Movimientu Comunista d'Asturies

(Redirixío dende Movimiento Comunista)

El Movimientu Comunista d'Asturies foi un partíu políticu que tuvo activu n'Asturies dende finales del franquismu hasta l'añu 1992.

Movimientu Comunista d'Asturies
partíu políticu
Llocalización
Sede España
Direición España
Historia
Fundación1972
Disolución 1991
Cambiar los datos en Wikidata

El Movimientu Comunista (ETA Berri) editar

El Movimientu Comunista surde d'ETA Berri (Nueva ETA), una escisión d'ETA creada tres la V Asamblea d'esta organización celebrada na casa parroquial de Gaztelu (Guipúzcoa) en 1967. D'ente los múltiples debates internos desendolcaos nel somantu d'ETA, unu de los más importantes ye'l que tuvo llugar a mediaos de los años 60 ente nacionalistes y obreristes, que yeren persones partidaries de vincular l'aición d'ETA a les lluches obreres que por aquélles dómines se daben nel estáu español y que teníen un fuerte componente políticu d'oposición al franquismu. Esti grupu escindíu, partidariu d'una aición más marxista, yera conocíu dientro d'ETA como españolistas.

En vísperes de la celebración de la V Asamblea d'ETA, comunicóse-y a Patxi Iturrioz (cabezalero principal de los obreristas) la decisión de proceder a la so espulsión, propuesta pol Executivu, que fue ratificada na primera sesión del conceyu, el 7 d'avientu de 1966. Los obreristes, a la vista de que l'asamblea refugaba el pidimentu de defensa d'Iturrioz, decidieron non participar nella. El restu de la militancia mantúvose na mesma, escoyó un nuevu Executivu y decidió convocase pa una segunda parte de l'asamblea, que se celebró en marzu de 1967 en Getaria (Guipúzcoa).

Patxi Iturrioz y la minoría obrerista, ayenos yá a esta segunda parte de l'asamblea, adoptaron el nome d'ETA Berri (Nueva ETA), polo que'l restu de la organización pasó a ser conocida como ETA Zaharra (Vieya ETA). ETA Berri afondó na llinia obrerista, participando en Comisiones Obreres, denunciando los aspectos que consideraben más reaccionarios y xovinistes del nacionalismu vascu y alloñándose definitivamente del mundu del PNV, al que pertenecíen munchos empresarios vascos.

N'agostu de 1968 ETA Berri anunció'l cambiu del so nome pol de Komunistak (Los Comunistes), colo cual ETA Zaharra tornó a ser cenciellamente ETA. Nos primeros años 70 la organización convirtióse nel Euskadiko Mugimendu Komunistak (Movimientu Comunista d'Euskadi), que diría fusionándose con pequeños grupos comunistes de toa España como la Organización Comunista (Aragón), Unificació Comunista (Valencia), Grup de Formació Marxista-Leninista de les Illes (Baleares) y un grupu de comunistes independientes asturianos provenientes del Frente de Liberación Popular (Felipe), pa dar llugar al nacimientu d'un partíu federal llamáu Movimiento Comunista de España y, dende 1976, Movimiento Comunista (MC).

Movimientu Comunista d'Asturies editar

El MC yera un partíu federal con organizaciones federaes en casi tol territoriu español. Les organizaciones de Cataluña, Valencia y Baleares taben confederaes ente sí formando el Moviment Comunista dels Països Catalans. El EMK, guañu del que surdió'l MC, dixebróse d'ésti en 1983, aunque les dos organizaciones caltuvieron una unidá ideolóxica y d'aición.

El MC definíase como marxista-leninista de corte maoísta, aunque evolucionó bien ceo hacia una posición de comunismu eclécticu, ensin adscribise a ninguna de les corrientes esistentes. Nel so ideariu ocupaben una prosición cimera el feminismu y el sofitu a los nacionalismos y les diverses llingües del estáu. A mediaos de los 70 impulsó varies candidatures eleutorales, como la Candidatura de Unidad Popular (CUP), Euskadiko Ezkerra (esta candidatura obtuvo un diputáu nes eleiciones del añu 1977, Francisco Letamendía que tres de la so dimisión llevó al parllamentu al militante del EMK Patxi Iturrioz) , o la Candidatura d'Unidá Rexonalista (n'Asturies).

