Muay Thai

Muay Thai
(มวยไทย)
	Boxeadores Thai faen el Wai Khru Ram Muay enantes d'un combate “amateur” de Muay Thai.
Tamién	Boxéu Thailandés, Thai Boxing, Thai Kickboxing, Tharshanning
Enfoque	Golpes con tol cuerpu, especialmente puños, coldos, rodiyes y espiniyes; y valtos
Contautu/durez	Contautu plenu
País d'orixe	Tailandia
Prauticantes famosos	Tony Jaa, Buakaw Por. Pramuk, Alexey Ignashov, Daniel Ghiţă, Gökhan Saki, Diesel Noi, Apidej Sit Hrun, Ramon Dekkers, Saenchai Sor Kingstar, Yodsanklai Fairtex, Dida Diafat, Paolo Biotti, Rob Kaman
Paternidá	Muay Boran, Krabi Krabong
Artes descendientes	Artes marciales mestes, Kickboxing
Deporte olímpicu	Non
Sitiu oficial	http://wmcmuaythai.org/

El Muay Thai (มวยไทย) o Boxéu Thailandés ye un arte marcial y deporte de combate de Tailandia (de fechu’l deporte nacional) carauterizáu por usar mui bien dellos golpes y delles téuniques cuerpu a cuerpu. Nesti sen aseméyase a otros estilos de kickboxing d'Indochina, como’l Pradal Serey de Camboya, el Tomoi de Malasia, el Lethwei de Myanmar y el Muay Lao de Laos. El so antecesor ye’l Muay Boran.

La pallabra muay deriva del sánscritu mavya y thai refierse a los nativos de Tailandia. Al Muay Thai llámenlu dacuando l'"Arte de los Ocho Miembros" o la "Ciencia de los Ocho Miembros" por mor de qu'usa puñetazos, pataes, coldazos y golpes coles rodiyes, colo qu'usa ocho "puntos de contautu" empara de los "dos puntos" (dambos puños) del boxéu occidental y los "cuatro puntos" (manes y pies) d'otros deportes de combate derivaos d'artes marciales. Un prauticante de Muay Thai denómase nak muay. A los prauticantes occidentales llámenlos a veces nak muay farang o “boxeador estranxeru”.

Historia

El Muay Thai vien del Muay Boran (“Boxéu Antiguu”), que caltién esta denomación práuticamente hasta’l sieglu XX, identificándose dafechu col Muay Thai anque anguaño inda suel referise a la manera tradicional de prauticar quita de lo deportivo. Esti arte anició en Siam, l'actual Tailandia. L’antigua capital d'esti reinu taba en Sukhotai de 1238 a 1408. Al tar de contino en guerra contra otros reinos vecinos, como Myanmar y Camboya, yera obligao desendolcar les habilidaes de los soldaos del reinu nel manexu d'armes krabi krabong, y nel usu del cuerpu como arma en situaciones de combate zarráu. Téuniques como les pataes, golpes col puñu, coles rodiyes, coles espiniyes, colos coldos, y delles formes de valtar al adversariu, desendolcáronse daquella. El Muay Boran considerábase entóncenes como un arte fundamental, y parte imprescindible del currículum real para poder aspirar al tronu.

Nos sieglos siguientes l'arte siguió evolucionando. Foi nel llargu periodu de paz baxo’l rei Narai (1604-1690) cuando se convirtió en deporte profesional. Los combates facíense nun zarru cuadráu formáu por una cuerda en suelu qu'indicaba l'área de combate. Les regles yeren cencielles: engarrase hasta qu'unu quedara en pie, o qu'unu de los dos se diera. Nun había llendes de pesu, estatura o edá; les aldees competíen unes contra otres y facíense apuestes.

En 1774 Hsinbyushin, el rei de la vecina Myanmar, quixo facer unos festexos d'una selmana n’honor de la gran pagoda de Rangún. Ente ellos había boxéu, y escoyéronse boxeadores thai cativos pa que s’esfronaren contra los boxeadores del reinu. El 17 de marzu d'esi añu, Nhai Khanomtom, un prisioneru de guerra thai, combatió y venció a diez boxeadores birmanos de siguío, ensin nenguna posa ente les engarraes. Yera la primer vez que’l Muay Thai s’emplegaba nuna competición fuera de Tailandia. Por esti yogur a Nai Khanomtom concediéron-y el títulu de ¨Padre del Muay Boran¨, y el día 17 de marzu afitóse hasta anguaño como’l ¨Día Nacional del Muay Boran¨.

