Taifa

Una taifa (n'árabe: طائفة ṭā'ifa, plural طوائف ṭawā'if, pallabra que significa "bandu" o "facción") yera caún de los pequeños reinos nos que se dividió'l califatu de Córdoba dempués del derrocamientu del califa omeya Hisham III en 1031, que supunxo'l final del califatu n'al-Ándalus.

Dempués del pasu de los almorávides y los almohades, que reaxuntaron temporalmente otra vuelta los reinos musulmanes de la Península Ibérica, foi'l tiempu de los nomaos segundos (1144 y 1170) y terceros reinos de taifas (sieglu XIII).

Primeros reinos de taifas

Hisham II foi obligáu a abdicar en 1009, entamando la descomposición del califatu de Córdoba. Dende esi añu hasta l'abolición formal del califatu en 1031 asocédense nel tronu de Córdoba nueve califas, de les dinastíes omeya y hamudí, en mediu d'una situación d'anarquía que facilita que, poco a poco, vaigan independizándose les taifes d'Almería, Murcia, Alpuente, Arcos, Badajoz, Carmona, Dénia, Granada, Huelva, Morón, Silves, Toledo, Valencia y Zaragoza. Pa cuando'l caberu califa, Hisham III, ye depuestu en 1031, toles cores (provincies) d'al-Ándalus que nun s'independizaran tovía autoproclámense independientes, y formen reinos autónomos (les taifes) gobernaos por clanes árabes, bereberes o eslavos.

La dixebra nun fizo más que sacar a la lluz problemas fondos y antiguos. D'una banda, la llucha pol tronu califal nun yera otro que la reproducción na capital de los conflictos de causa racial que teníen dividíu l'emiratu y el califatu dende la so formación. Árabes, bereberes y muladíes o eslavos, amás de los esclavos llibres del norte peninsular o d'orixe centroeuropéu formaben grupos que dominaben en zones determinaes del territoriu califal. Les zones más riques refugaben depender del califa, y querían más ser independientes, dalgo que venía agravao pola enorme presión fiscal necesaria pa facer frente a los gastos de la guerra escontra los cristianos.

Palaciu de La Alfajería, residencia del rei musulmán de Saraqusta (Zaragoza).

Nel momentu de la dixebra cada taifa identificóse con una familia, clan o dinastía. Asina, surde la taifa de los amiríes (descendientes d'Almanzor) en Valencia; la de los tuyibíes en Zaragoza; la de los aftasíes en Badajoz; la de los birzalíes en Carmona; la de los ziríes en Granada; la de los hamudíes n'Algeciras, Ceuta y Málaga; y la de los abadíes en Sevilla.

Al pasar el tiempu les taifes mayores foron conquistando o formando aliances coles pequeñes, de forma que les de Sevilla (que conquistara toa Andalucía occidental y parte de la oriental), Badajoz, Toledo y Zaragoza convirtiéronse nos principales estaos islámicos peninsulares. Nel momentu cimeru de los reinos de taifes (sieglu XI y primer metá del XII) los reis competíen ente sí, amás de militarmente cuando tocaba, en prestixu. Pa ello ficieron de los más nomaos poetes y artesanos de la dómina.

Ello, nostante, nun-yos valía pa enfrentar la principal amenaza al islam peninsular: l'avance de los reinos cristianos. Una xera abegosa pa un poder musulmán centralizáu y unificáu ya imposible para estos pequeños reinos que, ensin posibilidá de tener exércitos abondo grandes pa tener garantía d'ésitu, recurríen a mercenarios pa enfrentase a los cristianos y a les otres taifes. Los cristianos, nostante, aprovecharon la división musulmana forciando a cada taifa individual a sometese a ellos. Primeru al traviés d'un tributu anual, la paria, que los reis de taifes pagaben pensando que con ello conseguiríen comprar la so independencia. Nostante, tres de la conquista de Toledo en 1085 por Alfonsu VI de Lleón y Castiella los musulmanes decatáronse de que l'amenaza cristiana diba acabar con ellos, y pidieron axuda al sultán almorávide del norte d'África, Yusuf ibn Tasufin. Esti asentose n'Algeciras y, dempués de derrotar a Alfonsu VI na batalla de Zalaca (1086), conquistó progresivamente toles taifes.