En tou esti tiempu el Secretariu Xeneral de la organización n'Asturies foi José Uría, Cheni, profesor d'enseñances medies.

Nel referendu constitucional de 1978 fizo una importante campaña pola abstención, col lema de “Ningún voto de izquierdas para una constitución de derechas”.

En 1979, la Organización de Izquierda Comunista (OIC) integróse nel MC, actuando durante un tiempu la organización resultante col nome de MC-OIC (n'Asturies MCA-OIC).

Tres la integración d'España na Unión Europea, el MC, xunto cola Liga Comunista Revolucionaria (LCR) sofitó les campañes eleutorales d'Herri Batasuna pa les eleiciones europees fuera del territoriu vascu.

El MCA participó en toa una riestra d'organizaciones sociales y movimientos cívicos, teniendo una importancia bien notable na política asturiana de los años 80, yá que foi'l principal promotor de les movilizaciones anti-OTAN y les bases americanes, el xuiciu contra los GAL, el desarrollu del movimientu feminista, etc. Fue especialmente activu na defensa de la llingua asturiana, siendo'l primer partíu políticu n'utilizala de forma habitual na so propaganda.

El Comité Federal tuvo una publicación periódica llamada Servir al Pueblo (nacida en tiempos de la dictadura franquista) que camudaría posteriormente'l nome pol d'Hacer. Tamién impulsó la editorial Revolución na que s'asoleyaron trabayos d'análisis teóricu sobre'l marxismu o les lluches populares. Estos periódicos editaos pol Comité Federal del MC convivieron con otros impulsaos por diferentes organizaciones territoriales, n'Asturies asoleyaron Octubre y Andecha Xoven editáu pola so organización xuvenil, les Mocedaes Revolucionaries d'Asturies, integrada na Federación de Juventudes Revolucionarias que yera la organización estatal na que s'amestaben les estayes de mocedá del MC.

Lliberación editar

El MC trabayó bien de tiempu xunto a la LCR, partíu de tendencia troskista col que se xunió orgánicamente en 1991, dando llugar a una confederación llamada Izquierda Alternativa, mientres que les organizaciones territoriales que la componíen tuvieron otru nome, xeneralmente Liberación (n'Asturies Lliberación). Esta nueva organización editó dos publicaciones: Páxina Abierta y Viento Sur, mientres que l'antigua editorial Revolución pasó a llamase Talasa. Esta unificación tuvo una vida bien curtia, yá qu'abondo ceo los antiguos militantes de la LCR tuvieron la sensación ser absorvíos pol MC. Poco más d'un añu depués de la unifiación, Izquierda Alternativa dixebróse en dos: el grupu de la LCR quedóse con esti nome y el grupu del MC col de Liberación. Nes lluches internes que llevaron a la dixebra un terciu de la militancia abandonó la organización. Izquierda Alternativa formó la organización Espacio Alternativo xunto a ecosocialistes, siendo una corriente interna d'Izquierda Unida, aunque funciona tamién como organización soberana.

N'Asturies, amás de siguir col trabayu dientro los movimientos sociales, dellos miembros de Lliberación participen n'Izquierda Xunida, anque Lliberación nun forma parte de la coalición como coleutivu. Paloma Uría (profesora y destacada militante feminista del MCA y Lliberación) ocupó'l puestu de Diputada na Xunta Xeneral del Principáu, depués de les eleiciones de 2003. Na siguiente llexislatura sería la profesora universitaria Emilia Vázquez, tamién vinculada al MCA y Lliberación, la qu'ocuparía un llugar na Xunta Xeneral del Principáu.

Finalmente, nel añu 2010, depués d'un conceyu estraordinariu, Lliberación, y con ello los restos del MCA decidieron la so disolución.

Referencies editar

Enllaces esternos editar

Ver tamién editar