Presidente Eternu de la República

El cargu de presidente eternu de la República (en coreanu: 공화국의 영원한 주석, tr: Gonghwagugui yeongwonhan juseog) ta establecíu na Constitución de Corea del Norte, enmendada el 5 de setiembre de 1998, onde diz:

El presidente eternu de la República, Kim Il-sung.

Sol lideralgu del Partíu del Trabayu de Corea, la República Popular Democrática de Corea y el pueblu coreanu, va establecer al Gran Líder, el Collaciu Kim Il-sung, n'alta estima, como'l Presidente Eternu de la República.

La frase Presidente Eternu de la República», solo apaez nel prefaciu, non nel testu funcional de la constitución y nun ta acomuñada con nenguna oficina gubernamental con responsabilidaes particulares, poderes, privilexos, etc. Amás, la única persona a la que fai referencia, yá finara cuando la so redaición foi fecha, polo cual nun constitúi un cargu oficial.

Un cargu póstumu similar, foi-y apurríu a Kim Jong-il fíu y socesor de Kim Il-sung y padre de Kim Jong-un, actual líder nacional de Corea del Norte. Foi designáu como secretariu xeneral eternu del Partíu del Trabayu de Corea y el presidente eternu de la Comisión Nacional de Defensa, d'acordies cola tradición de creación de puestos "eternos" pa los miembros finaos de la dinastía Kim.

Anguaño, nun hai nengún presidente de la República Popular Democrática de Corea, siendo esi cargu abolíu na constitución vixente. Los sos poderes fueron estremaos ente tres cargos:

• El secretariu xeneral del Partíu del Trabayu de Corea, cargu anguaño ocupáu por Kim Jong-un.
• El presidente de l'Asamblea Suprema del Pueblu, cargu ocupáu por Kim Yong-nam.
• El presidente de la Comisión Nacional de Defensa, tamién ocupáu por Kim Jong-un.

La constitución vixente estrema, de manera formal, el poder de la presidencia ente estos trés cargos, con Kim Jong-Un, fíu de Kim Jong-il y nietu de Kim Il-sung, como gobernante de facto (col títulu de supremu líder de Corea del Norte).

Ver tamién

• Gobiernu y política de Corea del Norte
• Presidente vitaliciu