Periodificación de los primeros reinos de taifes

Los reinos de taifes en 1037.

Na evolución de los primeros reinos de taifes pueden estremase trés periodos:

1009-1031. Los distintos llinaxes (ta'i-fah) van faciéndose col gobiernu nos sos territorios, sofitando al tiempu a dalgún de los pretendientes al califatu pa intentar que, si llegaba al tronu, beneficiara los sos intereses. Nesti tiempu consolídense unos 30 poderes llocales, al frente de los cuales hai unos caudillos rexonales qu'usen títulos honoríficos que correspondíen al califa pero ensin proclamase inxamás califas ellos mesmos. Córdoba foi perdiendo'l control sobre les demás provincies andalusíes, y esto aprovecháronlo los reis de taifas pa dirixir con total independencia los sos reinos, creando una alministración independiente de la califal y entamando tamién l'acuñación de moneda.
1031-1045. La desapaición formal de la figura del califa fai que los reis de taifes, nos sos territorios, imiten los vezos califales: constrúin palacios, nomen visires, y rodéense d'una corte na que s'enchipen de poder cuntar con poetes que canten les sos glories al traviés del xéneru lliterariu conocíu como panexíricu. Amás d'esos gastos suntuarios había que gastar bien de perres en pagar soldaos, mayormente mercenarios, pa defender el reinu. Les engarradielles internes, y tamién el puxu reconquistador de los reinos cristianos, ficieron qu'estos aportaran, bien p'axudar a una taifa escontra otra o direutamente pa cobrar un tributu a les taifes. La enorme presión fiscal necesaria pa facer frente a tou esti gastu foi debilitando les taifes, que foron convirtiéndose en satélites de les más importantes. Les mayores foron les de Badajoz, Toledo, Zaragoza y Sevilla. Destaca, nel Mediterraneu, la taifa de Dénia y Baleares, que tenía una importante flota de guerra.
1045-1090. Les engarradielles internes, la gran cantidá de perres pagaes en forma de paria a los reis cristianos y el puxu d'estos últimos xuntáronse p'acabar franciendo la España musulmana. La conquista de Toledo en 1085, amás d'acabar col centru cimeru de la cultura musulmana, interrumpió la vía de comunicación más importante de la España musulmana, qu'iba de Tortosa por Zaragoza y Toledo a Sevilla. Valencia, pese a la so riqueza, nun consiguió tener una dinastía fuerte, y foi poco a poco subordinándose a los reis primero de Toledo y, llueu de la so conquista, de Zaragoza, hasta que foi conquistada por el Cid en 1092. La desesperada situación del islam na Península llevó a los reis de Badajoz y Sevilla a pidi-yos ayuda a los almorávides, que a cambio de dala acabaron coles taifes y convirtieron al-Ándalus nuna provincia periférica del so imperiu magrebí.

Los reinos de taifes en 1080.

