Gran Depresión

La Gran Depresión foi una fonda depresión económica d'alcance qu'asocedió na década de 1930. La so estensión temporal foi distinta nos distintos países, pero na mayoría d'ellos entamó en 1929 y duró hasta finales de la década de 1930. Foi la más llarga y fonda de toles depresiones económiques del sieglu XX, y tamién la qu'afectó al mayor númberu de países.

Migrant mother (madre emigrante), semeya de Dorothea Lange (1936) na qu'aparez Florence Owens Thompson, ma de siete fiyos y trabayadora agrícola treshumante que se convirtió n'imaxe icónica de la Gran Depresión.

La depresión entamó nos Estaos Xuníos, cola cayida de los precios de les aiciones na bolsa de Nueva York qu'entamó alredor del 4 de setiembre de 1929, y convirtióse en noticia mundial col crack bursátil del 29 d'ochobre de 1929, conocíu de magar como Black Tuesday (Martes Prietu). Los efeutos de la depresión foron devastadores, tanto nos países ricos como nos probles. El productu internu brutu (PIB) mundial cayó un 15% ente 1929 y 1932. Los ingresos personales, la recaudación d'impuestos, los beneficios empresariales y los precios esbarrumbaron, y el comerciu internacional perdió un 50% del so valor. La tasa de paru alcanzó'l 25% nos Estaos Xuníos, y llegó al 33% en dellos países.

Les ciudaes de tol mundu, especialmente les mui dependientes de la industria pesada, sofrieron enforma, y la construcción paralizose cuasi completamente en dellos países. Los agricultores vieron como'l preciu de los cereales cayía un 60%, y les zones que dependíen económicamente de sectores como la minería y el tresporte, con demanda permenguada y escasos puestos de trabayu alternativu, foron les que peor lo pasaron.

Dellos países entamaron la so recuperación a mediaos de la década de 1930, pero en munchos otros los efeutos negativos de la Gran Depresión duraron hasta l'entamu de la Segunda Guerra Mundial. La eleición como presidente de Franklin Delano Roosevelt y l'establecimientu del conxuntu de midíes económiques conocíes como New Deal en 1932 foron el puntu de partida de la recuperación nos Estaos Xuníos. Por embargu, la perda de la financiación esterior, fundamental pa la economía alemana, nos entamos de la década de 1930, y la depresión económica que la siguió facilitaron l'aparición del nacionalsocialismu y la xubida al poder d'Adolf Hitler.

L'aniciu de la crisis

Los historiadores económicos suelen atribuyir l'aniciu de la Gran Depresión al repentinu colapsu de los precios de les aiciones na bolsa de Nueva York el martes 29 d'ochobre de 1929, pero hai dellos que, al contrariu, ven el crack de la bolsa más como un síntoma que como una causa de la Gran Depresión. Dafechamente, dempués del Black Tuesday l'optimismu duró entá un tiempu. John D. Rockefeller dixo que Estos son díes nos que munchos desanímense. Pero nos 93 años de la mio vida les depresiones llegaron y colaron. La prosperidá siempres volvió, y ha facelo otra vuelta. El mercáu de valores entamó a xubir otra vuelta nos primeros meses de 1930, llegando pa abril a los niveles de principios de 1929. Sicasí, esto yera entá un 30% menos del valor de la bolsa en setiembre de 1929.

Evolución del índiz Dow Jones en 1928-30.

El gobiernu y les empreses, tomaos en conxuntu, gastaron más na primer metada de 1930 que nel periodu correspondiente del añu anterior. Pero los consumidores, que munchos d'ellos perdieran munchu dineru na bolsa l'añu anterior, recortaron los sos gastos un 10%, y a esa situación xunióse la gran seca que sufrió la zona del Mediu Oeste, aú se concentraba la producción agrícola d'Estaos Xuníos, dende mediaos de la década de 1930. Pa esi momentu les tases d'interés cayeran a niveles baxos, pero la espectativa de deflación y el reparu de la xente a pedir dineru prestáu ficieron que cayeran enforma el gastu de los consumidores y la inversión Pa mayu de 1930 les ventes de coches cayeran perbaxu los niveles de 1928. Los precios empezaron a cayer, magar que los salarios caltuviéronse estables; pero en 1931 entamó una espiral deflacionista. Les condiciones foron peores nes zones rurales, pol desplome de los precios de los productos agrícoles, y nes zones mineres y madereres, pol aumentu del desemplegu y la falta d'alternatives pa los que quedaben en paru.

La decayencia de la economía d'Estaos Xuníos foi'l factor qu'emburrió a los otros países a la crisis nún primer momentu, y dempués foron les fortaleces o debilidaes internes de cada país les que ficieron qu'afrontara la crisis de meyor o peor manera. P'afrontar la crisis y apuntalar la economía interna los países entamaron polítiques proteicionistes, lo que produció una cayida entá mayor del comerciu a nivel mundial. Pa finales de 1930 entamó un descensu, sele pero continuu, de la economía mundial, que nun había tocar fondu hasta 1933.

