Chatarrona

Chatarrona ye un proyeutu de la productora Ámbitu nel campu del audiovisual n'asturianu. Trátase de la primer serie que se fai nesti idioma y ye una comedia gris, urbana y contemporánea, que cuenta la historia de dos amigos nuna situación desesperada: tán nuna casa d'emprestao y nun tienen ingresos. Nesti escenariu, ún d'ellos decide poner un anunciu p'almitir estudiantes d'asturianu como güéspedes. Y ehí arranca la trama d'esta mini webserie protagonizada por Masokhna Diop, Pedro Durán, Juana Marrón y Alberto Rodríguez, con guión d'Alberto Suárez. Chatarrona tien muncho de retratu social d'Asturies y rescampla los contrastes que xenera la crisis económica. Estrenada'l martes 13 d'avientu del 2011, la serie convirtióse en tou un éxitu, algamando nos primeros díes que s'emitió pel portal YouTube 3.000 visites.

Chatarrona
Datos
Xéneru	comedia (es)
País d'orixe	España
Añu	14 avientu 2011
Idioma orixinal	asturianu y castellanu
Númberu d'episodios	3
Repartu	ver Juana Marrón Alberto Rodríguez Masokhna Diop Pedro Durán
Productora	Ámbitu

Sinopsis

Chuso y Esteban son mui amigos y viven nun pisu propiedá de los padres de Chuso que yá nun usen porque compraron un pisu meyor. Al ser de la familia, nun paguen renta: namás los gastos. Chuso y Esteban tán al paru y yá nun tienen derechu a prestaciones económiques, así que Chuso decide que la meyor manera de sacar perres ye poner un anunciu pa garrar inquilinos que quieran compartir pisu y aprender un idioma de pasu, l'asturianu. Un negociu basáu nos típicos programes internacionales, pero aplicáu a Asturies.

Chuso ta mui ilusionáu pero Esteban ye mui escépticu col «presuntu negociu». Esteban ta mui deprimíu desque perdió'l trabayu, la vida regalada que llevaba como presentador estrella na televisión, la fama y l'almiración de los telespectadores. Esteban vive pendiente d'una llamada de teléfonu del so axente que lu devuelva a los platós y a los prime-time. Por fin, l'anunciu de Chuso tien efeutu y dos persones interesaes nel tratu lleguen a la so casa y a les sos vides: Carolina y Malik.

Carolina, depués de rodar per media Europa, volvió a Asturies hai menos d'un añu y quier aprender asturianu bien –un poco yá lo entiende, porque ye fía d'asturiana– porque-y parez bien triste dominar cuatro idiomes y nun facer lo mesmo cola llingua materna. Carolina trabaya dende casa programando páxines web y tamién facía trabayos de manager. Pero lo que más-y gusta a Carolina ye'l mundu del espectáculu, el teatru, poder llegar a ser actriz.

Malik tamién quier aprender asturianu —tamién sabe un poco porque trabaya nuna sidrería—, pero quier sabelo bien porque quier optar a meyores oportunidaes llaborales nel Principáu. Malik tien más hermanos viviendo n'España y n'Europa pero tien los pas en Senegal.

Personaxes

• Carolina (Juana Marrón): 33 años, soltera, de profesión webmistress. Vivió en Londres, Berlín y Copenḥague. Ye una europeísta convencida. Quixo volver a Asturies pa centrase porque taba un poco desnortiada y necesita la tierra, los oríxenes. Como munchos emigraos, delles veces muestra un puntu d'hiperasturianismu. Los sos rasgos de carácter son que ye suañadora, hiperactiva, intelixente, cariñosa y creativa, pero con un migayu d'insatisfacción, d'ironía y d'espíritu críticu.

• Chuso (Alberto Rodríguez): 37 años, divorciáu, de profesión comercial. Situación llaboral actual, desemplegáu. L'últimu trabayu que tuvo foi pa una compañía de telefonía móvil. Los sos rasgos de caracter principales son que ye optimista, vagonzón, llistu y cariñosu. El so principal interés ye'l fútbol y les muyeres, non necesariamente por esi orde.

• Malik (Masokhna Diop): 30 años, solteru, de profesión camareru nuna sidrería. Malik nació nel Senegal y lleva dellos años n'Asturies. Sabe bien lo que ye la emigración illegal pero tien papeles de residente. Los sos rasgos de carácter son que ye llistu, trabayador, allegre, abstemiu y mui lligón. Tamién ye un fanáticu del fútbol y lo que más-y gustaría sería qu'una muyer asturiana aceptara formar una familia con él, pero convirtiéndose a la so relixón.

• Esteban (Pedro Durán): 35 años, solteru, de profesión estrella de la televisión, actor, escritor y artista. L'últimu trabayu que tuvo foi como presentador del programa de la TPA de más audiencia, l'espaciu del corazón Mañana serán estielles. Los sos rasgos de carácter son que ye pesimista, depresivu, egocéntricu, hipocondriacu, hipersensible a la crítica pero tamién trabayador, competitivu y noble.

Referencies

• Datos: Q13146908