Llistáu de taifes del primer periodu

Taifa	Añu de formación	Añu de desapaición	Integrada en
Taifa d'Albarracín	1011	1104	Imperiu almorávide
Taifa d'Algeciras	1013	1058	Taifa de Sevilla^[1]
Taifa d'Almería	1011	1091	Imperiu almorávide
Taifa d'Alpuente	1009	1106	Imperiu almorávide
Taifa d'Arcos de la Frontera	1011	1068	Taifa de Sevilla
Taifa de Badajoz	1009	1094	Imperiu almorávide
Taifa de Baleares o taifa de Mallorca	1076	1116	Imperiu almorávide
Taifa de Ceuta	1061^[2]	1084	Imperiu almorávide
Taifa de Calatayud	1046	1055	Taifa de Zaragoza
Taifa de Carmona	1013	1067	Taifa de Sevilla
Taifa de Córdoba (repúbliques)	1031	1070	Taifa de Sevilla
Taifa de Dénia	1010-12	1076	Taifa de Zaragoza
Taifa de Granada	1013	1090	Imperiu almorávide
Taifa de Huelva	1012-13	1051-53	Taifa de Sevilla
Taifa de Lisboa	1022	?	Taifa de Badajoz
Taifa de Lorca	1051	1091	Imperiu almorávide
Taifa de Málaga	1026	1090	Imperiu almorávide^[3]
Taifa de Mértola	1033	1091	Imperiu almorávide
Taifa de Molina	?	?	Taifa de Valencia
Taifa de Morón	1013	1066	Taifa de Sevilla
Taifa de Murcia	1011-12	1065	Taifa de Valencia
Taifa de Murviedro y Sagunto	1086	1092	Imperiu almorávide
Taifa de Niebla	1023-24	1053	Taifa de Sevilla
Taifa de Ronda	1015	1065	Taifa de Sevilla
Taifa de Santa María del Algarve	1018	1051	Taifa de Sevilla
Taifa de Segorbe	?	?	?
Taifa de Sevilla	1023	1091	Imperiu almorávide
Taifa de Silves	1040	1063	Taifa de Sevilla
Taifa de Toledo	1030-31	1085	Reinu de Llión
Taifa de Tortosa	1039	1092	Imperiu almorávide^[4]
Taifa de Valencia	1010-11	1094	Imperiu almorávide^[5]
Taifa de Zaragoza	1017	1118	Imperiu almorávide
↑ De 1013 a 1026 perteneció a la taifa de Málaga, y de 1035 a 1058, fecha de la so desapaición formal, a la de Sevilla. ↑ Independizose nesta fecha de la taifa de Málaga. ↑ De 1026 a 1057-58 foi dependiente de la taifa de Granada. ↑ De 1060 a 1082 foi gobernada pol rei de Zaragoza. Dempués volvió ser independiente hasta la llegada los almorávides. ↑ De 1064 a 1075 perteneció a la taifa de Toledo. Dempués volvió a ser independiente, y foi conquistada por El Cid en 1094.

Segundos reinos de taifas

Los almorávides, tres de vencer a Alfonsu VI na batalla de Sagrajas (1086), foron faciéndose col control de tolos reinos de taifes peninsuluares. Sicasí, la so presencia nun había ser duradera nin pacífica. Los andalusíes taben descontentos colos sos nuevos amos, y yá en 1121 la población se rebeló contra éstos en Córdoba. Nos años vinientos hebo entá más revueltes, y cuando dende 1140 el poder almorávide entama la so decayencia nel norte d'África pol puxu de los almohades, les taifes peninsulares aprovecharon pa recuperar la so llibertá.

Esta, sicasí, diba durar poco. En 1147 un exércitu almohade al mandu d'Abd Al-Mumin llegó a España, y conquistó la mayoría del sur de la península, incluyendo Cádiz, Málaga y Sevilla. El so fíu Abu Yaqub Yusuf completó, en 1172, la conquista cola toma de la taifa de Murcia. Sólo caltuvo la so independencia, hasta 1203, la taifa de Mallorca.

Llistáu de los segundos reinos de taifas

Taifa	Añu de formación	Añu de desapaición	Conquistada por
Taifa d'Almería	1145	1147	Pol reinu de Llión en 1147, y polos almohades en 1157
Taifa d'Arcos de la Frontera	1143	1154	Almohades
Taifa de Badajoz	1145	1150	Almohades
Taifa de Mallorca	1146	1203	Almohades
Taifa de Beja y Évora	1140	1150	Almohades
Taifa de Carmona
Taifa de Córdoba	1144	1148	Almohades
Taifa de Granada	1145	1145	Almohades
Taifa de Guadix y de Baza	1145	1151	Pola taifa de Murcia, y dempués polos almohades.
Taifa de Jaén	1145	1145	Reconquistada polos almorávides, y dempués tomada polos almohades.
Taifa de Málaga	1145	1153	Almohades
Taifa de Mértola	1144	1151	Perteneció a la taifa de Badajoz de 1145 a 1146, y foi conquistada polos almohades en 1151.
Taifa de Murcia	1145	1172	Almohades
Taifa de Niebla	1145	1150	Almohades
Taifa de Jerez y de Ronda	1145	1145	Reconquistada polos almorávides.
Taifa de Santarem	1147	1147	Almohades
Taifa de Segura	1147	1147	Almohades
Taifa de Sevilla	1023	1091	Imperiu almorávide
Taifa de Silves	1145	1150	Almohades
Taifa de Tejada	1145	1150	Almohades
Taifa de Valencia	1145	1147	Pola taifa de Murcia