Indicadores económicos

Cambios nos indicadores económicos de 1929 a 1932

	Estaos Xuníos	Gran Bretaña	Francia	Alemaña
Producción industrial	–46%	–23%	–24%	–41%
Precios al por mayor	–32%	–33%	–34%	–29%
Comerciu esterior	–70%	–60%	–54%	–61%
Desemplegu	+607%	+129%	+214%	+232%

Causes de la crisis

Les dos teoríes clásiques que tenten desplicar la Gran Depresión son la keynesiana (depresión dirixida pola demanda) y la monetarista. Arriendes d'elles hai otres teoríes heterodoxes que rechacen o consideren accidentales les esplicaciones de keynesianos y monetaristes.

Les teoríes de la depresión dirixida pola demanda afirmen que la perda a gran escala de la confianza provocó un descenso repentín del consumu y de la inversión. Una y bones la llercia y la deflación instaláronse, muncha xente pensó que si se manteníen alloñaos de los mercaos conseguiríen evitar pérdides mañores. Tener dineru acumuláu entamó a ser ventayosu pola cayida continua de los precios, y esto fizo que la demanda baxara y baxara.

Los monetaristes afirmen que la Gran Depresión entamó como una recesión económica normal, y que foi la reducción de la oferta monetaria la que fizo empeorar la situación económica, provocando una recesión qu'acabó llevando a la Gran Depresión.

Economistes y historiadores económicos divídense ente los que creen na esplicación monetaria tradicional, qu'afirma que la falta de dineru circulante foi la causa primaria de la Gran Depresioón, y los que sofiten la idea keynesiana de qu'una cayida nel gastu, y especialmente na inversión, foi la causa principal de la Gran Depresión. Anguaño la controversia ye menos importante, una y bones la mayoría sofita la teoría de la deflación de la deuda y la hipótesis de les espectativas que, sobro la base de la esplicación monetaria de Milton Friedman y Anna Schwartz, añade consideraciones non monetaries.

Hai dél consensu en considerar que la Reserva Federal d'Estaos Xuníos tenía que haber interrumpíu el procesu de deflación monetaria y colapsu bancariu. Si talo ficiera la recesión hubiera sío menos fonda y muncho más corta.

Teoríes clásiques sobro les causes de la crisis

Keynesiana

L'economista británicu John Maynard Keynes defendió, na so obra General Theory of Employment Interest and Money (Teoría xeneral del emplegu, el interés ya'l dineru), que'l descensu del gastu agregáu, esto ye, del valor de tolos bienes y servicios de la economía, contribuyó a un descensu de los ingresos personales y del emplegu, que quedaron bien perbaxu de la so media normal. Esto condució finalmente al equilibriu con niveles perbaxos d'actividá económica y gran desemplegu.

La idea básica de Keynes yera simple: pa que la xente tenga trabayu los gobiernos tienen qu'entrar en déficits presupuestarios cuando la economía dexa de crecer pa tomar el relevu del sector priváu, que nun tien estimulu ni capacidá, neses circunstancies, pa invertir lo suficiente como pa caltener la producción nún nivel normal y consiguir sacar así la economía de la situación de recesión. Los economistes keynesianos defenden el papel activu del estáu, al traviés del aumentu de los sos gastos en sectores que proporcionen munchos puestos de trabayu (infraestructures, por exemplu) y/o del descensu de los impuestos, como la receta pa sacar a los países de la recesión.

Según avanzaba la crisis Franklin D. Roosevelt apostó pola construcción d'infraestructures y los subsidios agrícoles, ente más coses, pa intentar reactivar la economía d'Estaos Xuníos, pero nunca dexó d'intentar cuadrar el presupuestu añal. Según los autores keynesianos esto ameyoró la economía, magar que Roosevelt nunca gastó lo suficiente como pa poder facer crecer la economía hasta l'entamu de la Segunda Guerra Mundial.

Monetarista

Los monetaristes siguen la esplicación de la causa de la crisis que desarrollaron Milton Friedman y Anna J. Schwartz. Ellos sostienen, na so obra A Monetary History of the United States (Historia monetaria de los Estaos Xuníos) que la Gran Depresión foi causada pola crisis bancaria que fizo quebrar un terciu de los bancos del país, pol descensu de la riqueza de los accionistes y, principalmente, por la contraición de la masa monetaria nún 35%. En conxuntu esto causó una cayida de los precios (deflación) d'un 33%. Al nun baxar los tipos d'interés, nin aumentar la base monetaria (cantidá de dineru en circulación nún país) nin inyectar liquidez nel sistema bancariu pa prevenir el so esbarrumbe la Reserva Federal provocó la tresformación de lo que yera una recesión más na Gran Depresión. Friedman afirmó que la recesión económica qu'entamó col crack de la bolsa hubiera sío una recesión más si la Reserva Federal tuviera reaccionao con firmeza escontra ella

La Gran Depresión dende'l puntu de vista monetariu. N'azul, PIB axustáu a dólares de 1996; en colloráu, índiz de precios; en verde, ufierta monetaria, y en gris númberu de bancos n'EEXX. Tolos datos nún indice axustáu en porcentaxe nel qu'al so valor en 1929 dáse-y el valor 100.

