cuando en 1783 l'arquiteutu Manuel Reguera González, afaláu por Xovellanos, escavando los restos de dos construcciones qu'elli consideró pertenecientes a les construcciones de les Ares Sestianes.

En 1972 José Manuel González, profesor de Prehistoria de la Universidá d'Uviéu, catalógalu como'l castru Noega, coñocío por desemeyaos testos antiguos. Seis años más sero, en 1978, José Luis Maya y Juana Bellón realicen la primer campaña d'escavación científica. Nesta campaña afayóse un edificiu román y restos arqueolóxicos más antiguos. En 1980 ye declaráu como Bien d'Interés Cultural y en 1982 entamen les escavaciones periódiques de la Campa de Torres, baxo la direición de José Luis Maya González y Francisco Cuesta y dientro'l "Proyeutu Xixón".

Reprodución de la casa romana que s'asentaba nel pobláu de la Campa Torres

En 1985 a José Luis Maya González y Francisco Cuesta encársase-yos, por parte'l Ministeriu de Cultura, la redación d'un antepoyeutu y proyeutu pa la creación d'ún de los primeros parques arqueolóxicos d'España nel xacimientu xixonés.

Reprodución d'una casa del pobláu prerromán de la Campa Torres

El parque inauguróse pol ministeriu de cultura nel añu 1989 siendo parte del plan de parques arqueolóxicos qu'entama a ellaborar el ministeriu esi añu como forma de divulgación y estudiu de desemeyaos xacimientos arqueolóxicos n'España. Nesta llinia, el ministeriu abángase nun sólo a la muesa de les desemeyaes pieces que s'alcuentren n'elli, sinón qu'enancha la conceición de la pallabra muséu a la zona qu'acupa'l xacimientu^[2].

Asina por esta sida'l parque céntrase nun sólo na muesa de les pieces arqueolóxiques afayaes na faza'n desemeyaes escavación qu'entá güei se caltienen, sinón que la coleición amuésase dientro d'un marcu contestual cola dómina y la zona. Por ello aparte de realizar el llabor típico d'abellugu de les pieces, realiza una divulgación del xacimientu colo que'l parque queda integráu dafechu integráu nel territoriu nel que s'afaya.

El parque descubre la prehistoria asturiano centrándose nos anicios de los asentamientos de magar les tribus ástures prerromanes hasta la dómina romana que dio orixe a la ciudá de Xixón tal como la conocemos anguaño. Esto ye posible por mor a les escavaciones que dexaren a la vista los restos d'un pobláu prerromanu dempués romanizáu.

Los cincuenta mil m² que conformen el parque alcuéntrense dixebraos en delles desemeyaes estayes:

Receición y muséu (abaxo)
Faru romanu
Itinerariu arqueolóxicu (abaxo)
Castru (abaxo)
Miradorios d'aves
Miradorios

Receición y muséu editar

Edificiu del muséu de la Campa Torres 43°34′12.42″N 5°42′6.78″W / 43.5701167°N 5.7018833°O

El muséu ucupa un antiguu búnquer de la guerra civil española pa la defensa d'El Musel. Nesti edificiu existe una sala d'audiovisuales, servicios, espacios de trabayu, biblioteca y área de recréu.

El muséu ta encadarmáu por desemeyaes reproduciones, maquetes y audiovisuales.

Itinerariu arqueolóxicu editar

Encadármase por trece puntos d'oservación nos que pasu ente pasu vanse enseñando y informando sobro los desemeyaos aspeutos del pobláu. Demientres tol recorríu va amosándose diferentes viviendes prerromanes de planta circular (sieglu V a. de C.), elíptiques y viviendes romanes, éstes yá con planta rectangular (sieglos I al III).

Otros puntos d'interés son la muria defensiva , pozos artesanos, etc... Nesti percorríu tamién vienen marcaos datos de les estayes vexetales y la so evolución en paralelu coles civilizaciones que poblaron la campa.

Los puntos d'información que marquen esti recorríu úfrenos tamién datos sobro les tribes vexetales y la so evolución histórica hasta configurar el paisaxe d'anguaño.

El Parque Arqueolóxicu-Natural de la Campa Torres ye'l nial qu'organiza y coordina tola actividá arqueolóxica del conceyu de Xixón, sé del centru de documentación arqueolóxica del conceyu y de la Biblioteca Manuel Fernández-Miranda.