Eugenia de Montijo
María Eugenia Palafox Portocarrero y KirkPatrick, condesa de Teba, más conocida como Eugenia de Montijo (5 de mayu de 1826, Granada – 11 de xunetu de 1920, Madrid) foi emperatriz consorte de los franceses como esposa de Napoleón III.
Eugenia de Montijo | |
|---|---|
 | |
| Vida | |
| Nacimientu | Granada, 5 de mayu de 1826[1] |
| Nacionalidá |
 Francia  España |
| Muerte | Madrid, 11 de xunetu de 1920[1] (94 años) |
| Sepultura |
Tumba de Eugenia de Montijo (es)  |
| Familia | |
| Padre | Cipriano Portocarrero |
| Madre | María Manuela Kirkpatrick |
| Casada con | Napoleón III Bonaparte (1853 – m. 1873)[2] |
| Fíos/es | Napoleón Euxenu Lluis Bonaparte |
| Hermanos/es | |
| Familia |
ver
|
| Pueblu | Casa de Bonaparte |
| Estudios | |
| Llingües falaes |
castellanu francés |
| Oficiu | consorte |
| Premios | |
| Serviciu militar | |
| Lluchó en | guerra franco-prusiana |
| Creencies | |
| Relixón | Ilesia Católica |
 | |
 | |
_-_ribbon_bar.png){kind=small}
Primeros años editar
María Eugenia Ignacia Agustina de Palafox-Portocarrero de Guzmán y Kirkpatrick nació en Granada'l 5 de mayu de 1826 y morrió a los 94 años en 1920. El so padre foi Cipriano de Palafox y Portocarrero, XIII duque de Peñaranda y grande d'España, fíu de Felipe Antonio de Palafox Croy. La so madre foi Enriqueta María Manuela KirkPatrick de Closeburn y de Grevignée, fía del escocés William KirkPatrick y la belxicana Marie Françoise de Grevignée.
En 1835, Eugenia foi unviada a Francia a estudiar nel Conventu del Sagráu Corazón y depués nel Gymnase Normale, Civile et Orthosomatique. En 1837 tuvo una curtia y desagradable estancia nun internáu en Bristol, al suroeste d'Inglaterra.
El 12 d'abril de 1849, nuna receición nel Palaciu del Eliseu conoció a Napoleón III, quien daquella yera solu presidente de la República.
Boda editar
Ende foi au conoció al futuru emperador, col que casó'l 30 de xineru de 1853. Napoleón acababa de ser refugáu pola princesa Adelaida, sobrina de la reina Victoria.
Nun discursu que pronunció poco primero de la so boda, Napoleón dixo: «Prefiero casame con una muyer a la qu'amo y respeto que con una desconocida, cola qu'una alianza podría tener ventayes entemecíes con sacrificios». Esti comentariu viose con ciertu sarcasmu dende Gran Bretaña. Los periódicos d'esi país llanzaron comentarios tocante a la xunión ente una aristócrata de reconocíu llinaxe con un miembru de la familia Bonaparte.
El 16 de marzu de 1856, Eugenia dio a lluz al so únicu fíu, Lluis Napoleón, que recibió'l títulu de Príncipe Imperial. Gracies a la so guapura y elegancia, Eugenia contribuyó de forma destacada al encantu qu'esprendía'l réxime imperial. La so forma de vistir yera allabada y asonsañada en toa Europa. El so interés pola vida de la reina María Antonieta espandió la moda neoclásica, estilu bien popular mientres el reináu de Lluis XVI. Foi la persona con más condecoraciones de toa Francia, con 20 condecoraciones y títulos nobiliarios.
Participación política editar
Eugenia yera una muyer educada ya intelixente. Dempués de la nacencia del so fíu, el príncipe imperial, Eugenia decidió tomar parte activa na política del Segundu Imperiu. Fervosa católica, opúsose a la política del so home no tocante a Italia, y defendió los poderes y prerrogatives del Papa en dichu país. Desempeñó la rexencia del imperiu en trés causes: mientres les campañes d'Italia en 1859; mientres una visita del so home a Arxelia en 1865 y nos últimos momentos del Segundu Imperiu, yá en 1870.