La Reserva Federal permitió que dellos grandes bancos -ente ellos el Bank of the United States, que la so quiebra n'avientu de 1930 considérase l'aniciu del colapsu bancariu- quebraran, lo que traxo la llercia y una cadena de quiebras de pequeños bancos llocales en mediu de la indiferencia de la Reserva Federal. Friedman sostiene que si la Reserva desarrollara un programa de préstamos d'emerxencia pa salvar a los bancos grandes de la quiebra, o si mercara bonos del gobiernu (deuda pública) nel mercáu pa llevar liquidez a esti aumentando la cantidá de dineru en circulación dempués de la cadena de quiebres de los primeros bancos importantes, munchos otros nun tendríen quebrao y la masa monetaria nun tendría cayío tan fonda y rápidamente como lo fizo. Cola cantidá de circulación permenguada los empresarios nun yeren quién a consiguir nuevos préstamos nin se-yos refinanciaben los que ya teníen, y víense asina forciaos a dexar d'invertir. Esta interpretación culpa a la Reserva Federal, y especialmente a la so oficina en Nueva York, de la crisis por inaición.

Esplicación actual de consensu

Les principales escueles de pensamientu económicu actuales coinciden en que'l gobiernu d'un país tien d'esforciase pa mantener los agregaos macroeconómicos interconectaos -ufierta monetaria y/o demanda agregada- nuna senda de crecimientu estable. Cuando hai amenaza de depresión económica los bancos centrales tienen que inyectar liquidez nel sistema bancariu, y el gobiernu tien de recortar impuestos y aumentar los sos gastos pa caltener estable la cantidá de dineru en circulación y sostener la demanda nominal total. Al entamu de la Gran Depresión la mayoría los economistes creyíen na llei de Say y nel poder autorregulador del mercáu, y nun foron quién a desplicar por qué la depresión tenía sío tan fonda.

La idea del liquidacionismu, esto ye, qu'había permitise a los bancos que quebraran que ficieran talo, yera una posición principalmente sostenida pola escuela austriaca. Según esa visión, la depresión ye una bona medicina. El beneficiu de la depresión vién-y de que provoca la liquidación d'inversiones fallíes y de negocios y empreses que quedaron anticuaos per aciu del desarrollu teunolóxicu, y eso llibera factores de producción (capital y trabayu) d'estos sectores improductivos pa emplegalos notros sectores económicos teunolóxicamente más dinámicos. Acordies colos autores d'esta escuela inclusive anque l'axuste de la economía traiga bancarrotes masives ha de permitise que seya asina, pues eso ye bono pa la economía. Los historiadores económicos cada vegada tán más d'alcuerdu en que'l siguimientu d'esta tesis liquidacionista polos responsables de la Reserva Federal produció unes consecuencies desastroses.

Al respectu de les polítiques económiques del presidente Herbert Hoover, dellos economistes como Barry Eichengreen y J. Bradford DeLong faen notar que'l presidente tentó de caltener el presupuestu estatal equilibráu hasta 1932, cuando perdió la confianza nel so Secretariu del Tesoru, Andrew Mellon, y destituyolu del cargu. Pese a lo que los liquidacionistes esperaben y teníen predecío, una gran parte del stock de capital nun foi reinvertíu demientres los años de la Gran Depresión; simplemente desapaeció. Un estudio d'Oliver Blanchard y Lawrence Summers demostró que la recesión causó una cayida de l'acumulación neta de capital, que taba en 1933 perbaxu de los niveles de 1924. Milton Friedman dixo que'l liquidacionismu yera namái cháchara peligrosa, y escribió:

Creo que la teoría austriaca tien sío perdañina. Si vuelves a los años 30, que ye un momentu clave, atoparás ellí a los economistes austriacos sentaos en Londres, Friedrich Hayek y Lionel Robbins, y diciéndote que lo único que ties de facer ye dexar que'l mundu se venga abaxu, y dexar que les coses s'arreglen por sigo mesmes, y que nun puedes face nada pa igualo porque tolo que fagas fará que la situación seya pior... yo creo que, sofitando esa política de non intervención neto en Gran Bretaña que n'Estaos Xuníos, ellos foron dañinos

Otres esplicaciones non monetaristes modernes

La esplicación monetaria tien dos debilidaes. La primera ye la so incapacidá pa esplicar por qué la demanda de dineru cayía más rápidamente que la ufierta durante la recesión inicial de 1930-31. La segunda ye que tampoco esplica por qué en marzu de 1933 entamó la recuperación magar que les tases d'interés a cortu plazu siguíen cercanes a cero y la ufierta monetaria siguía cayendo. Eses preguntes tenten de ser contestaes por esplicaciones modernes que parten de la esplicación monetaria de Friedman y Schwarz y-y añaden factores non monetarios.

a) Deflación de la deuda

Irving Fisher defende que'l factor principal que llevó a la Gran Depresión foi un círculu viciosu de deflación y sobreendeudamientu creciente, y alcontró nueve factores que, interactuando en condiciones de deuda escesiva y deflación, crearon los mecanismos propicios pa la quiebra económica. La cadena de socesos ye la siguiente:

• 1. Liquidación de la deuda y ventas a la baxa.
• 2. Contraición de la ufierta monetaria por impagu de les hipoteques bancaries.
• 3. Cayida nel nivel del preciu de los activos.
• 4. Una cayida entá mayor nel valor netu de les empreses, lo que precipitó les bancarrotes.
• 5. Cayida nos beneficios.
• 6. Descensu de la producción, del comerciu y del emplegu.
• 7. Pesimismu y perda de confianza.
• 8. Acaparamientu de dineru.
• 9. Cayida de les tases nominales d'interés y un ascensu de les tases d'interés axustaes a la inflación.

