Asturiana Mining Company

Asturiana Mining Company ye un grupu de música d'Asturies. Naz en 1998 de la mano del músicu/productor/promotor Michael Lee Wolfe. Los sos arreglos musicales y la presencia del gaiteru y cantante Berto Varillas van acabar formando parte de les señes d'identidá de la formación.

Asturiana Mining Company
Datos
Tipu	grupu musical
Xéneru	música folk
País	España
Fecha fundación	1998

Biografía

El resultáu de la búsqueda d'un camín ente'l folclor de los blues y la fecunda tradición asturiana, queda reflexada nel CD Patrimoniu, que sal nel añu 2000 y ye considerada una de les meyores grabaciones del movimientu folk. La voz y la gaita de Berto Varillas, premiu Macallan del añu 1988 nel Festival Intercélticu de Lorient, y la percusión de Manuel Cordero, conviértense nuna seña d'identidá de la formación. Aína la banda viaxa a festivales y son reconocíos como ún de los grupos más identificativos d'Asturies.

Pero AMC noun ye namás una banda sinón tamién un taller d'idees y d'aprendizaxe del que surden varios proyeutos nos que la música asturiana fúndese con otres tradiciones ya idees orixinales. En 2002 cuatro miembros de AMC saquen el CD Tradición, baxo'l nome d'Ástura, dexando la puerta abierta a nuevos proyeutos al traviés d'una formación de bandina tradicional.

En 2004 AMC pon música al espectáculu Nel Camín, basáu en temes asturianos relacionaos col Camín de Santiagu, nel que collaboren cantadores de tonada asturiana como Liliana Castañón, Urbano Prieto y Anabel Santiago. D'esti espectáculu lleguen a facese 25 representaciones per tola xeografía asturiana. Dellos de los temes que lu integraben fueron grabaos posteriormente por Anabel Santiago y pola propia Asturiana Mining Company.

A partir d'esti momentu iníciase la collaboración con Anabel Santiago, a la que AMC va acompañar durante cinco años. El frutu d'esta collaboración son tres grabaciones: Anabel Santiago canta a Diamantina Rodríguez, consideráu pola crítica ún de los meyores discos de canción asturiana de la década; Torner, acercando al gran públicu la belleza y diversidá del so Cancionero; y Desnuda, nel qu'Anabel Santiago ofrecía la so vertiente más pop.

El trabayu Torner acabó convirtiéndose nun espectáculu del mesmu títulu y que, como ya sucediera con Nel Camín, llevóse per toa Asturies y diverses llocalidaes d'España. Colos años, esti trabayu acabó por convertise nuna cita obligada de la música folk asturiana y na meyor referencia del folk sobre la obra del músicu y folklorista Eduardo Martínez Torner.

Tien de destacase, igualmente, la collaboración de l'Asturiana Mining Company nes películes Pídele cuentas al Rey, de la qu'esiste CD de la so banda sonora, y Cenizas del Cielo, dambes del direutor José Antonio Quiros.

2011 arrancó con una actuación de l'Asturiana Mining Company como soporte musical de tola gala de Nueche Vieya en TPA, que vieron n'Asturies más de cien mil espectadores, dientro del programa SONES, el de mayor audiencia de la televisión autonómica.

El títulu del so últimu trabayu ye Sones por Berto Velasco, en memoria del más importante luthier de gaites asturianes y padre del cantante Berto Varillas. La so canción Si nun conoces Val.louta resultó ganadora del Premiu al Meyor Cantar, na edición del añu 2012, convocáu pola Conseyería d'Educación, Cultura y Deporte del Principáu d'Asturies. La canción, compuesta por Macu González básase nel ritmu tradicional del son d'arriba. Esta mesma canción recibió'l Premiu del Públicu del festival Liet International de 2012. Y el grupu el Premiu de la Crítica RPA al Meyor Grupu del Añu 2012.

Discografía, Filmografía y Espectáculos

Añu	Película
2000	CD Patrimoniu
2001	CD BSO Pídele cuentas al Rey, música orixinal de Juan Carlos Cuello
2002	CD Tradición, como Ástura
2004	Nel Camín
2005	CD Anabel Santiago canta a Diamantina Rodríguez, con Anabel
2005	CD Torner, como Ástura
2007	CD Desnuda, con Anabel
2009	BSO Cenizas del cielo
2011	CD Sones por Berto Velasco

Enllaces esternos

• Páxina oficial del grupu Archiváu 2012-08-30 en Wayback Machine

• Datos: Q5710082