Hal Smith (actor)
Hal Smith (24 d'agostu de 1916, Petoskey (es) 
– 28 de xineru de 1994, Santa Monica) foi un intérprete y actor de voz d'Estaos Xuníos. Conocíu sobremanera por interpretar a Otis Campbell nel programa de la CBS The Andy Griffith Show, tamién foi bien activu como actor de voz, encarnando a personaxes de producciones d'animación como Winnie The Pooh y The New Adventures of Winnie the Pooh, The Flintstones, Davey and Goliath, DuckTales, The Huckleberry Hound Show, Tiru Llocu McGraw, Gumby, The Jetsons, Don Gatu, Scooby-Doo, Where Are You! y Hong Kong Phooey, ente otros munches. Tamién foi conocíu ente los radioyentes pol so papel de John Avery Whittaker en Adventures in Odyssey.
Hal Smith | |
|---|---|
| Vida | |
| Nacimientu |
Petoskey (es) , 24 d'agostu de 1916[1] |
| Nacionalidá |
 Estaos Xuníos |
| Llingua materna | inglés |
| Muerte | Santa Monica, 28 de xineru de 1994[1] (77 años) |
| Sepultura | Woodlawn Memorial Cemetery |
| Causa de la muerte | infartu de miocardiu |
| Fíos/es | 1 |
| Estudios | |
| Estudios |
Massena Central High School (en) |
| Llingües falaes | inglés[2] |
| Oficiu | actor, actor de doblaxe, guionista, disc-jockey, actor de televisión, actor de voz, actor de cine |
| Serviciu militar | |
| Cuerpu militar | Exércitu de los Estaos Xuníos |
| Lluchó en | Segunda Guerra Mundial |
| Creencies | |
| Relixón | ilesia congregacional |
| IMDb | nm0808401 |
 | |
Primeros años
editarEl so nome completu yera Harold John Smith, y nació en Petoskey, Michigan, anque pasó bona parte de los sos primeros años en Massena, Nueva York. Graduáu na Massena High School en 1936, la so madre yera una cordurera, y el so padre trabayaba na fábrica local d'Alcoa.
Una vegada graduáu, Smith trabayó dende 1936 a 1943 como disc jockey y llocutor pa la emisora de radio WIBX en Utica (Nueva York). Mientres la Segunda Guerra Mundial sirvió nos Servicios Especiales d'Entretenimientu del Exércitu de los Estaos Xuníos, y rematada la guerra viaxó a Hollywood, actuando en munchos shows televisivos, ente ellos I Married Joan, Fury, The People's Choice, The Texan, Rescue 8, Dennis the Menace, The Adventures of Ozzie and Harriet, The Donna Reed Show, National Velvet, y The Red Skelton Show.[3]
Carrera
editarThe Andy Griffith Show
editarEl personaxe televisivu más recordáu de Smith foi Otis Campbell, el borrachu de The Andy Griffith Show, qu'apaeció mientres gran parte de la trayeutoria de la serie dende 1960 a 1968. Na realidá, Hal Smith yera totalmente opuestu al personaxe, y na vida real, y según los sos amigos Andy Griffith y Don Knotts, él nun bebía. Otis dexó d'apaecer na serie escontra'l final de la mesma, yá que a los patrocinadores esmolecíalos la imaxe d'un personaxe alcohólicu.
Smith tamién foi Calver Weems na comedia de 1966 de Don Knotts The Ghost and Mr. Chicken, siendo'l so personaxe similar al Otis de l'anterior producción.
Una vegada más interpretó a Otis nel telefilme de 1986 Return to Mayberry. Más palantre, Smith utilizó al so personaxe n'anuncios comerciales de la organización Mothers Against Drunk Driving (MADD), al igual que nel videu musical d'Alan Jackson "Don't Rock the Juke Box".
Smith fixo un cameo como l'Alcalde de Boracho en The Race en 1965. Tamién foi Hans Spear en Hogan's Heroes, y nuevamente interpretó un cameo nel episodiu 19 de la primer temporada de Adam-12 (1969). A finales de los años 1960, Smith tuvo tamién un show mañaneru infantil na emisora televisiva KTLA, "The Pancake Man," patrocináu por IHOP. Retomó'l papel como "Kartoon King" nun episodiu de 1971 de la serie The Brady Bunch tituláu The Winner.
Actor de voz
editarA partir de finales de los años 1950, y con programes como The Huckleberry Hound Show y Tiru Llocu McGraw, Smith aportó a unu de los más prolíficos actores de voz de Hollywood, trabayando finalmente cola mayor parte de los grandes estudios y compañíes productores, ente elles Hanna-Barbera, Walt Disney Company, Warner Brothers, The Mirisch Corporation, y Sid and Marty Krofft. Ente les munches producciones nes que participó figuren The Flintstones, La Pantera Rosa, The Many Adventures of Winnie the Pooh, Mickey Mouse, Osu Yogi, y Looney Tunes.