Mientres el crash de 1929 que precedió a la Gran Depresión, los requisitos de marxen yeren namái del 10%. Esto ye, los bancos prestaben nueve dólares por cada dolar qu'un inversor depositara. Cuando'l mercáu fundió los corredores trataron de recuperar estos préstamos, pero la xente nun pudo pagalos. Los bancos entamaron a quebrar porque los deudores dexaron de pagar y los depositantes foron en masa a retirar los sos depósitos, xenerando llercies bancarios consecutivos nún bancu tras otru. Les garantíes gubernamentales y les regulaciones de la Reserva Federal destinaes a prevenir esi tipu de llercies nun s'usaron o nun funcionaron, y les quiebres bancaries causaron la perda de miles de millones de dólares n'activos.

Depositantes protestando enfrente la sede del Bank of United States tres de la so quiebra en 1931.

Les deudes pendientes, amás, aumentaron enforma en valor relativu, porque los precios y los ingresos cayeron un 20-50% pero les deudes siguíen teniendo'l mesmu valor nominal. Dempués del llercia de 1929, y mientres los diez primeros meses de 1930, 744 bancos quebraron nos Estaos Xuníos (nel conxuntu de la década de los 30 quebraríen un total de 9.000). Pa abril de 1933 7.000 millones de dólares en depósitos taben conxelaos en bancos quebraos o que quedaran ensin llicencia dempués de la promulgación de la Emergency Banking Act en marzu d'esi añu. Les quiebres encadenábense cuando los banqueros reclamaben el pagu d'hipoteques que los prestatarios nun podíen pagar. La perspeutiva de beneficios futuros escasos, d'otra banda, enlenteció o detuvo completamente la inversión na industria y la construcción; y la perspeutiva d'impagos cada vegada mayores fizo que los bancos que sobrevivían foran cada vegada más conservadores a la hora de dar préstamos. Dedicáronse a aumentar les sos reserves de capital y dexaron d'emprestar, y eso intensificó la presión deflacionista. La economía entró nún circulu viciosu que fizo la recesión cada vez más fonda.

La liquidación de la deuda nun podía siguir el ritmu de la cayida de precios que causó. La búsqueda masiva de liquidez aumentó'l valor de cada billete de dólar que se tenía respectu al valor de los activos financieros, que la so cotización cayía de siguío. Asina, los esfuercios de los individuos pa disminuyir la cantidá de dineru que debían facíen qu'esta aumentara. Anque parezca chocante, cuantes más pagaben los deudores más debíen. Esti procesu convirtió en 1933 nuna gran depresión lo que pa 1930 entá yera una recesión ente otres más.

La teoría de Fisher, cuando foi enunciada, nun foi mui influyente. Los sos críticos argumentaben que'l círculu deuda-deflación nun yera más qu'una redistribución de dinero ente dos grupos, el de los deudores y el de los acreedores, y que les redistribuciones nun teníen por qué tener efeutos macroeconómicos significativos.

A partir de la hipótesis monetaria de Friedman y Schwartz y de la hipótesis de Fisher Ben Bernanke alcontró otra vía alternativa na que la crisis financiera afectó a la producción. Parte del argumentu de Fisher de que los grandes descensos nel nivel de precios y nos ingresos nominales de la xente llevaron a aumentar los niveles reales de deuda, y de qu'esto aumentó les tases d'insolvencia y nesa situación baxaba la demanda agregada y esto provocaba una nueva deflación nos precios que zarraba'l círculu viciosu de la deuda y la deflación. Según Bernanke un pequeñu descensu nel nivel de los precios fai pasar riqueza de manes de los deudores a la de los acreedores ensin dañar la economía, pero cuando la deflación ye importante la cayida nel preciu de los activos axuntada cola quiebra de los deudores provoca un descensu del valor de los activos nos balances bancarios. Los bancos reaccionan endureciendo les condiciones pa dar préstamos, y esto provoca una contraición del créditu que daña enforma la economía. La falta de créditu fai baxar el consumu y la inversión, y esto provoca un descensu de la demanda agregada qu'ayuda tamién a intensificar la espiral deflacionista .

b) La hipótesis de les espectatives

Producción industrial de los Estaos Xuníos (1928-1939).