El Muay Boran, arriendes d'estilos temáticos como’l del “monu blanco Hanuman”, estremábase mayormente n’estilos procedentes d'un llugar o d'una tradición concreta:

Muay Chaiya o Muay Giow (estilu del Sur): ye un estilu identificáu nel sieglu XIX que solliña un espíritu sollerte al envís d'atopar estratexes eficaces. La postura ye angulosa, priviléxase la defensa personal, y dase muncha importancia a les téuniques de coldu y de rodiya. Utilícense téuniques d'imitación d'animales, sobre too del tigre.
El Muay Korat (Este y Nordeste), centráu na brenga física, como nes téuniques del búfalu.
El Muay Lopburi (Centru), col acentu puestu na intelixencia de los xestos (trabayu de variaciones de trayeutoria y esparabanes de brazos).
El Muay Thasao (Norte), con téuniques consistentes en solmenar de sutrucu.

A respeutive lo anterior, dicíase del Muay Boran: “El puñu potente del ‘Korat’, l'espíritu del ‘Lopburi’, la postura del ‘Chaiya’ y la velocidá del ‘Thasao’”. Estes práutiques tradicionales del arte thailandés, non competitives, axúntense en Tailandia nel términu mae mai muay thai.

El Muay Thai na actualidá

Un boxeador entrenándose nel sacu pesáu nun campu d'entrenamientu en Tailandia.

Anguaño’l Muay Thai prautícase como deporte en munchos países del mundu. El so espardimientu global convirtiólu nún de los deportes de contautu más estendíos, y el so númberu de prauticantes nun para de medrar. Los meyores “khaimuays” (campos d'entrenamientu) son thailandeses, pero actualmente hai otros países que pueden competir a la par, sobre too nes categoríes cimeres de pesu. Los Países Baxos son bierzu de munchos lluchadores de sonadía, como Ernesto Hoost, Peter Aerts o’l llexendariu Ramon Dekkers, ocho veces campeón del mundu; y munchos más que s’enfrentaron con thailandeses nel país d'ellos y con regles completes de Muay Thai profesional.

Fai falta mentar sicasí que, como deporte nacional y espresión cultural thailandesa, hai un muérganu regulador denomáu Federación Mundial de Muay Thai (WMF), encargáu de velar pola promoción y espardimientu correutos del Muay Thai, uno como deporte (Thai Boxing/Muay Thai), y otro arte marcial tradicional (Muay Boran).

Téuniques

Les téuniques básiques del Muay Thai son los puñetazos, pataes, rodiyazos y coldazos. Úsense tamién téuniques cuerpu a cuerpu y valtos. El Muay Thai ye un arte de combate de contautu total, u l'intercambiu de golpaes ente los lluchadores ye constante.

Golpes básicos

Puñetazos (Mhad)
Pataes (Dteh)
Rodiyazos (Khao)
Coldazos (Sawk)
Defenses (Pongkan)
Cuerpu a cuerpu (Plam)

Pataes

Un tei kan kro (patada circular alta).

Les pataes más comunes nel Muay Thai son les circulares y les frontales. La patada circular del Muay Thai importáronla otres artes marciales, como por exemplu’l kickboxing xaponés. Esta patada circular carauterística usa’l movimientu xiratoriu de tol cuerpu.

Los lluchadores de Muay Thai entrenen pa cutir siempre cola espiniya. La espiniya ye la parte más fuerte de la pierna del boxeador, mientres que’l pie tien munchos güesos menudos y ye muncho más feble énte les lesiones. Un lluchador pue acabar mancándose si utiliza solamente los pies como zona d'impautu. Los lluchadores de Muay Thai tresnen con procuru les sos espiniyes n’entrenamientos col sacu pesáu y en combates o “sparring”. Al envís d'algamar más resistencia y puxu nel momentu de la engarrada, los lluchadores tamién prautiquen los golpes d'espiniya sobre superficies dures.

