Dagen H
Esti artículu o seición necesita referencies qu'apaezan nuna publicación acreitada, como revistes especializaes, monografíes, prensa diaria o páxines d'Internet fiables. |
El Día H (en suecu: Dagen H) foi'l domingu 3 de setiembre de 1967, nel que, a les 5:00 de la madrugada, Suecia camudó'l sentíu de circulación del tráficu pasando de conducir pela izquierda a faelo pela derecha. La H provién de höger, derecha en suecu.
Razones
editarLes razones pal cambéu yeren:
- En tolos países vecinos (incluyendo Noruega, con quien Suecia comparte una frontera bien llarga) conducíen pela derecha.
- La mayoría de los suecos conducíen en coches col volante a la izquierda. Esti fechu provocaba munches choques fronteros cuando los automóviles adelantraben en carreteres d'un carril pa cada sentíu, les más habituales en Suecia por causa de la so baxa densidá de población.
Preparación y desenvolvimientu
editarAun así, el cambéu yera impopular ente la xente. Nos anteriores 40 años fuera repetidamente refugáu nes urnes. Nun referendu de 1955, el 85% de los votantes prefirieron siguir conduciendo pela izquierda. En 1963, el Riksdag (el parllamentu suecu) aprobó'l cambéu y estableció la Comisión estatal de tráficu pela derecha (Statens Högertrafikkomission (HTK)) pa dirixilo. Coles mesmes enllantóse un programa educativu de cuatro años aconseyáu por psicólogos.
Creóse un logotipu pal Dagen H, y foi estampáu en tou tipu d'oxetos conmemorativos, inclusive en ropa interior femenina.[1]
Al averase'l día H cada encruz foi forníu con un xuegu extra de señales (colos correspondientes palos) envolubraes en plásticu negro (que los obreros teníen que retirar el día señaláu). Análogamente, pintáronse nueves llinies viales paraleles a les yá esistentes nos pavimentos, hasta entós tapaes con cintes negres. Aprovechóse tamién pa camudar el color: hasta entós les llinies yeren marielles; de magar, blanques.
Nel día H, toa circulación non esencial foi prohibida ente la 01:00 y les 06:00. En Estocolmu y Malmö esta prohibición foi estendida pa dexar a los grupos de trabayadores reconfigurar les interseiciones: duró dende'l sábadu a les 10:00 hasta'l domingu a les 15:00. Tou vehículu que circulara mientres aquelles hores tenía que sometese a una reglamentación especial. A les 4:50 tol tráficu teníase que detener totalmente y camudar de llau antes de les 4:55. A les 5:00 teníen derechu a volver circular.
Les cais d'un solu sentíu presentaron problemes únicos. Tuviéronse que construyir paraes d'autobús nel otru llau de la cai. Hubo que remocicar les cruces pa dexar un fluxu fayadizo de tráficu.
Esaniciáronse los tranvíes y fueron sustituyíos por autobuses, de los cualos mercáronse más d'un millar con puertes nel llau derechu. Amás, alredor de 8.000 de los antiguos fueron remocicaos pa tener puertes a entrambos llaos. Tolos coches suecos tuvieron que ser modificaos, inclusive los que yá teníen el volante a la izquierda, yá que tuvieron qu'afaese les lluces (qu'hasta entós taben reglaes pa nun esllumar a los coches provenientes de la derecha y non a la izquierda, como fadría falta en delantre).
Balance ya influyencia
editarEl llunes posterior al día H contabilizáronse 125 accidentes de tráficu, un númberu menor que'l rangu ente 130 y 198 de los anteriores llunes. Nun s'atribuyó nengún accidente mortal al cambéu de sentíu. Sicasí, munches persones mayores dexaron de conducir por galbana a afaese a la nueva situación. Los espertos suxirieren que camudar de llau de conducción amenorgaría'l númberu d'accidentes porque se tendría una visión meyor de la carretera, y, verdaderamente, los accidentes ente coches y con peatones menguaron fuertemente dempués del cambéu.
A pesar de nun tener frontera física con nengún país, Islandia siguió l'exemplu y tamién camudó'l llau de circulación a la derecha en 1968.
Otros cambeos en Suecia
editarEsti nun foi l'únicu episodiu de cambéu de convenciones en Suecia. En 1712 tuvieron un 30 de febreru col fin de coordinar y faer entrar en fase'l calendariu suecu col xulianu. Otra manera, un nuevu posible cambéu, el de la moneda, foi apocayá refugáu al nun aprobase un referendu sobre la sustitución de la corona pol euru'l 14 de setiembre de 2003.
Referencies
editarVer tamién
editarEnllaces esternos
editarDocumental suecu sobre'l Dagen H: https://www.youtube.com/watch?v=pVR85jpTcn8