De magar la corriente principal del pensamientu económicu allíniase colo que se conoz como nueva síntesis neoclásica, les espectatives son un elementu central de los modelos macroeconómicos. Según Peter Temin, Barry Wigmore, Gauti B. Eggertsson y Christina Romer la clave pa la recuperación y el posterior final de la Gran Depresión vieno del bon manexu de les espectatives de la población. La tesis básase na observación de que dempués de dellos años de deflación y una recesión perfonda dellos indicadores económicos importantes punxéronse en positivu xustamente en marzu de 1933, cuando Franklin Delano Roosevelt xubió al poder. Los precios de los artículos de consumo pasaron de la deflación a una sele inflación, la producción industrial tocó fondu esi mes de marzu, y les inversiones dobláronse en cantidá esi añu respectu al anterior, con un puntu d'inflesión en marzu. Nun hai fuercies monetaries qu'espliquen esi cambéu. La ufierta monetaria siguía cayendo, y les tases d'interés a cortu plazu siguíen peraveraes a cero. Primeru d'esi mes de marzu de 1933 la xente esperaba que la deflación y la recesión siguieran, polo que nin siquiera coles tases d'interés a cero foi posible l'estímulu de la inversión. Pero cuando Roosevelt anunció grandes cambios na política del país la xente entamó a creyer na posibilidá del crecimientu económicu, y eses espectatives, col tipu d'interés a cero, consiguieron estimular la inversión. Los cambeos de la política monetaria y fiscal de Roosevelt axudaron a facer creyibles los sos oxetivos de política económica, y les espectatives d'aumentar los ingresos futuros y de que los precios xubieran estimularon la demanda y la inversión. L'analís suxer que la eliminación de dogmas políticos como'l gold standard (el sistema que facía depender la cantidá de dineru circulante de la cantidá de reserves d'oru del país, pol cual teóricamente podía cambiase'l dineru), la necesidá de tener un presupuestu equilibráu en tiempu de crisis o la necesidá de que'l estáu federal tuviera'l menor tamañu posible provocaron un gran cambiu nes espectatives al que dellos autores atribúin ente'l 70-80% de la responsabilidá del aumentu de producción y precios que se produció ente 1933 y 1937. Calcularon tamién que de nun haber esi cambéu y continuaran les polítiques hooverianes la economía tendría siguío cayendo en 1933, y la producción industrial tendría cayío, pa 1937, un 30% sobre'l nivel de 1933

La recesión de 1937-38, que frenó la salida de la Gran Depresión, esplícase según esta teoría pol miéu de la población a que los suaves axustes de la política fiscal y monetaria del añu 1937 foran los primeros pasos pa restaurar les polítiques anteriores a marzu de 1933.

Teoríes heterodoxes

Anguaño les esplicaciones contemporánees a la crisis de les escueles austriaca y marxista nun tienen sofitu ente la comunidá académica, como tampoco lu tienen otres esplicaciones alloñaes de la que viéremos darréu. Sicasí, paga la pena comentales.

Escuela austriaca

Ente los teóricos de la escuela austriaca d'economía qu'escribieron sobro les causes de la Depresión tenemos al austriacu Friedrich Hayek y al d'Estaos Xuníos Murray Rothbard, autor de America's Great Depression (1963). Según la so visión, que coincide nesto cola de los monetaristes, la Reserva Federal, que fora creada en 1913, tien muncha de la culpa, pero la causa principal de la Depresión foi la espansión de la ufierta monetaria na década de 1920, que llevó a un espoxigue económicu impulsáu pol créditu que yera insostenible nel tiempu.

Esta inflación de la ufierta monetaria provocó un aumentu insostenible de los precios de los activos (aiciones y bonos) y de los bienes de capital. Cuando la Reserva Federal quixo facer un axuste, en 1928, yá yera tarde, y na visión d'esta escuela foi inevitable qu'hubiera una contraición económica significativa. En febreru de 1929 Hayek publicó un ensayu prediciendo qu'esa forma d'actuar de la Reserva Federal había causar una crisis que diba entamar nos mercaos d'aiciones y del créditu.

Rothbard afirma tamién que'l apoyu del gobiernu a les empreses fallides y el caltenimientu de los salarios perriba de los sos valores de mercáu prollongaron la Depresión. Hayek, al contrariu, xunióse na década de 1970 a los monetaristes na so convicción de que la Reserva Federal contribuyó a allargar la Depresión al permitir que la ufierta monetaria menguara enforma nos primeros años de la crisis. Lo que nun quita pa que, en 1932 y 1934, tuviera criticao a la Reserva Federal y al Bancu d'Inglaterra por nun tener una postura más contraccionista al respective.

Escuela marxista

Karl Marx vía que la recesión y la depresión económica yeren inevitables nel capitalismu de llibre mercáu, una y bones nun hai más restricciones a l'acumulación de capital aparte del propiu mercáu. Na visión marxista el capitalismu tiende a crear acumulaciones de riqueza descontrolaes, lo que provoca una sobreacumulación de capital que lleva inevitablemente a la crisis. Una crisis qu'aparez cíclicamente y ye una carauterística regular del patrón de crecimientu económicu y crisis que los marxistes llamen desarrollu caóticu del capitalismu. Ye un dogma, pa munchos marxistes, qu'eses crisis son inevitables y han ser cada vegada más graves hasta que les contradicciones inherentes en la incompatibilidá ente'l mou de producción y el desarrollu de les fuercies productives algame un puntu final de quiebra del sistema. Nesta lóxica, los periodos de crisis son propicios pa intensificar la llucha de clases y forciar el cambiu social.

Teoría de la desigualdá

Dos economistes de la década de 1920, Waddill Catchings y William Trufant Foster, popularizaron una teoría qu'influyó en muchos llexisladores, y que defendía que la economía producía más de lo que consumía porque los consumidores nun teníen ingresos suficientes. Poro, fora la desigual distribución de la riqueza na década de 1920 la que causara la Gran Depresión.

