Kenpo Americanu
El Kenpo Americanu o Kenpo Kárate ye un sistema d'artes marciales creáu por Ed Parker, carauterizáu pol usu d'una rabasera de movimientos rápidos col envís de facese col oponente. Sopeléxase muncho como un sistema de defensa personal, y deriva d'artes marciales xaponeses tradicionales y d'otres como’l Kung fu del sur de China, que s’atopaben nel entemez cultural del Ḥawai de la primer metá del sieglu XX.
| Tamién | Kenpo Kárate Americanu, Kenpo d'Ed Parker, Kenpo Kárate |
|---|---|
| Enfoque | Artes marciales híbrides |
| País d'orixe |
 Estaos Xuníos d'América |
| Fundador | Ed Parker |
| Prauticantes famosos | Jeff Speakman, Elvis Presley, Karl James Noons |
| Paternidá | Kosho Shorei Ryu Kempo, Chu'an Fa o Kung fu |
| Deporte olímpicu | Non |
 | |
Parker introduxo a lo llargo de la so vida mui bien de cambeos nel arte, qu'afeutaben a principios, teoríes y conceutos de movimientu asina como a la terminoloxía. Cuando’l maestru Parker morrió ensin nomar un socesor pal so arte, dexó detrás de sigo un gran númberu d'instructores qu'enseñaron munches versiones estremaes de Kenpo Americanu.
Creu del Kenpo
editar- "Vengo a ti namás col kárate, les manes vacíes. Nun tengo armes, pero si m’obliguen a defendeme a mi mesmu, a los mios principios o al mio honor, si ye cuestión de vida o muerte, de xusticia o inxusticia, entós equí tán les mios armes: el kárate, les mios manes vacíes." Ed Parker - Marzu, 1957
Oríxenes del Kenpo Americanu
editarLa historia moderna del Kenpo Americanu empecipia nos años 1940, cuando’l Gran Maestru James Mitose (1916–1981) entamó a enseñar en Hawaii’l so estilu xaponés patrimonial, el Kosho Shorei Ryu Kempo (o Kosho-ryu Kenpo). Esti arte de la familia Mitose, más tarde llamáu Kenpo Jujutsu, manga tradicionalmente’l so orixe al Shaolin Kung Fu y a Bodhidharma. El Kenpo Jujutsu céntrase nos golpes de puñu y pie, mañes y valtos. L’arte de Mitose yera mui llinial, ensin los movimientos circulares del Kenpo Americanu.
William Kwai Sun Chow, que yá estudiara Kung-fu chinu con so padre,[1] deprendió Kenpo con James Mitose, llegando a cintu negru de primer nivel. Chow escomenzó después a enseñar un arte que llamaba Kenpo Kárate, mezclando los movimientos circulares que deprendiera de so padre col sistema que deprendiera de Mitose.[2] Chow foi probando y camudando’l so arte, adautándolo a les necesidaes de los estudiantes americanos.
Ed Parker adeprendió Kenpo Kárate con William Chow, y llegó a cintu negru,[3] anque años dempués Chow dixo que Parker nun algamara namái que’l cintu púrpura.[1] Hailos tamién que dicen que Parker solo llegara al cintu marrón con Chow, quiciabes porque esti yera’l grau col qu'escomenzó a enseñar n’Utah en 1955.[4] Al Tracy argumenta que Chow concedió’l sandan (cintu negru 3er Dan) a Parker n’avientu de 1961.[5]
El sistema conocíu como Kenpo Americanu foi desarrolláu por Ed Parker como heriede del arte de Chow. Parker revisó los métodos más anticuaos pa que prestaren pa los escenarios de combate de los tiempos modernos. Nesti periodu reestructuró dafechu les formes y téuniques del Kenpo Americanu. Alloñóse de los métodos que veníen visiblemente d'otres artes (como les formes propies del Hung Gar) y estableció una rellación más fondera ente les formes y el currículum téunicu de defensa personal del Kenpo Americanu. Tamién refugó los conceutos orientales que tenía por esotéricos (p.e. el qi) y buscó espresar l'arte en términos de principios científicos y metáfores occidentales.
Evolución del Kenpo Americanu
editarKenpo Kárate
editarDe mano Ed Parker llamó al so arte Kenpo Jujitsu. Principió por enseñar a otros compatriotes de Hawaii qu'estudiaben na Brigham Young University de Provo, Utah, en 1954. Pa 1956, yá taba enseñando de manera comercial en Provo.[4] A finales de 1956 abrió un estudiu en Pasadena, California.[6] En 1960 espublizó un llibro sobre’l so primer sistema.[3] Esti carauterizábase por tener muncha influyencia xaponesa, incluyendo l'usu de movimientos lliniales y circulares, téuniques "enfocaes" y llaves, agarres y valtos al estilu del jujutsu.
