José Ángel Fernández Villa

José Ángel Fernández Villa (xineru de 1943, Tiuya) ye un sindicalista y políticu asturianu, conocíu por haber sío secretariu xeneral del Sindicatu de los Obreros Mineros d'Asturies mientres 34 años. En 2018 foi condergáu a trés años de prisión y al pagu d'una multa de 24.000 euros por un delitu siguíu d'aprobación indebida con fondos del sindicatu mineru.

José Ángel Fernández Villa
miembru del Senáu español 30 xunetu 1999 - 9 xunetu 2003 Diputáu na Xunta Xeneral del Principáu d'Asturies 7 mayu 1989 - 27 mayu 2007
Vida
Nacimientu	Tiuya, xineru de 1943 (81 años)
Nacionalidá	España
Estudios
Llingües falaes	castellanu
Oficiu	políticu
Llugares de trabayu	Madrid
Miembru de	Unión Xeneral de Trabayadores
Creencies
Partíu políticu	Partíu Socialista Obreru Español

Biografía

Villa aprendió a socializarse nel chigre del so padre Casa Hermógenes, frecuentáu por numberosos mineros y sindicalistes y asina s'introdució nel mundu sindical. Según José Ramón Gómez Fouz, unu de los sos biógrafos, na so obra Clandestinos, apunta que Villa estudió'l bachiller n'Uviéu y fixo la mili nel cuartel del Milán. Con catorce años entra a trabayar nuna constructora y a los dieciséis ingresa nel pozu mineru Santolaya, afiliándose a la Unión Xeneral de Trabayadores y al Partíu Socialista Obreru Español.

Mientres la década de 1960 y principios del 70 ye escorríu y despidíu de dellos trabayos por motivos políticos. Esta versión contradizse totalmente cola de Gómez Fouz, que sostién que Villa abeyaba per na redolada de la organización anarquista de la CNT y militaba nes Comuñes Revolucionaries d'Aición Sindicalista (CRAS), esta postrera con cierta presencia en Llangréu y Xixón. De la mesma, foi acusáu de trabayar pa la policía secreta franquista, la Brigada Políticu-Social.

Fouz confirma qu'en 1969 foi despidíu de la mina y, dempués, atopa trabayu, por poco tiempu, en Montaxes Térmicos, de Xixón, d'onde tamién ye despidíu, llevándo-y el casu l'abogáu José Ramón Herrero Merediz. En 1972, trabaya en Duro Felguera, onde tamién ye despidíu. En 1973, trabayó nuna sidrería en Barcelona, ayudáu por un tíu so, onde según Fouz, "aportó a un gran escanciador". Según les confesiones que'l comisariu Claudio Ramos realizó a Fouz, Villa foi reclutado como collaborador de la policía naquella dómina, entrando a trabayar na mina La Colladona. De vuelta de Barcelona, tamién trabayó nel grupu siderúrxicu Ensidesa. En 1976, por cuenta de l'amnistía, torna a Hunosa, creando'l SOMA-UXT y fundando la Comisión de los 16. En 1978 ye escoyíu delegáu pol SOMA-UXT nes eleiciones nel pozu Candín y entra como miembru del Comité Confederal de la UXT, formando parte de la CECA. Miembru de la Comisión Executiva Rexonal de la Federación Socialista Asturiana.

En 1979 foi designáu secretariu xeneral del SOMA-UXT, cargu qu'ocupó hasta 2013.

Dende 1993 preside l'Institutu pa la Formación, Investigación, Documentación y Estudios Sociales (Infide). El 13 d'ochobre de 2009, recibe de mano del Ministru de Trabayu, Celestino Corbacho, la Medaya al Méritu nel Trabayu pol so llabor al frente del SOMA.

Encierre nel Pozu Barredo

El 23 d'avientu de 1991, trenta y seis sindicalistes, encabezaos por Villa y Antonio González Hevia, secretariu xeneral de CCOO de la minería, zarrar nel interior del pozu, na cuarta planta, en protesta pol Plan de reconversión industrial d'HUNOSA. Mientres duró l'encierre, nel esterior del pozu, en Mieres y, polo xeneral, n'Asturies, asocediéronse les movilizaciones en contra del plan. Los zarraos recibieron la visita de los secretarios xenerales d'UXT y CCOO, Nicolás Redondo y Antonio Gutiérrez, respeutivamente, en sofitu a les sos reivindicaciones. L'encierre remató'l 3 de xineru de 1992, colos zarraos aclamaos por un ensame que foi en manifestación a recibilos a la salida del pozu. L'encierre de Barredo marca'l fin d'una dómina y de una concepción d'Asturies, pos a partir d'esi momentu, el cayente llega hasta'l momentu actual, en que se ta viviendo'l zarru de les últimes esplotaciones, como mina La Camocha, Jovesa, mina Principáu y otres, mientres HUNOSA acomete la remodelación de los sos activos con diversos planes urbanísticos nes contornes mineres.

Cargos

En 1978 miembru de la Comisión Executiva Rexonal de la Federación Socialista d'Asturies. Ente 1979 y 1993 foi miembru de la Comisión Executiva Federal del PSOE. En 1993 preside l'Institutu pa la Formación, Investigación, Documentación y Estudios Sociales (Infide), unu de los proyeutos impulsaos pol SOMA na redolada sociopolítico de les cuenques mineres.

Senador per Asturies ente 1999 y 2003. Diputáu de la Xunta Xeneral del Principáu d'Asturies ente 1983 hasta mayu de 2007 de forma ininterrumpida.

Tuvo un papel fundamental dientro de les fuelgues mineres de la década de los ochenta n'Asturies.

Corrupción

N'ochobre de 2014 ye investigáu pola Fiscalía ante'l barruntu de despintar a Facienda 1,4 millones d'euros en acoyéndose a l'amnistía fiscal de 2012. Ante esti fechu foi espulsáu del PSOE y del SOMA.

El 12 d'abril de 2017, tres años y mediu d'investigación, la xuez remató la instrucción, considerando que los fechos investigaos pudieron ser constitutivos d'un delitu d'apropiación indebida de los fondos de del sindicatu SOMA-UGT. Nel autu, considera probáu que Fernández Villa ostentó hasta 2013 la máxima capacidá de toma de decisiones y representación llegal del sindicatu asumiendo la direición y el control de los medios humanu y económicu y "efectuando actuaciones empuestes a esviar fondos del sindicatu al so patrimoniu personal, según a destinar capital del sindicatu a finalidaes distintes de les mesmes" señala nel so autu.

El 20 de setiembre de 2018 foi condergáu a trés años de prisión, a una multa de 24.000 euros y a indemnizar al SOMA 431.330 euros. El tribunal que lu xulgó consideró demostráu que Fernández Villa utilizó la so "posición xerárquica" dientro del sindicatu p'apoderase de fondos del sindicatu la cuenta pa constituyir un "delitu de d'apropiación indebida".

Enllaces esternos

• Datos: Q5946571