Abrir el menú principal
Mapa d'América del Norte. En colloráu, los estaos que llendan polo menos con ún de los Grandes Llagos y, poro, tan incluyíos nesta rexón.

La Rexón de los Grandes Llagos d'América del Norte ye una rexón binacional, estauxunidense y canadiense, qu'inclúi parte del territoriu de los estaos estauxunidenses d'Illinois, Indiana, Michigan, Minnesota, Nueva York, Ohio, Pennsylvania y Wisconsin y de la provincia canadiense d'Ontario. La rexón, na que los Grandes Llagos ocupen un llugar central, conforma una rexón con una identidá histórica, económica y cultural propia. Parte del so territoriu forma parte tamién de la Megalópolis de los Grandes Llagos.

La Comisión de los Grandes Llagos, una axencia interestatal autorizada pa les sos funciones polos estaos estauxunidenses antes nomaos y poles provincies canadienses de Quebec y Ontario, ye una autoridá binacional con poderes específicos pa protexer y preservar l'agua y los recursos mediuambientales de los Grandes Llagos y de los acuíferos y cursos d'agua de la so rodiada. Los sos cabezaleros, pa selo, tienen de ser confirmaos nel so cargu polos gobiernos federales de los dos países, y polos estatales y provinciales de les sos subunidades alministratives. Estaos y provincies tán representaos na Conferencia de Gobernadores y Xefes del Executivu de los Grandes Llagos y San Llorienzo (Conference of Great Lakes and St. Lawrence Governors and Premiers).

La rexón recibe'l so nome del de la conca xeolóxica de los Grandes Llagos, una estrecha conca que compriende los Grandes Llagos y llenda al norte cola badea de Hudson, al oeste cola conca del ríu Mississippi y al este y al sur cola del ríu Ohio. Al este los ríos de San Llorienzo, Richelieu, Hudson, Mohawk y Susquehanna formen un arcu de concas fluviales que vierten les sos agües nel océanu Atlánticu.

Enllaces esternosEditar