Según esta visión, la causa primera de la Gran Depresión foi la sobreinversión na capacidá de la industria pesada, que nun se correspondía con un aumento nin de salarios nin de beneficios nos pequeños negocios independientes (comerciu, granxes...). La solución al problema yera la inyeición de dineru nos bolsillos de los consumidores al traviés de polítiques gubernamentales. Había que redistribuir la capacidá de compra, manteniendo la base industrial y la so capacidá productiva pero inflando precios y salarios p'aumentar la capacidá de gastu de los consumidores. Foster y Catchings recomendaben, pa consiguilo, el desarrollu de grandes programes de construcción d'infraestructures a nivel estatal y federal, un conseyu que había ser puestu en práutica por Hoover y especialmente Roosevelt.

Teoría de la sobreproducción

Hai qu'enfotase enforma en recordar que les tendencies [de productividá, producción y emplegu] que tamos describiendo yeren tendencies estructurales que yeren yá perevidentes primero de 1929, y que nun son en denguna manera el resultáu de la presente depresión, nin tampoco de la Gran Guerra. Al contrariu, la depresión na que vivimos anguaño ye'l resultáu d'estes tendencies a llargu plazu

M. King Hubbert

Les trés décades primeres del sieglu XX foron un tiempu de gran aumentu de la producción económica, secundariu a la lletrificación, el desarrollu de la producción en masa y la mecanización de l'agricultura, que provocaron un gran crecimientu de la productividá que produció un escesu de capacidá productiva que se consiguía cada vegada con menos trabayadores. Esi gran ascensu de la productividá de les grandes industries del país y los sos efeutos sobre la producción, los salarios y la xornada llaboral foron estudiaos por Spurgeon Bell en 1940 nel so llibru Productivity, Wages and National Income (Productividá, salarios ya ingresu nacional).

Causes del empeoramientu global de la depresión

El patrón oru (gold standard) foi'l mecanismu primariu de tresmisión a otros países de la Gran Depresión. Nómase patrón oru al sistema monetariu qu'afita'l valor de la unidá monetaria d'un país en rellación con una cantidá determinada d'oru. Esti sistema yera'l vixente en tol mundu na década de 1920, y obligó a qu'inclusive aquellos países que nun sofrieron quiebres bancaries nin una contraición de la masa monetaria nún primer momentu foran forciaos a adoptar polítiques deflacionistes cuando les altes tases d'interés nos países que yá les adoptaran provocaron una salida d'oru nos países con tases d'interés baxes.

El patrón oru

Dalgunos estudios económicos tienen señalao que igual que la recesión espardióse per ende por culpa de la rixidez del patrón oru, foi la suspensión de la convertibilidá n'oru, o la devaluación de les monedes en rellación con esi patrón, lo que más axudó a que la recuperación fora posible.

Comparanza de la fondura de la depresión en diferentes países en función del momentu del so abandonu del patrón oru.

Toles monedes importantes del mundu abandonaron el patrón oru demientres la Gran Depresión. La primera en facelo foi la llibra esterlina británica. Pa enfrentar los ataques especulativos sobro ella, que taben dexándolu ensin reserves, el Bancu d'Inglaterra decidió en setiembre de 1931 dexar de cambiar billetes de llibra por oru, y la moneda entamó a flotar nos mercaos internacionales de divises. Esi mesmu añu Xapón y los países escandinavos abandonaron el patrón oru esi mesmu añu. Italia o los Estaos Xuníos siguieron nelli hasta 1932 o 1933. De magar, namái los países del nomáu "bloque del oru" (Francia, Polonia, Bélxica y Suiza) caltuvieron so usu hasta 1935-36.

Análisis económicos posteriores amuesen que la rapidez cola que los países abandonaron el patrón oru prediz de manera bastante fiable lo ceo que se recuperaron. Asina, Gran Bretaña y Escandinavia, que lu dexaron en 1931, recuperáronse bien primeru que Francia o Bélxica, que lo caltuvieron muncho más tiempu. Y países como China, que teníen un patrón plata, evitaron casi por completu la depresión. La correlación ente'l abandonu tempranu del patrón y la severidá de la crisis y la rapidez en salir de la crisis tien demostráose pa docenes de países, incluyíos los países en desarrollu, y val pa desplicar en parte el por qué de la diferente duración de la depresión en países estremaos.

El colapsu del comerciu internacional

Munchos economistes tienen afirmao que la drástica reducción del comerciu internacional dempués de 1930 axudó a facer más fonda la depresión, especialmente nos países mui dependientes del so comerciu esterior. La mayoría los economistes ya historiadores culpen en parte del colapsu a la llei Hawley-Smoot, aprobada'l 17 de xunu de 1930, qu'elevó unilateralmente los aranceles d'Estaos Xuníos a los productos importaos. La reaición, en forma de lleis de conteníu similar, d'otros países fizo que la decayencia del comerciu fora perimportante. Les esportaciones d'Estaos Xuníos, por exemplu, reduciéronse en valor, en 1933, a una tercera parte de les de 1929, y el preciu per unidá esportada cayó amás alredor d'un tercio, especialmente nel casu de materires primes como'l trigu, l'algodón, el tabacu y la madera.

El comerciu esterior, sicasí, yera una parte pequeña del conxuntu de l'actividá económica de los Estaos Xuníos, y amás concentrábase en perpocos sectores, y especialmente na agricultura, pero pa otros países más dependientes del comerciu internacional l'espoxigue del proteicionismu foi perxudicial enforma.