La emperatriz Eugenia secundó les desafortunaes intervenciones esteriores del imperiu:
- La derrotada Invasión francesa de Méxicu que costó la vida al emperador Maximilianu I de Méxicu; la emperatriz vía na intervención en Méxicu la posibilidá d'instaurar un estáu católicu en Norteamérica, cortando'l pasu a los Estaos Xuníos protestantes y facilitando, por una especie de "efeutu dominó", l'apaición d'otres monarquíes conservadores y católiques, rexíes por príncipes europeos, en Centro-Suramérica.[3]
- La guerra escontra Prusia, que concluyó al añu siguiente cola derrota de Sedán. Tamién, equí, la so influencia aconseyando a Napoleón III contra Prusia (qu'entartallara a la "católica" Austria pocos años antes) foi decisiva, frente a la prudencia aconseyada pol Primer Ministru Émile Ollivier. Cúntase que la Emperatriz bailló d'allegría col so fíu, Napoleón Euxeniu Lluis Bonaparte, lo que fizo esclamar al marqués de Hertford (sicasí, bon amigu so): "¡Esta muyer llévanos a la ruina!"
En 1869 la emperatriz Eugenia asistió a la inauguración de la canal de Suez, construyíu pol so pariente Fernando de Lesseps. Coles mesmes, sofitó les investigaciones de Louis Pasteur, qu'acabaríen na vacuna contra la rabia.
Exiliu editar
Tres la cayida del Segundu Imperiu Francés, la familia exilióse a Inglaterra. A la muerte del emperador en 1873, Eugenia retiróse a una villa en Biarritz na que vivió alloñada de los asuntos de la política francesa. La so vida adquirió tintes de traxedia novelesca cuando'l so únicu fíu pereció en Sudáfrica (1879) a manes de los zulús.
Rellacionada xenealóxicamente cola Cá d'Alba, agospióse dacuando nel Palaciu de Liria de Madrid, na so Quinta de Carabanchel y nel Palaciu de Dueñas de Sevilla. Dalgunes de les sos pertenencies, como pintures y muebles, pasaron a manes de los Alba, como una semeya so pintáu por Winterhalter y otru de Goya, La marquesa de Lazán. Mientres les sos estancies n'España, yeren frecuentes les sos visites a la reina consorte Victoria Euxenia de Battenberg, de quien yera madrina de bautismu y bien amiga.
La ex emperatriz morrió a las ocho y media de la mañana del 11 de xunetu de 1920 a los 94 años nel Palaciu de Liria de Madrid, mientres una de les sos visites a España, el so país natal. La so muerte foi consecuencia d'un ataque d'uremia.
Darréu'l so cuerpu foi treslladáu en tren a París, acompañáu por una comitiva qu'incluyía al Duque d'Alba, el Duque de Peñaranda, les Duqueses de Tamames y Santoña y el Conde de Teba. El féretro foi recibíu na estación de Austerlitz polos Príncipes Murat, l'Embaxador d'España y miembros de la nobleza francesa y española que-y rindieron homenaxe mientres más de tres hores. Darréu'l cuerpu foi treslladáu a Le Havre y Farnborough so custodia del diplomáticu español Carlos de Goyeneche. La emperatriz foi soterrada na cripta imperial de l'Abadía de Saint Michael en Farnborough (Inglaterra), al llau del so maríu y del so fíu, que finara n'África.
Otros datos editar
- Cúntase que l'alcuentru ente Eugenia y el futuru Napoleón III nun foi casual. Según delles fontes, conociéronse gracies a la madre d'ella, quien deseyaba un bon partíu pa los sos dos fíes y esmolecióse por exhibiles nos actos sociales oportunos por que conocieren a los caballeros fayadizos.
- Eugenia, convertida yá n'emperatriz, ordenó a dellos arquiteutos y xardineros de la so corte la remodelación del castiellu de Arteaga, un edificiu de los sos ancestros na provincia de Vizcaya (España) y tamién restauró'l castiellu de Belmonte (Cuenca) propiedá de los marqueses de Villena.
- Utilizó frecuentemente como apellíu'l de Guzmán, en llugar de los de Palafox Portocarrero y Kirkpatrick, por ser titular del mayoralgu fundáu en 1463 por doña Inés de Guzmán sobre'l señoríu de Teba, alzáu a condáu en 1522 por Carlos V. Los sos sobrinos, fíos de la so hermana Francisca y del duque d'Alba, utilizaron como segundu apellíu'l de Portocarrero.
- Sol so auspicio cultivóse nuna finca de Baños de Rioxa (La Rioxa), de la cual yera propietaria, una viña qu'inda esiste col nome de La Emperatriz.
