Película

obra cinematográfica
(Redirixío dende Películes)

Una película ye una socesión de semeyes fotográfiques tomaes con una cámara, y presentaes per aciu d'un proyeutor. La frecuencia de les semeyes, qu'ha ser superior a los 18 fotogrames per segundu, crea nel güeyu humanu la ilusión de continuidá, ensin interrupción ente cada fotograma por mor de la persistencia retiniana.

Cola introducción y meyora del videu nos caberos años, tán utilizandose de forma creciente soportes magnéticos y dixitales pa grabar películes, sobre tou nel casu de películes realizaes pa la televisión, asina como documentales y curtiumetraxes, y filmaciones d'aficionaos.

Les películes pa la gran pantalla siguen faciéndose de momentu coles películes clásiques de triacetatu, cuyu formatu ye de 35 mm, que ye idénticu al que s'utiliza na fotografía clásico como tamañu universal, anque nel casu de la fotografía los fotogrames impresionense horizontalmente, mentantu que nel cine impresionense verticalmente y son, polo tanto, d'un tamañu dalgo inferior.

Amás del formatu de 35 mm, emplegóse ocasionalmente'l formatu d'anchu doble, de 65 mm pa la filmación d'unes poques películes (pa la proyeición la película conviértese en 70 mm (al añedise de la banda de soníu). Con ello pretendíase llograr una mayor calidá na proyeición, pero comprebóse ceo que la pequeña estremancia na nitidez nun xustificaba los equipos caros y pesaos que requería esti formatu de película. Anguaño esti formatu de 70 mm utilizase nes proyeiciones especiales como IMAX, Omnimax, asocedíos especiales y el rodaxe de grandes producciones.

D'otra miente, foi mui popular el formatu de 16mm (y el Super16), ye dicir, la metá del formatu estándar nel cine, que s'emplegó pa películes esperimentales, ansí como pa documentales y curtiumetraxes. Esti formatu sigue utilizandose en documentales y nes escueles de cine pa la formación de los sos alumnos, anque amenorgose l'usu en profitu del videu.

A la fin, esistieron tamién dos formatos de película empobinaos namái qu'a los aficionaos, que quedaron relevaos dafechu pol videu. Trátase de la película de 8mm, que consistía nuna película de 16 milímetros curtada llonxitudinalmente. Yá que los fotogrames yeren mui pequeños y nun ufríen una calidá de producción afayadiza, la industria presentó posteriormente'l formatu Super 8, que yera dalgo más anchu que l'anterior, colo que s'algamó una calidá d'imaxe aceutable. Les grabaciones feches nestes dos películes puen copiase a videu, lo que permite prescindir de los antiguos proyeutores y demás preseos. Estos formatos entá s'empleguen pa dar una estética estremada en dellos curtiumetraxes, respeutu al videu.

Como derivación del términu película, entendiendo por ésta la cinta de celuloide que s'impresiona y se revela por procedimientos químicos, una película ye tamién l'espectáculu cinematográficu que narra una historia interpretada por actores. Nesti caberu casu nun s'estrema'l material sensitible nel que s'imprentó la película, y tampocu si ésta ye proyeutada nuna sala de cine na gran pantalla o ye vista nún aparatu de televisión domésticu.

Ver tamién editar


Referencies editar

Enllaces esternos editar