La salida de la Depresión

Na mayoría los países la recuperación económica entamó en 1933. Pese a ello, el PNB (Productu Nacional Brutu) de los Estaos Xuníos, por exemplu, nun había recuperar los sos niveles de 1929 nuna década, y el paru, d'un 25% en 1933, tovía afectaba en 1940 al 15% de la población.

Nun hai alcuerdu ente los economistes sobre cuálu foi'l motivu qu'emburrió la recuperación económica que vivió'l país demientres los años de presidencia de Roosevelt, ni tampoco'l de la recesión de 1937 que lu interrumpió. La visión más estendida ente los especialistes indica que les polítiques del New Deal de Roosevelt provocaron o aceleraron la recuperación, magar que nunca foron lo suficientemente agresives como pa sacar totalmente de la recesión a la economía del país. Dalgunos economistes apunten tamién a los efeutos positivos de les espectatives de reflación -vuelta de los precios al so nivel previu dempués d'un periodu de deflación- y l'ascensu de les tases d'interés nominales que les pallabres y les aiciones de gobiernu de Roosevelt auguraben, y atribuin a la retirada d'eses polítiques reflacionaries la recesión de 1937. Una de les lleis que revirtieron el procesu de reflación foi la llei bancaria (Banking Act) de 1935, qu'obligó a los bancos a aumentar les sos reserves; esto produció una contraición de la masa monetaria que frenó la recuperación. Sicasí, el PNB volvió a la so tendencia creciente yá en 1938.

Según la economista Christina Romer el crecimientu de la oferta de dineru provocada pola entrada de grandes cantidaes d'oru nel circuitu monetariu del país foi un elementu fundamental na recuperación de la economía d'Estaos Xuníos. Esa llegada d'oru debióse en parte a la devaluación del dólar, pero tamién al deterioru de la situación política n'Europa. Friedman y Schwartz, pela so banda, atribuyeron la recuperación a factores monetarios, y defenden que foi interrumpíu y retardáu pol mal manexu de la política monetaria de la Reserva Federal. Ben Bernanke, presidente de la Reserva Federal ente 2006 y 2014, coincidía na afirmación de que los factores monetarios tuvieron gran importancia tanto na decayencia de la economía mundial como na so recuperación. Pero tamién piensa que los factores políticos ya institucionales tuvieron un papel importante, especialmente no que cinca a la reconstrucción y reestructuración del sistema financieru, y cree pernecesario esaminar la Gran Depresión dende una perspeutiva internacional y non puramente d'Estaos Xuníos.

El papel de les muyeres

Familia emprobecida a la puerta'l chamizu aú vivíen n'Oklahoma (semeya de Dorothea Lange, 1936).

Les muyeres, dedicadas mayormente a los llabores domésticos, nun tuvieron falta de trabayu demientres la depresión. Al contrariu, la falta d'ingresos constantes na unidá familiar en munches cases fízo-yos cada vegada más difícil consiguir vistir, alimentar y procurar cuidaos médicos a los de so. Les tases de natalidá cayeron perende, y la xente retrasó pa tiempos meyores la decisión de tener fíos. La tasa menguó nos catorce mayores países occidentales un 12%, pasando de 19,3 nacimientos por cada mil habitantes en 1930 a 17 en 1935, y en Canadá, la metá de les muyeres católiques contradicieron les enseñanzas de la Ilesia y usaron contraceptivos pa evitar l'embarazu.

Denyse Baillargeon, na so obra Making Do: Women, Family and Home in Montreal during the Great Depression, describe cómo les ames de casa d'una ciudá industrial moderna se las amañaron nuna dómina de falta de dinero y recursos. Bien de veces, cuando yeren de clase baxa, repitieron lo que ficieran les sos mas pa sacales a ellas alantre na infancia: cocinaben xinta de pocu costu (sopes, llegumes...), mercaben los cortes más baratos de carne, aprovechaben los restos del asáu dominical pa facer bocadillos y sopa... Cosíen y remendaben la ropa, intercambiaben lo que-yos sobraba coles vecines, calentaben menos la casa que primero de la depresión... y dexaben la renovación del mobiliariu y los electrodomésticos pa tiempos meyores. Toa esta actividá facía de les muyeres, según Baillargeon, un pilar fundamental de la economía familiar. Munches de les sos informantes, amás, tamién teníen trabayos temporales fuera de casa, alquilaben habitaciones a güespedes o llavaben ropa o cosíen a cambiu de dineru o de daqué que necesitaran y pudieran consiguir.

L'efeutu de la Segunda Guerra Mundial na recuperación económica

La falta de homes pa trabayar permitió la entrada de la muyer, demientres la guerra, en sectores económicos d'emplegu tradicionalmente masculín.

La opinión más espardida ente los historiadores ye la de que la Gran Depresión finó col entamu de la Segunda Guerra Mundial. Munchos economistes creyen que'l gastu gubernamental p'atender les necesidaes béliques provocó, o a lo menos aceleró, la recuperación de la depresión, magar que ye cierto que hai dellos otros que-y quiten importancia como factor causal de la recuperación. Lo que dengún niega, sicasí, ye que polo menos axudó al facer menguar el paru

La política de rearme que precedió la llegada de la guerra axudó a estimular les economíes europees dende 1937. Pa esi añu el paru tenía baxáu n'Inglaterra a 1,5 millones de persones, y desapaeció dempués de l'aniciu de la guerra. Nos Estaos Xuníos la entrada en guerra en 1941 eliminó finalmente los efeutos económicos de la Gran Depresión, y colocó la tasa de paru perbaxu'l 10%. El masivu gastu armamentísticu fizo doblarse la tasa de crecimientu económicu, acabando col paru y faciendo que los empresarios, escaeciendo la creciente delda nacional y los altos impuestos, ficieran por renovar les sos empreses pa consiguir los contratos gubernamentales.