Terceros reinos de taifas

Muralla árabe de Murcia (sieglu XII)

La decayencia de los almohades entama tres de la batalla de Navas de Tolosa (1212), que marca l'entamu del tercer periodu de taifes. Breve tamién, pues bien ceo los cristianos, dirixíos por Xaime I d'Aragón (que conquistó Valencia en 1238) y Fernandu III el Santu de Castiella (que conquistó Córdoba en 1236 y Sevilla en 1248), acabaron cola mayoría d'elles. El reinu nazarí de Granada fízose coles otres, y entá consiguió aguantar los emburriones de los cristianos hasta'l 2 de xineru de 1492, fecha de la so capitulación definitiva.

Les principales taifas d'esti periodu foron les de Murcia y Valencia.

Llistáu de los terceros reinos de taifas

Taifa	Añu de formación	Añu de desapaición	Conquistada por
Taifa d'Arjona	1232	1244	Reinu de Castiella
Taifa d'Alcira, Dénia y Xàtiva	1224	1227	Almohades
Taifa de Baeza	1224	1226	Reinu de Castiella
Taifa de Ceuta	1233	1236	Taifa de Murcia
Taifa de Lorca	1240	1265	Almohades
Taifa de Málaga	1229	1238	Reinu de Granada
Taifa de Menorca	1228	1287	Reinu d'Aragón
Taifa de Murcia	1228	1266	Reinu de Castiella
Taifa de Niebla	1234	1262	Reinu de Castiella
Taifa d'Orihuela	1239	1250	Foi repartida ente la taifa de Murcia y Castiella.
Taifa de Valencia	1228	1238	Reinu d'Aragón

Bibliografía

Guichard, Pierre ; Soravia, Bruna; Los reinos de taifas: fragmentación política y esplendor cultural (2005). Editorial Sarriá (Málaga). ISBN 84-95129-92-2.
Reilly, Bernard F; Cristianos y musulmanes (1031-1157).1992, Editorial Crítica. ISBN 84-7423-555-3.
Viguera, María Jesús; Los reinos de Taifas. 2007, RBA Coleicionables. ISBN 84-473-4815-6.
Viguera, María Jesús; coord. Los reinos de taifas. 1999, Espasa-Calpe. ISBN 84-239-5000-X.
Viguera, María Jesús; De los Taifas al Reino de Granada : al-Andalus, siglos XI-XV. 1995, Historia 16. ISBN 84-7679-285-9.
Viguera, María Jesús; Los reinos de taifas y las invasiones magrebíes : (Al-Andalus del XI al XIII). 1992, Editorial MAPFRE. ISBN 84-7100-431-3

Wikimedia Commons tien conteníu multimedia tocante a Reinos de taifas.

[1] De 1013 a 1026 perteneció a la taifa de Málaga, y de 1035 a 1058, fecha de la so desapaición formal, a la de Sevilla.

[2] Independizose nesta fecha de la taifa de Málaga.

[3] De 1026 a 1057-58 foi dependiente de la taifa de Granada.

[4] De 1060 a 1082 foi gobernada pol rei de Zaragoza. Dempués volvió ser independiente hasta la llegada los almorávides.

[5] De 1064 a 1075 perteneció a la taifa de Toledo. Dempués volvió a ser independiente, y foi conquistada por El Cid en 1094.

[1]

[2]

[3]

[4]

[5]