Club Deportivo Mosconia
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
El Club Deportivo Mosconia ye un equipu de fútbol de Grau, Asturies.
Club Deportivo Mosconia | |||
|---|---|---|---|
| Situación | |||
| País |  España | ||
| Autonomía |  Principáu d'Asturies | ||
| Provincia | Provincia d'Asturies | ||
| Conceyu |  Grau | ||
| Estáu | España | ||
| Datos | |||
| Tipu | club de fútbol | ||
| Fundáu en | 1961 | ||
| Categoría | Tercer División d'España | ||
| Uniforme | |||
| |||
|
Web oficial | |||
 | |||
L'equipu ye un de los clásicos dientro del fútbol asturianu, ocupa l'úndecimu llugar na clasificacion histórica del fútbol asturianu (excluyendo a Real Uviéu, Real Sporting y los sos filiales).
Ye amás el númberu 241 na clasificación histórica total de la Tercer División, con 24 temporaes na categoría; y ún de los únicos 12 equipos asturianos en xugar polo menos una temporá en categoría estatal, penriba la Tercer División.
Historia
editarAl entamu'l sieglu XX esistieron na villa moscona dellos equipos aficionaos, nos que la mocedá del conceyu entamó a prauticar el fútbol. Dalgunos d'esos equipos foron l'Atlético de Grado, Arenas Moscón o Sporting Moscón. A la fin en 1945, Jose María Fernández conocíu popularmente como 'Pepe el Cubano' fundaría el Club Deportivo Mosconia, rexistrándolo na Federación Asturmontañesa el 4 d'ochobre.
L'equipu pasó a ser ún de los punteros na pol aquel entonces, Segunda y Primera Rexonal Asturiana, algamando na temporá 1954/55 los títulos de Copa Federación y de campeón de Primera Rexonal. Esi mesmu añu, disputó la so primer promoción d'ascensu a la Tercera estatal, perdiendo escontra la Xunión de L'Entregu dempués d'una polémica actuación arbitral nel partíu de vuelta en feudu entreguín. Sicasí, tres l'abandonu de la presidencia del fundador del club, entamó un periodu de dificultaes que finó cola desapaición nel 1958.
Los años vinientes la tradición del fútbol nun coló de Grau y apaeció nel vecín pueblu de San Pelayo otru club, el San Pelayo Club de Fútbol, eso sí, namás por 3 temporaes. Nun sería hasta 1961 cuando tornaría a surdir de nuevu un equipu con base na capital del conceyu, el Grado Club de Fútbol. A partir d'esti club, llograríase por fin la estabilidá deportiva e institucional, llegando al puntu de recuperar nel añu 1970 los derechos federativos, emblema y nome del históricu Club Deportivo Mosconia.
Na temporada 1983/84, dempués de munches temporaes intentándolo y siendo ún de los llamaos al ascensu, algamaría xugar la so primer temporá na Tercer División. El club asentaríase na categoría con muncho trabayu, ya que n'ella xúntabense clubs asturianos con cántabros o gallegos hasta 1987. Nel final de la década de los 80, entamaría a asomase nas primeras posiciones de la clasificación, finando delles veces ente los 6 primeros pero ensin disputar promoción. Na temporá 1990/91, recuperase el sistema de liguilla d'ascensu, y el C.D. Mosconia algama la tercera posición del grupu asturianu, polo que disputaría la promoción a Segunda B. Queda encuadráu ne grupu A3 col Real Madrid C, Burgalés y Bergantiños. El Mosconia fina con 10 puntos, invictu, y llogrando l'ascensu el 16 de xunu del 1991 dempués de ganar por 1-2 al Real Madrid C na Ciudá Deportiva de Las Rozas.