Bibliografía sobre la Gran Depresión

N'inglés

• Ambrosius, G., y W. Hibbard, A Social and Economic History of Twentieth-Century Europe (1989)
• «The Macroeconomics of the Great Depression: A Comparative Approach». Journal of Money, Credit, and Banking (Blackwell Publishing) 27 (1):  páxs. 1–28. 1995. doi:10.2307/2077848. https://fraser.stlouisfed.org/scribd/?item_id=2399&filepath=/docs/meltzer/bermac95.pdf. 
• Brown, Ian. The Economies of Africa and Asia in the Iinter-war Depression (1989)
• Davis, Joseph S. The World Between the Wars, 1919–39: An Economist's View (1974)
• Drinot, Paulo, y Alan Knight (ed.). The Great Depression in Latin America (2014)
• Eichengreen, Barry. Golden Fetters: The gold standard and the Great Depression, 1919–1939. 1992.
• Eichengreen, Barry, y Marc Flandreau. The Gold Standard in Theory and History (1997)
• Feinstein. Charles H. The European Economy between the Wars (1997)
• Friedman, Milton, y Anna Jacobson Schwartz. A Monetary History of the United States, 1867–1960 (1963). Obra cimera de la interpretación monetarista sobro l'orixe de la Depresión.
• Galbraith, John Kenneth, The Great Crash, 1929 (1954),
• Garraty, John A. The Great Depression: An Inquiry into the causes, course, and Consequences of the Worldwide Depression of the Nineteen-Thirties, as Seen by Contemporaries and in Light of History (1986)
• Garraty John A. Unemployment in History (1978)
• Garside, William R. Capitalism in Crisis: international responses to the Great Depression (1993)
• Glasner, David (ed.). Business Cycles and Depressions (Routledge, 1997), 800pp.
• Goldston, Robert, The Great Depression: The United States in the Thirties (1968)
• Haberler, Gottfried. The World Economy, money, and the great depression 1919–1939 (1976)
• Hall Thomas E., y J. David Ferguson. The Great Depression: An International Disaster of Perverse Economic Policies (1998)
• Kaiser, David E. Economic diplomacy and the origins of the Second World War: Germany, Britain, France and Eastern Europe, 1930–1939 (1980)
• Kehoe, Timothy J., y Edward C. Prescott (ed.). Great Depressions of the Twentieth Century (2007)
• Kindleberger, Charles P. The World in Depression, 1929–1939 (3ª ed., 2013)
• Konrad, Helmut y Wolfgang Maderthaner, (ed.). Routes Into the Abyss: Coping With Crises in the 1930s (Berghahn Books, 2013), 224 pp. 
• Madsen, Jakob B. "Trade Barriers and the Collapse of World Trade during the Great Depression", Southern Economic Journal, Southern Economic Journal (2001) 67#4 pp:848–868. Disponible online en JSTOR.
• Markwell, Donald. John Maynard Keynes and International Relations: Economic Paths to War and Peace, Oxford University Press (2006).
• Mitchell, Broadus. Depression Decade: From New Era through New Deal, 1929–1941 (1947), 462pp.
• Mundell, R. A. "A Reconsideration of the Twentieth Century", The American Economic Review Vol. 90, No. 3 (Jun., 2000), pp. 327–340 online version
• Psalidopoulos, Michael (ed.). The Great Depression in Europe: Economic Thought and Policy in a National Context (Athens: Alpha Bank, 2012). ISBN 9789609979368.
• Romer, Christina D. "The Nation in Depression," Journal of Economic Perspectives (1993)
• Rothermund, Dietmar. The Global Impact of the Great Depression (1996)
• Tipton, F., y R. Aldrich, An Economic and Social History of Europe, 1890–1939 (1987)

N'español

• Aldcroft, Derek H., "Historia económica mundial del siglo XX, De Versalles a Wall Street". 1919-1929, Barcelona 1985.
• Galbrarth J., "El crack del 29", Barcelona 1975.
• Hayek, Friedrich A. von. Contra Keynes y Cambridge. Unión, Madrid, 1996. ISBN 84-7209-308-5
• Keynes, John M. (Lord Tilton) La Teoría General del Empleo, el Interés y el Dinero. Aosta, Madrid, 1998. ISBN 84-88203-05-5
• Maddison, A. "La política económica y sus recultados en Europa" en C. M. Cipolla: "Historia económica de Europa, 5.2: El siglo XX", Barcelona, 1981.

Bibliografía contemporánea

• Keynes, John Maynard. "The World's Economic Outlook", The Atlantic (mayu 1932), Disponible online equí.
• League of Nations, World Economic Survey 1932–33 (1934)

Referencies

• Datos: Q8698
• Multimedia: Great Depression