Pert Kelton

actriz estauxunidense

Pert Kelton (14 d'ochobre de 1907Great Falls (es) Traducir – 30 d'ochobre de 1968Ridgewood)[2] foi una actriz de vodevil, radio, cine y televisión d'Estaos Xuníos.[3] Foi la primer actriz qu'interpretó a Alice Kramden en The Honeymooners, xunto a Jackie Gleason, y trabayó como actriz teatral nuna docena de producciones del circuitu de Broadway ente 1925 y 1968.

Pert Kelton
Vida
Nacimientu Great Falls (es) Traducir14 d'ochobre de 1907[1]
Nacionalidá Bandera de Estaos Xuníos d'América Estaos Xuníos
Llingua materna inglés
Muerte Ridgewood30 d'ochobre de 1968[1] (61 años)
Causa de la muerte infartu de miocardiu
Estudios
Llingües falaes inglés
Oficiu actriz, actriz de televisión, actriz de cineactriz de teatru
Nominaciones
IMDb nm0447125
Cambiar los datos en Wikidata

Cine editar

Nacida en Great Falls (Montana), Kelton foi una nueva comediante en películes de serie A mientres la década de 1930, de cutiu interpretando a la graciosa ya igualmente curiosa meyor amiga del personaxe principal femenín. Tuvo una memorable actuación en 1933 como la cantante "Trixie" en The Bowery, xunto a Wallace Beery, George Raft, Jackie Cooper y Fay Wray. Empobináu por Raoul Walsh, el filme trataba sobre Steve Brodie, el primer home que supuestamente saltó dende la Ponte de Brooklyn y vivió pa cuntalo.

Kelton interpretó a la prostituta Minnie na película de Gregory LaCava Bed of Roses (1933), rodada enantes del códigu Hays xunto a Constance Bennett y Joel McCrea.

Irónicamente, dada la so posterior inclusión na llista negra de Hollywood, la última película de Kelton en dellos años foi Whispering Enemies (1939). La so siguiente actuación tuvo llugar en televisión en The Honeymooners y n'otros sketches nel show de Gleason. La abrupta salida del cine por causa de la llista negra esplicóse como resultáu de que l'actriz presentaba problemes cardiacos.

Radio editar

Na década de 1940 Kelton foi una voz familiar en programes radiofónicos como Easy Aces, It's Always Albert, The Stu Erwin Show y la serie de 1941 We Are Always Young. En 1949 dio voz a cinco personaje distintes nel programa de radio Texaco Star Theater. Tamién formó parte de manera regular del programa The Henry Morgan Show, y nos primeros años cincuenta interpretó a la sirvienta nel programa de Monty Woolley The Magnificent Montague.

Televisión editar

Kelton interpretó a Alice Kramden nos sketches The Honeymooners dientro de la producción de DuMont Television Network Cavalcade of Stars. Esos númberos formaron la base pa la sitcom de la CBS de 1955 The Honeymooners. Jackie Gleason interpretaba al home d'ella, Ralph Kramden, y Art Carney yera'l vecín, Ed Norton. Elaine Stritch yera Trixie, la esposa baillarina de Norton, enantes de ser reemplazada por Joyce Randolph.

Kelton actuó nos sketches orixinales, xeneralmente con una duración de 10 a 20 minutos, menor que la posterior serie con capítulos de media hora y que les versiones musicales d'una hora de la década de 1960. Esta primitiva versión de The Honeymooners yera más escura y dura que la de la CBS, posterior a la inclusión de Kelton na llista negra de Hollywood mientres el Macarthismo, y na cual foi reemplazada por Audrey Meadows.

Na década de 1960 foi convidada a trabayar nel show de Gleason na CBS interpretando a la madre de Alice nun episodiu de la versión musical d'una hora de duración de The Honeymooners (tamién conocida como The Color Honeymooners), con Sheila MacRae como una moza Alice.

En 1963 Kelton actuó na serie Dimensión desconocida interpretando a l'autoritaria madre de Robert Duvall nel capítulu "Miniature."

Nos sos últimos años Kelton intervieno n'anuncios comerciales de la marca Spic and Span, tando la so imaxe pública fuertemente amestada a la mesma.

Broadway editar

Kelton debutó como actriz teatral nel circuitu de Broadway a los 17 años d'edá actuando na obra de Jerome Kern Sunny, na cual interpretaba a "Magnolia" y cantaba un cantar del mesmu nome.

Años más tarde foi nomada en dos causes a los Premios Tony: Como meyor actriz de repartu na obra de Frank Henry Loesser Greenwillow (1960), y en Spofford (1967–68). Sicasí, la so actuación más destacada en Broadway foi como la provecía Mrs. Paroo (la madre de Marian Paroo) na pieza de Meredith Willson The Music Man (1957), interpretación que repitió na so adautación cinematográfica en 1962 The Music Man, el papel pol cual ye quiciabes más recordada.

Vida personal editar

Pert Kelton foi copropietaria del Hotel Warner Kelton, construyíu a finales de la década de 1920, nel 6326 de Lexington Avenue, en Los Angeles. L'hotel sirvía a actores y músicos como Cary Grant, Orry-Kelly, y Richard Rogers y Lorenz Hart. Na so parte posterior tenía un pequeñu teatru al campu, xunto a un pozu de los deseos que podía inspirar el cantar "There's a Small Hotel" del musical "On Your Toes (1936)".

Pert Kelton finó'l 30 d'ochobre de 1968, por causa de una enfermedá cardiaca en Ridgewood (Nueva Jersey). Tenía 61 años d'edá. Los sos restos fueron encenraos y les cenices apurríes a los sos allegaos.

Referencies editar

  1. 1,0 1,1 Afirmao en: SNAC. Identificador SNAC Ark: w6w49xrq. Apaez como: Pert Kelton. Data de consulta: 9 ochobre 2017. Llingua de la obra o nome: inglés.
  2. The Story of Pert Kelton. Edward F. Kelton. 2002. http://www.kelton.org/notables/pert.html. 
  3. Obituariu de Variety, 6 de payares de 1968, páxina 71.

Enllaces esternos editar