Siendo estí el mayor hitu de la so historia, disputaría la campaña 1991/1992 nel grupu I de la Segunda B, compartiendo división con equipos como'l Salamanca, Numancia, Pontevedra o Lugo ente otros. El pasu moscón pola categoría sería fugaz, finando últimu clasificáu con 21 puntos. La torna a la categoría asturiana sería dura y pasaría los años 90 como equipu ascensor ente la Tercera y la Rexonal Preferente. Col nuevu mileniu, el Mosconia posaríase de nuevu estable na Tercer División, siendo terceru na temporá 2004/2005 y tornando a disputar un play-off d'ascensu a Segunda B. El sortéu emparexaríalo cola SD Negreira, empatando 1-1 en Grau y a 0-0 na llocalidá gallega, quedando elimináu pol valor doble de los goles en campu contrariu.
En 2011, la situación del club llegó a un puntu críticu, encadenando descensos hasta la Primera Rexonal asturiana y con una peligrosa situación económica. La directiva foi presidida por Jose Luis Tamargo 'Pitus' y cola collaboración de xente mozo y moscona, el club repuntó, algamando asistencies hestóriques na categoría y llenando la grada del Marqués delles veces y na promocion d'ascensu a Preferente. Na temporá 2014/2015, el C.D. Mosconía tornó a ascender a la Tercer División, categoría na que xuega anguaño.
Estadiu
editarEl club algamó al pocu la so fundación la cesión del usu de los terrenos del barriu del Casal, propiedá del ayuntamientu, onde se construyó l'estadiu del mesmu nome. En 1974, cola mediación del Marqués de la Veiga d'Anzu, llevántase la grada cubierta que inauguraríase un añu dempués con un amistosu ente'l Real Oviedo y l'Ensidesa. Dende entonces, el campu tomaría el nome actual de Estadiu Marqués de la Vega de Anzo.
La capacidá del estadiu ronda los 3.000 espectadores.
Al llau, encuéntrase el complexu deportivu de El Casal, un campu de yerba artificial onde s'entrenen tanto'l primer equipu como les categoríes inferiores.
Rivalidá
editarEl C.D. Mosconia tien rivalidá principalmente col C.D. Praviano y Real Juvencia de Trubia, vecinos de la comarca del Baxu Nalón.
La primer y histórica rivalidá foi col equipu trubiecu, escuadra potente nos 60 y 70, dándose la curiosa tradición por parte la afición mosconista dempués de llograr la victoria como visitante, de plantar un repollu nel centru'l campu de Trubia.
Cola venida a menos del Juvencia, acentuose más la rivalidá nos enfrentamientos col C.D. Praviano, pola mayor coincidencia ente dambos en Tercera y Preferente.
Actualmente la afluencia ye notablemente menor, pero nel recuerdu queden los numberosos desplazamientos d'aficionaos de los tres clubes nos sos enfrentamientos, sobremanera al traviés del Ferrocarril Vascu-Asturianu (dempués FEVE y agora Renfe Ancho Métrico) que xune a les tres llocalidaes.
Cantera
editarEl CD Mosconia posee amás dellos equipos de cantera. Dende la fundación de les escueles deportives municipales y la so posterior asunción por parte del club, el Mosconia tuvo cuasi siempre un equipu en ca peldañu del fútbol base asturianu. Anguaño alrodiu 200 neños formen la cantera mosconista.
Los máximos prodixos de la cantera moscona son varios ascensos a la Primer División asturiana delles veces, y de xeitu más habitual en categoría benxamín, sicasí los equipos cadete y xuvenil tamién participaron n'ella.
A la vez, el C.D. Mosconia organiza dellos torneos de fútbol base, normalmente en Selmana Santa y al entamu del branu, onde participen equipos de toda Asturies.
Uniforme
editar- Uniforme títular: Camiseta blanca, pantalón azul, medies azules.
- Uniforme reserva: Camiseta mariella y azul, pantalón azul, medies azules.
Datos del club
editarEsta páxina o seición ta desactualizada. La información que tien ye vieya o insuficiente. |
- Temporaes en 2ªB: 1
- Temporaes en 3ª: 24
- Temporaes en Rexonal Preferente: 41
- Temporaes en Primera Rexonal: 1
- Participaciones en Copa del Rei: 4
Plantía
editarReferencies
editarEnllaces esternos
editar
Datos: Q2789945
