Naginata
La naginata (dacuando trescrita “el” naginata) ye un arma usada polos samuráis del Xapón feudal, compuesta por un cortu nel cabu d'una piértiga. Aseméyase a una alabarda europea, sacantes que la fueya del cabu ye curva, con punta y un solu cortu, paecida a una cimitarra.
Historia
editarHistóricamente l'usu de la naginata rellaciónase colos Sohei, los monxos guerreros y los Yamabushi o monxos del monte. Posteriormente’l so usu espardióse pelos clanes samurái.
La téunica de combatir cola naginata llámase naginatajutsu, y ta presente en munchos estilos de Koryu Budo (o Kobudo).
Col tiempu, la manera xaponesa de guerriar foi camudando. Nel amarradiegu periodu de les guerres civiles, el yari (llanza), más fácil de remanar y de más alcance, ocupó’l llugar de les naginates, que pasaron a emplegase raramente nel campu batalla. Daquella’l naginatajutsu foi adulces siendo un arte que prauticaben sobre too les dames de families samurái como forma de defensa.
Anguaño inda esisten dellos estilos de Kobudo qu'aprienden el naginatajutsu, calteniendo esti arte vivu ya intautu dende la so creación. Tamién s’emplega esti arma nel Ninjutsu.
Hai que mentar asina mesmo l'Atarashii Naginata (llit. “nueva naginata”), una modalidá marcial moderna (Gendai Budo) de carís deportivu, basada nel Naginatajutsu, neto al desendolcu del Kendo modernu dende’l Kenjutsu (téuniques samurái de combate con espada).
Tipos de naginata
editarEstrémense los siguientes tipos de naginata verdaderes (con cortu real):
- Kozori: lleven una fueya enforma curva.
- Hirumaki: lleven una fueya asemeyada a una katana, con una guardia pa protexer la mano.
- Bisento: lleven una fueya corta y gorda. Los ninjas y los paisanos usábenla dacuando como focín.
La mayoría de les naginates son enforma curves y nun lleven yokote (borde perpendicular al cortu a la vera la punta). Dellos modelos llevaben nel cabu contrariu de la piértiga un furón d'aceru pa travesar les armadures.
Naginatajutsu güei
editarD’ente los estilos de Koryu Budo qu'aportaron a los nuesos díes, hai dellos cola naginata como parte del so entrenamientu. Ente los principales tán el Tenshin Shoden Katori Shinto Ryu, Suio Ryu, Tendo Ryu, Toda Ha Buko Ryu y Kashima Shinto Ryu.
Na mayoría d'estos estilos la naginata prautícase malapenes como kata, emplegándose sustitutos de madera pa les naginates y les espaes. N’otros casos (por exemplu nel Suio Ryu o nel Tendo Ryu) emplégase’l bogu (especie d'armadura, como la de Kendo) y naginates de bambú especialmente adaptaes pa complementar l'entrenamientu de kates con combates, ensin riesgu de mancase bramente al prauticar.
Atarashi Naginata
editarLa “Nueva Naginata” sistematizóse como deporte dempués de la Segunda Guerra Mundial. Les sos normes y reglamentos díctalos la Federación Internacional de Naginata (INF).
Los prauticantes aparéyense con proteiciones nos entrenamientos con contautu y nos campeonatos. Estos atabeos de proteición llámense en xunto bogu, que consta de proteutor de cabeza y gargüelu (Men), de moñeques y puños (Kote), del troncu (Do) y de les caniyes (Suneate, ésti non usáu nel Kendo).
Ver tamién
editarReferencies
editarEnllaces esternos
editar
Wikimedia Commons acueye conteníu multimedia sobre Naginata.
- Instituto Niten - Información sobre Naginatajutsu Archiváu 2012-03-10 en Wayback Machine
- Federación Internacional de Naginata Archiváu 2008-09-19 en Wayback Machine
- Videu de Kendo contra Naginata Archiváu 2010-03-27 en Wayback Machine
