Pelayo Ortega

pintor asturianu

Pelayo Ortega (1956Mieres) ye un pintor asturianu.

Pelayo Ortega
Vida
Nacimientu Mieres1956[1] (67/68 años)
Nacionalidá España
Estudios
Llingües falaes castellanu
Oficiu pintor
Cambiar los datos en Wikidata

Entamó la so formación artística na Agrupación Xixonesa de Belles Artes y na Escuela d'Artes y Oficios d'Uviéu, formación qu'enanchó darréu nel Círculu de Belles Artes de Madrid, asina como nel taller de grabáu de Dimitri Papageorgiu. Completaría esta formación como copista nel Muséu del Prado.

Participó y obtuvo premios en dellos concursos y la so primer esposición individual tuvo llugar n'Uviéu, na Galería Tassili, en 1978. Dende entós la so actividá ye imparable colgando los sos cuadros n'importantes galeríes, siendo un participante habitual del certame Arco qu'añalmente se celebra en Madrid. La so proyeición internacional llevólu a esponer los sos cuadros en Nueva York, na galería Marlborough. Nel añu 2006, coincidiendo col so cincuentenariu, la Feria Internacional de Muestres d'Asturies fizo-y un homenaxe con una esposición cola parte de la so obra que figura na Coleición Masavéu.

Pelayo Ortega tamién tuvo una importante actividá como ilustrador y grabador. Collaboró en llibros como La Indumentaria Popular de Asturias, de Luis Argüelles y Semblanza de Gijón, de Francisco Carantoña. Con esti últimu trabayu ganó'l Premiu Nacional a la Meyor Edición del Ministeriu de Cultura, na estaya de Bibliofilia. Tamién tuvo una importante actividá nel montaxe d'esposiciones y diseñu de catálogos. Igualmente diseñó carteles pal Festival Internacional de Cine de Xixón y la Feria Internacional de Muestres d'Asturies.

La so obra forma parte de bien de importantes coleiciones privaes y públiques. Ente estes últimes pue citase: Aeropuertos Nacionales (AENA), Ayuntamientu de Madrid, Biblioteca d'Asturies "Ramón de Ayala", Biblioteca Nacional d'España, Grupu Endesa, Gobiernu del Principáu d'Asturies, Gobiernu de Cantabria, Galería Marlborough, Fundación Mª Cristina Masaveu Paterson, Fundación Prince Pierre de Mónaco, Muséu d'Artes Abstractu Español, Centru d'Arte Reina Sofía, Muséu Vaticanu,...[2]

Referencies editar

  1. «rexistru d'autoridaes BNE». Consultáu'l 3 xunu 2020.
  2. Catálogu de la exposición "Pelayo Ortega", entamada pola Asociación Amigos d'As Quintas", d'A Caridá. 2019

Enllaces esternos editar