Mancala

Llámase mancala (o manqala, pallabra árabe que significa movederu) a una familia de xuegu de tableru fundamentalmente africanos y tamién asiáticos que comparten una serie de carauterístiques comunes.

Mancala
Subxéneru	xuegu de tableru
Edaes	más de 5
Duración	10 min
Habilidaes	estratexa
[editar datos en Wikidata]

Orixe

Figura de persones xugando a mancala.

Xugadores de mancala.

Suel considerase que los tableros de mancala más antiguos descubiertos son una serie de grupos de furacos tallaos na piedra nos templos de Kurna y Karnak na dómina del antiguu Exiptu y descritos por Henry Parker en 1909. Estos templos foron dataos hacia'l 1400 e.d.C. Asina mesmo, Parker también escribe qu'atopó furacos asemeyaos na pirámide de Menkaura (hacia el 2.500 e.d.C).

Distribución

La distribución tradicional de los xuegos de mancala lléndase a África, el sur y el centru de Asia, el Caribe y en dalgunes partes de América del Sur. Nel sieglu XIX a los viaxeros europeos retábenlos a xugar mancala nos cafés d'El Cairo. Los esclavos africanos lleváronlu consigo a Surinam y al resto del continente americanu (el xuegu popularizóse principalmente nel Caribe y na costa este de Sudamérica)

También los hai n'Oceanía na parte occidental de la islla de Nueva Guinea, na so mayoría a consecuencia de la política de colonización fecha pol gobiernu indonesiu y nes islles Marianes (lleváu polos españoles dende Filipines).

Etimoloxía

L'orixe de la pallabra ye árabe y remanez de la raíz nql (naqala), que significa 'mover'. Hai dellos xuegos de mancala árabes que se denomen cenciellamente asina: manqala.

Descripción

1. El tableru ta compuestu por una serie de receutáculos (que puen ser furacos fechos nel suelu o nun bloque de madera) organizaos en fileres.
2. Estos receutáculos contienen una serie de pieces (semientes, granes, quixarros, banzones) indiferenciaes que son los elementos móviles del xuegu.
3. El movimientu básicu ye'l que davezu se llama "de sema", que consiste en tomar toles pieces conteníes nún de los receutáculos y diles depositando d'una nuna en receutáculos consecutivos a partir del siguiente al que les contenía.

Dientro d'estes carauterístiques xenerales esisten numberoses regles que definen otros tantos xuegos.

Tipos de Xuegos Manqala

Iniciu

Posición orixinal de partida. El xugador (d'abaxo), empieza la partida, y va escoyer por exemplu la caxella marcada (la quinta)

Garra les cuatro granes de la quinta casa, y repárteles una a una en sen antihorariu. Tóca-y el turnu al otru xugador, qu'escoyerá una de les sos cases, y repartiráles de la mesma forma.

Exemplu de cayida n'almacén

Imaxinemos que mentanto la partida, el xugador nel so turnu escueye la casa resaltada. Tomará les granes, y repartiráles d'una en una en sen antihorariu

Como la última grana cai nel almacén, el xugador llogra una vez (turnu) estra.

Exemplu de captura del granes del contrariu

Agora'l xugador escueye la so primer casa. Garra les 4 granes, y repárteles

La última grana cayó nuna casa balera del xugador, y la casa enfrente tien granes del oponente.

El xugador prinda les cuatro granes (la de so, y les del oponente) y enllena el so almacén. Turnu pal oponente.

1. Manqala de dos fileres (exemplu típicu'l kalah, oware, wari o agualé): nestos xuegos caúna de les fileres pertenez a un xugador, el movimientu de sema pasa les semientes d'una filera a otra cuando correspuende, namái puen tomase semientes d'un receutáculu de la filera propia pa mover. Príndase (de delles maneres, según el xuegu en concretu), y cuando se da la condición de final de partida gana'l que prindara más semientes o granes.
2. Manqala de cuatro fileres (exemplu típicu el bao, bawo o omweso): nestos xuegos a cada xugador pertenécen-y dos fileres consecutives. El movimientu de sema caltién les granes nes dos fileres del xugador que mueve, pero en determinaes circunstancies puen tomase les granes d'un receutáculu del rival y xuniles a les d'un receutáculu propiu. Cuando se da la condición de final de partida gana'l que tenga más semientes nes sos dos fileres.
3. Manqala de númberu impar de fileres: Equí entren les versiones tantu d'una filera (solitarios) como de trés.

Regles

1. Al empiezu del xuegu cada casa tien trés granes (o cuatro granes, que val igualmente), banzones o piedres. Por regla xeneral, el ganador del xuegu anterior empieza cola xugada.
2. Cada xugador remana una filera de seis cases (o furacos) y les sos respeutives granes. La filera que-y correspuende ye la que tien xusto enfrente d'él. El so almacén, ye'l que-y queda a mandrecha. La so puntuación ye'l númberu de granes qu'almacena nel so almacén.
3. Los xugadores tomen la so vez "semando" coles sos granes. Por exemplu, el xugador escueye una de les sos cases o furacos, y balera la casa o furacu de granes garrándolos na mano. Y agora, moviéndose en sen antihorariu, va poniendo una grana en cada casa y nel almacén propiu, pero en nengún casu nel almacén del oponente
   1. Si la última grana que sema, cai nel so almacén, llogra una tirada o vez adicional. Nun hai llende nel númberu de movimientos qu'un xugador pue facer esto.
   2. Si la última grana cai nuna casa balera del xugador y la casa del oponente que s'atopa enfrente a la balera del xugador contién granes, la última grana semada y les de la casa del contrariu pasen a engrosar l'almacén del xugador. El xugador pierde'l turnu, y garra'l turnu l'oponente.
4. Cuando un xugador nun pue tener más granes nes sos cases, el xuegu acaba. L'otru xugador mueve les granes de les sos cases al almacén y produzse el recuentu. El xugador con más granes nel so almacén gana la partida.

Un tableru de mancala de madera plegable.

Ver tamién

• Xuegu de mesa
• Kalaha
• Oware
• Toguz korgool

Enllaces esternos

• Wikimedia Commons tien conteníu multimedia tocante a mancala.
• Mundo Awalé (castellán).
• Mancala World (n'inglés).
• Descripción, Reglamentos y tutorial del Mancala y Bao (castellán).
• Xuegos de mancala (en catalán)

• Datos: Q267989
• Multimedia: Mancala