Les téuniques de Kenpo d'Ed Parker yeren cambiaes de les qu'enseñaba William Chow, combinares con cambeos qu'incorporaben movimientos del Boxéu, Yudu, y Lua.
Kenpo Chinu
editarCuando Ed Parker se sumó a les artes chines empezó a referise al so arte como "Kenpo Chinu." Pola mor d'ello escribió Secretos del Kárate Chinu, publicáu en 1963, non muncho después de Kenpo Kárate. El programa téunicu tenía semeyances reconocibles col Hung Gar, Choy Li Fut, y otres artes marciales chines del Sur, incluyendo dos formes, Tigre-Grulla y Pantera (o "Book Set"), y una práutica d'entrenamientu ("Star Block") que podía venir del Hung Gar.
Kenpo Americanu
editarParker entamó a codificar les sos tempranes conceiciones del Kenpo Chinu nuna interpretación personal del arte estremada y evolucionada, abandonando por exemplu, a favor del inglés americanu, los elementos del llinguax y un bon númberu de tradiciones asiátiques. Nesi periodu dexó les téuniques y principios organizaos neto que nes artes chines y xaponeses beneficiando’l so propiu programa de formes y téuniques. Enveredó’l so arte per cambeos continuos. Aconseyó siempre qu'una vez que l'estudiante aprendiera la lleición espresada na "fase ideal" de la téunica, tenía que siguir en cata d'aspeutos que pudieren encaxar nes sos necesidaes y posibilidaes personales. Amás, los alumnos de Parker deprendíen un currículum diferente dependiendo de cuándo estudiaren con él. Dalgunos preferíen el material más vieyu al más nuevu, querían caltener el material más vieyu que Parker tentaba de sustituyir, o queríen amestar al kenpo qu'aprendieren nun periodu particular l'entrenamientu n’otres artes marciales.
Ún de los estudiantes más famosos y cintu negru honorariu d'Ed Parker foi Elvis Presley.[7]
Graduaciones
editarNel Kenpo Americanu hai un sistema básicu de graos consistente en Cintu Blancu, Amariellu, Naranxa, Púrpura, Azul, Verde, Marrón Tercer Kyu, Marrón Segundu Kyu, Marrón Primer Kyu, y Cintu Negru de Primer a Décimu Nivel. Les diferentes organizaciones tienen sistemes estremaos de cintos, por casu la WKKA (World Kenpo Karate Association) inclúi un grau "avanzáu" pa cada cintu espresáu por una tira del siguiente nivel puesta al traviés nun cabu del cintu, y tamién inclúi un Cintu Encarnáu de 3er Grau enantes del Negru de primer nivel. Los graos Dan de cintu negru tán indicaos por “tires” encarnaes de media pulgada hasta’l cuartu, y un “bloque” de cinco pulgaes pal quintu. D’ehí p'arriba, van añadiéndose más tires de media pulgada hasta’l novenu grau. Pal cintu negru 10u Dan, pónense dos “bloques” de 5 pulgaes separaos por un espaciu de media pulgada.
Referencies
editar- ↑ 1,0 1,1 «William Chow: The Lost Interview». Black Belt Magazine (Cruz Bay Publishing, Inc). July 2005. Archivado del original el 2008-02-01. https://web.archive.org/web/20080201142427/http://www.blackbeltmag.com/archives/380. Consultáu'l 2011-01-25.
- ↑ «The Life and Times of Ed Parker». Black Belt Magazine (Cruz Bay Publishing, Inc). April 1991.
- ↑ 3,0 3,1 Parker, Ed 1960, Kenpo Karate: Law of the Fist and the Empty Hand, Delsby Publications, Los Angeles, CA
- ↑ 4,0 4,1 «Kenpo Karate - Setting History Right 1954-1956». Archiváu dende l'orixinal, el 2011-01-01.
- ↑ Tracy, Will (1999-08-08). «Kenpo Karate Setting History Right - The Blackbelted Mormon». A Brief History of Kenpo. Kenpo Karate. Archiváu dende l'orixinal, el 2008-12-19. Consultáu'l 2008-11-08.
- ↑ Tracy, Will (1999-08-08). «Kenpo Karate Setting History Right 1956-1959». A Brief History of Kenpo. Kenpo Karate. Archiváu dende l'orixinal, el 2008-11-01. Consultáu'l 2008-11-08.
- ↑ «Kenpo 5.0». Black Belt Magazine (Cruz Bay Publishing, Inc) 45 (1): p. 76. 2007.
Enllaces esternos
editar
Datos: Q525270
