Wikipedia

Fueyes de fileres

Les fueyes de fileres (en catalán: Fulls de rengle o papers de rengle), son un tipu de documentu impresu cola representación de fileres de soldaos, procesiones, desfiles, séquitos, etc. El nome provién de la disposición alliniada en fileres de les figures qu'apaecen.

Fragmentu d'una fueya de filera de la Procesión de la Sangre de Barcelona col misteriu y congregantes del gremiu de revendedores. Sieglos XVIII - XIX.

Les fueyes de fileres fueron bien populares en Cataluña ente los sieglos XVIII y XX. Xunto colos aleluyas, la lliteratura de caña y cordel (los romances) y los gozos son unu de los elementos más carauterísticos de la cultura visual popular catalana. Les fueyes de fileres catalanes deriven de modelos europeos. Los grabaos representando séquitos, desfiles y procesiones esisten n'Europa dende a lo menos el sieglu XVII.

La particularidá de les fueyes de fileres catalanes ye que son impresos utilizando principalmente procedimientos xilográficos, ente que l'usu de la calcografía para esti tipu d'impresos ye bastante acutáu. Nel sieglu XIX adoptaron la litografía, la cromolitografía y otros procedimientos mecánicos d'estampación.

D'estos documentos, los más antiguos representen fileres de militares vistes frontalmente. Darréu afíxose esta fórmula gráfica para representar procesiones relixoses (Selmana Santa, Corpus), qu'aun así represéntense coles figures vistes de costáu.[1][2]

Les llámines impreses constaben de delles fileres que la xente retayaba y xuntaba para formar una sola tira (bien llarga y que xeneralmente s'endolcaba) que representaba tol séquitu. Por eso, les fueyes de fileres suelen ser consideraes como les precursores de los recortables. Dalgunos de los imprentadores que destacaron na edición d'esti tipu de documentos, sobresalen la casa Paluzié de Barcelona o los Grau de Reus.

L'archivu de Joan Amades caltién una importante coleición de fueyes de fileres.[3]

Referencies editar

  1. ↑ «Els fulls de rengle del fons Arxiu Joan Amades» (catalán) (24 d'ochobre de 2015). Consultáu'l 6 de febreru de 2018.
  2. ↑ Fons Amades (21 de febreru de 2014). «Els fulls de rengle del fons Arxiu Joan Amades» (catalán). Consultáu'l 6 de febreru de 2018.
  3. ↑ «L’arxiu» (catalán). Consultáu'l 6 de febreru de 2018.

Bibliografía editar

  • Joan AMADESː Apunts d'imatgeria popularː art popular. Palma de Mallorca / Barcelonaː Olañeta, 1983, ISBN 84-7651-507-3
  • Joan AMADES, Josep COLOMINES; Pau VILAː Els soldats i altres papers de rengles. Barcelonaː Orbis, 1933-1936
Sacáu de «https://ast.wikipedia.org/w/index.php?title=Fueyes_de_fileres&oldid=3995398»