Esta téunica conozse como “encallecimientu” y consiste en sedar un pocoñín el güesu al envís de qu'una capa estra de calciu s’amieste a la parte sedada (un procesu biolóxicu natural), criando pequeños “callos” nel güesu y tornándolo asina más resistente. Ensin embargu esti ye un procesu lentu, que rique abondu tiempu d'entrenamientu pa que seya granible.

Coldazos

Utilícense siete formes de solmenar un coldazu: horizontal, diagonal ascendente, diagonal descendente, ascendente, descendente, p'atrás xirando, y en saltu.

El coldazu llateral pue usase como movimientu d'acabación o como una manera de cortar la cara del oponente al envís d'anubri-y la vista. Ye la forma más común d'usar el coldu.

Los coldazos diagonales son los más rápidos, pero lleven menos puxu.

Los coldazos ascendentes y los que se faen en saltu son los que lleven más puxu, pero son lentos y más fáciles d'evitar o torgar.

El coldazu descendente úsase davezu cuando l'oponente s’agacha o dobla.

Estrémase tamién el coldazu simple del coldazu en secuencia.

El coldazu simple ye un movimientu de coldu independiente de los demás movimientos, mientres qu'un coldazu en secuencia ye un segundu golpe col mesmu brazu, siendo primero un ganchu y siguiéndo-y un coldazu. Estos coldazos, y la mayor parte de los otros, utilícense cuando la distancia ente los lluchadores tórnase demasiao pequeña y queda pocu espaciu pa llanzar un ganchu a la cabeza del oponente.

Téuniques defensives

La defensa ye daqué perimportante nel Muay Thai. Utiliza los costazos, los brazos y les caniyes como un “escudu” pa bloquiar les téuniques del oponente. Bloquiar ye un elementu fundamental del Muay Thai, y combínase col nivel de condición física del prauticante. Les pataes circulares baxes y medies al cuerpu blóquiense davezu cola caniya. Los golpes a la parte cimera del cuerpu blóquiense davezu con antebrazu, o si se pue cola caniya. Les pataes circulares medies, si se traben, aseguren tamién la posibilidá de valtar al oponente, o arrefundialu lloñe.

El cuerpu a cuerpu

El cuerpu a cuerpu, o “clinch”, aplícase garrando al oponente alredor del pescuezu o del troncu. Equí nun son dixebraos los boxeadores, y la engarrada sigue con un intercambiu de rodiyazos y coldazos. Nel cuerpu a cuerpu úsense davezu delles téuniques d'aventar al oponente al suelu.

Tradiciones

El ram muay o homenax real

Khuen kru - Ritual d'aceutación ente profesor y alumnu.

Krop kru – Ceremonia celebrada en Tailandia cuando un alumnu llega a profesor.

Wai kru - Ritual de respetu al profesor (Wai: llit. respetu; y Kru: llit. profesor).

Ram muay - Ritual que caltién lloñe a los espíritus malinos. Faise siempre enantes de los combates en visu a que nun soceda nada malo al lluchador nin al so maestru.

Mongkon – Oxetu que’l profesor pon (y que dempués quita) na cabeza del lluchador, pa que-y dea suerte.

Pra jiad – Oxetu en texíu trenzao que lleva’l lluchador nel brazu izquierdu y que n’Occidente simboliza la graduación. En Tailandia, al nun haber sistema de graduación, el pra jiad úsase como decoración, pudiendo llevar amarráu un buda pequeñu pa dar suerte. Hai lluchadores qu'amarren filos de pelo de los sos maestros en señal d'homenax a ellos.

Graos

Los graos son asemeyaos a los d'otres artes marciales, pero varien según les federaciones o asociaciones. Sicasí en Tailandia nun se siguen estes graduaciones, sinón una simple clasificación de lluchadores según seyan “amateurs” o profesionales (A, B, o C). Hai tamién títulos d'enseñanza pa los maestros, como Maestru (“Arjarn”), Gran Maestru (“Arjarn Yai”) o Gran Maestru Honorariu (“Por Ra Ma Jarn”).