- Gracies a ella fíxose bien popular el veranéu en Biarritz cuando en 1854 construyó'l Palaciu na sablera güei día conocíu como Hotel du Palais.
Títulos y tratamientos editar
- 1826-1839: Doña Eugenia Palafox Portocarrero de Guzmán y KirkPatrick.
- 1839-1853: La so Excelencia Doña Eugenia Palafox Portocarrero de Guzmán y KirkPatrick, XVI condesa de Teba
- 1853-1870: La so Maxestá Imperial la emperatriz de los franceses (mientres dellos periodos emperatriz rexente)
- 1870-1920: La so Maxestá Imperial la emperatriz Eugenia de Francia.
Ancestros editar
Na cultura popular editar
La Emperatriz tamién foi conmemorada nel espaciu esterior: l'asteroide 45 Eugenia foi nomáu nel so honor, y la so lluna, Petit-Prince, n'honor al Príncipe Imperial.[4][5]
La película Violetas imperiales ta inspirada na so vida.
Tenía una amplia y única coleición de xoyes; la mayoría d'elles fueron más tarde propiedá de la brasilana Aimée de Heeren.[6][7]
Foi honrada por John Gould, que dio nome al palombu de la fruta de cabeza blanca, Ptilinopus eugeniae.
La elegancia llexendaria de la Emperatriz influyó enforma nel mundu de la moda. Llamáu asina pola Emperatriz, el sombreru Eugénie ye un estilu de sombreru de muyer inclináu y cola cayida sobre un güeyu; el cantu dóblase sópito a entrambos llaos nel estilu d'un adornu d'equitación, de cutiu con una llarga pluma d'avestruz.[8] El sombreru foi popularizáu pola estrella de cine Greta Garbo y na década de 1930 yeren histéricamente populares.[9]
Bibliografía editar
- Almudena de Arteaga, Eugenia de Montijo, Ediciones Martínez Roca, Barcelona, 2002 (ISBN 84-270-2750-8)
- Carmen Verlichak, Las diosas de la Belle Époque y de los 'años locos', Editorial Atlántida, Buenos Aires, 1996 (ISBN 950-08-1599-0)
- Claude Dufresne, Eugenia de Montijo, una española emperatriz de los franceses, Javier Vergara Editor S.A., Buenos Aires, 1990 (ISBN 950-15-0797-1)
- Geneviève Chauvel, Eugenia de Montijo, emperatriz de los franceses, Editorial Edhasa, 2000 (ISBN 84-395-9198-5)
- Hester W. Chapman, Eugenia de Montijo, Editorial de Ediciones Selectas S.R.L., Buenos Aires, 1963
Referencies editar
- ↑ 1,0 1,1 Afirmao en: Gemeinsame Normdatei. Data de consulta: 26 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ Identificador de persona en The Peerage: p4495.htm#i44946. Data de consulta: 7 agostu 2020.
- ↑ Histoire-Recherche: "Le réve mexicain de Napoléon III vire au cauchemar"
- ↑ Schmadel, Lutz D.; International Astronomical Union (2003). Dictionary of minor planet names (en n'inglés). Berlín, Nueva York: Springer-Verlag. páx 19. ISBN 978-3-540-00238-3.
- ↑ «Solar System Exploration: Asteroids – Moons». National Aeronautics and Space Administration. Consultáu'l 18 de setiembre de 2011.
- ↑ El collar de la margarita de la emperatriz Eugenia y Aimee de Heeren
- ↑ Aimee de Heeren llevando el collar Marguerite
- ↑ Calasibetta, Charlotte Mankey; Tortora, Phyllis (2010). The Fairchild Dictionary of Fashion. Nueva York: Fairchild Books. páxs. 249-250. ISBN 978-1-56367-973-5.
- ↑ Shields, Jody (1991). Hats: A Stylish History and Collector's Guide. Nueva York: Clarkson Potter. páx 43. ISBN 978-0-517-57439-3.
Enllaces esternos editar
Wikimedia Commons acueye conteníu multimedia sobre Eugenia de Montijo.- Napoléon III: En francés, sitiu dedicáu a Napoleón III
- Napoléon: En francés, biografía que contién enllaces a oxetos de arte del II Imperio y a las habitaciones de la familia imperial nas Tullerías (Muséu del Louvre).
Datos: Q157130- Multimedia: Eugénie de Montijo