En 1962 dio voz a Taurus na serie Space Angel, personaxe d'acentu escocés que, según el llibru Space Patrol, missions of daring in the name of early television, posiblemente dio a Gene Roddenberry la idea pa la figura del inxenieru de Star Trek, Mr. Scott. Smith tamién dio voz pal show Hong Kong Phooey, y en 1977 foi Grandpa Josiah nel especial televisivu d'animación Halloween Is Grinch Night. Nos años 1980 siguió como actor de voz, trabayando en Los Pitufos, La Navidá de Mickey, y en DuckTales.
Smith tamién dio voz al personaxe de Disney Goofy en finando Pinto Colvig en 1967. Amás, foi'l Uxu en tres producciones orixinales de Winnie the Pooh (Winnie the Pooh and the Honey Tree, Winnie the Pooh and the Blustery Day, y Winnie the Pooh and Tigger Too) y en The Many Adventures of Winnie the Pooh en 1977.
Na década de 1960 foi unu de los actores de voz de Hollywood más solicitaos. Dende 1959 a 1975 foi Goliath y otros munchos personaxes en Davey and Goliath, y ente 1960 y 1961 dio voz a Elmer Gurniador, en finando Arthur Q. Bryan. En 1963 foi Dr. Todd Goodheart, Belly Llaguna y Dr. Von Upp na serie d'animación de The Funny Company. Ente 1964 y 1966 dobló a Yappee nos curtios de Hanna-Barbera Yippee, Yappee and Yahooey. Amás, encarnó a Cosgoode Creeps, Rusti Shanks, Mr. Greenway y Mr. Bluestone en Scooby-Doo, Where are You!.
En 1981 retomó'l so papel de Uxu y dio voz a Winnie-the-Pooh nel curtiu Winnie the Pooh Discovers the Seasons, reemplazando a Sterling Holloway, que-y diera voz mientres munchos años. Dempués, en 1983, dio voz a otros dos personaxes en Winnie the Pooh and a Day for Eeyore, según na serie de Disney Channel Welcome to Pooh Corner. Nel programa televisivu The New Adventures of Winnie the Pooh (1988), Jim Cummings foi Pooh, ente que Smith siguió siendo'l Uxu. Dambos actores dacuando intercambiaben los sos papeles como Winnie the Pooh. En 1991 Smith dio voz a Philippe el Caballu nel filme de Disney Beauty and the Beast, según al caballu de Jafar en Aladdín.
A partir de 1987 dio vida al personaxe principal John Avery Whittaker nel drama radiofónicu d'Enfoque a la Familia Adventures in Odyssey. Foi responsable de bona parte del repartu, y siguió grabando episodios (más de 260) hasta unes poques selmanes enantes de finar, entá a pesar de que la so salú yera delicada. Otra de les sos últimes actuaciones foi'l papel de Joe Mcgee nel episodiu "The Old Man and the Sea Duck" de TaleSpin.
Smith tuvo tamién enforma trabayu interpretando a personaxes diversos n'anuncios publicitarios comerciales. Asina, collaboró en campañes de numberoses compañíes tales como 3 Musketeers, United Van Lines, Hickory Farms, Toyota, Xigante Verde, General Mills, Mattel, Kellogg's. Pizza Hut, Chicken of the Sea, Ivory soap, Doctor Ross dog food, Pioneer Chicken, Bell Telephone Company y otres.
Vida personal
editarSmith tuvo casáu con Louise C. Smith dende 1936 hasta la muerte d'ella en 1992.[4] Tuvieron un fíu llamáu Terry que finó en 1998. Tres la muerte de la so muyer, la salú de Smith empezó a deteriorase con rapidez. Los productores de "Adventures in Odyssey" llegaron inclusive a preparar el so personaxe pal momentu en que Smith finara.[5] Finalmente, el 28 de xineru de 1994 Hal Smith finó en Santa Monica, California, a los 77 años d'edá, aparentemente por causa de un infartu agudu de miocardiu.[6][7] Foi soterráu nel Campusantu Woodlawn Memorial de Santa Monica.
Referencies
editar- ↑ 1,0 1,1 Afirmao en: Find a Grave. Identificador Find a Grave: 1866. Apaez como: Harold Smith. Data de consulta: 9 ochobre 2017. Llingua de la obra o nome: inglés.
- ↑ Identificador CONOR.SI: 310998627. Afirmao en: CONOR.SI.
- ↑ (2004) Michaud, John D. III: More than Otis: Non Bull! A Salute to Hollywood Actor Hal J. Smith, 1st edition, Massena, New York: Stubbs Printing.
- ↑ «Louise C. Smith at Find A Grave».
- ↑ http://www.aiowiki.com/wiki/Hal_Smith
- ↑ «Hal Smith; Played Otis on Griffith Show». Los Angeles Times.
- ↑ «Hal Smith, The Friendly Drunk Otis On `Andy Griffith Show' In The '60S». Seattle Times (13 de febreru de 1994). Archiváu dende l'orixinal, el 2015-01-11. Consultáu'l 11 de xineru de 2015.
Enllaces esternos
editar- Hal Smith na Internet Movie Database (n'inglés)
- «Hal Smith». en Find a Grave. (n'inglés)
Datos: Q2713545
