Benavides
Benavides, tamién denomináu Benavides d'Órbigu, ye un conceyu y llocalidá d'España, na provincia de Lleón, comunidá autónoma de Castiella y Lleón. Tien una área de 74,07 km² con una población de 2587 habitantes, según los datos del INE de 2017.
 Benavides | |||
|---|---|---|---|
.jpg) | |||
| |||
| Alministración | |||
| País |  España | ||
| Autonomía |  Castiella y Lleón | ||
| Provincia |  provincia de Lleón | ||
| Tipu d'entidá | conceyu d'España | ||
Alcaldesa de Benavides (es)  | Ana Rosa Sopeña Ballina | ||
| Nome oficial | Benavides (es)[1] | ||
| Códigu postal |
24280 | ||
| Xeografía | |||
| Coordenaes | 42°30′07″N 5°53′45″W / 42.502047°N 5.895947°O | ||
  Benavides Benavides (España) | |||
| Superficie | 74.07 km² | ||
| Altitú | 839 m[2] | ||
| Llenda con |
Villares d'Órbigu, San Justo de la Vega (es) , Villaobispo de Otero (es) , Villamejil (es) , Quintana del Castillo, Turcia (es) y Santa Marina del Rey (es)
| ||
| Demografía | |||
| Población |
2367 hab. (2023) - 1215 homes (2019) - 1240 muyeres (2019) | ||
| Porcentaxe | 0% de provincia de Lleón | ||
| Densidá | 31,96 hab/km² | ||
| Más información | |||
| Estaya horaria | UTC+01:00 | ||
| aytobenavides.com | |||
 | |||
Benavides d'Órbigu
editarBenavides d'Órbigu ye una villa de la provincia de Lleón asitiáu xunto al ríu Órbigu. Ye cabeza de conceyu, compuestu por dellos pueblos como son: Antoñán del Valle, Vega d'Antoñán, Gualtares d'Órbigu, Quintanilla del Monte y Quintanilla del Valle. Celebra les sos fiestes del 13 al 16 de setiembre n'honor al Benditu Cristu y el día de San Xuan celebren fiestes n'honor al "Barriu de San Xuan" en dicha llocalidá, amás de la fiesta del braniante n'honor a la gran cantidá de braniantes, campistes y turistes que recibe'l pueblu demientres el branu. En principiu basábase nel mercáu de ganáu y foi ganando importancia convirtiéndose en feria de diversos productos típicos y básicos de la fastera. La so economía básase principalmente na agricultura y pequeñes empreses familiares. Ye bien popular la so Fonte de los Ocho Caños, asitiada frente al Conceyu de la población. Dispón d'ambulatoriu médicu, biblioteca y piscina municipal.
Historia
editarL'orixe de Benavides ye bastante inciertu. Hai quien afirma que'l so orixe remóntase a más de dos mil doscientos años antes de Cristu. Argumentase cola esistencia d'unos poblaos prehistóricos nun cuetu esistente anguaño, llamáu La Chana de la Madalena. Otru argumentu ye la esistencia d'unos reis, los primeros d'Iberia dempués del diluviu universal. Unu d'esos reis llamábase Avides, voz d'orixe hebréu. Considérase qu'anteponiendo Ben, que significa fíu, tenemos el nome de Benavides, fíu de Avides. Yá tenemos población y nome. Ye posible y hasta probable que nel llugar que güei ocupa Benavides hubiera dalgún pobláu prehistóricu, dada la situación estratéxica y la bayura de recursos básicos pa la subsistencia.
Pero lo que güei conocemos y nomamos Benavides tien un orixe antiguu, pero non tantu, según les siguientes pruebes. Cola invasión árabe, la mayoría de los habitantes de l'actual provincia lleonesa emigraron al norte. El Rei Alfonso I (739-757) reconquistó la Ciudá de Lleón. Sicasí, esti Rei destruyó cuasi toles poblaciones qu'había na provincia por non poder defendeles. Namás caltuvo Lleón y Estorga y dellos monasterios. El Rei Ordoño I (850-866) foi'l primer rei qu'entamó la repoblación de la Ciudá de Lleón y gran parte de les poblaciones de la provincia. La repoblación foi fecha con gallegos, ástures y mozárabes veníos del sur. Estos postreros, los mozárabes, teníen una doble cultura, la cristiana y la musulmana. Yeren billingües, falaben romance y árabe.
Na dómina d'Alfonso III (866-910) los moros tentaron de reconquistar Lleón en dos ocasiones, nos años 882 y 883, pero nun lu algamaron y arrenunciaron de reconquistar el terrén perdíu. Ye a partir d'estos años cuando entama la repoblación o fundación de munches de les poblaciones lleoneses actuales, ente les que s'atopa Benavides.
El nome Benavides vien de la pallabra árabe Bana-Vidas y Bane-Vidas, derivaos de Bani-Vidas, que significa fíos de Vidas. Estos nomes yá apaecen inclusive antes del añu 900 y el definitivu Benavides apaez per primer vegada nel añu 1194, según afirma don Ramón Menéndez Pidal. Arriendes d'ello, cabe suponer que la población de Benavides tien de tener el so orixe ente los años 850 y 900 y más concretamente ente los años 883 y 900.
Benavides yá yera a los cien años de la so fundación la población más importante de la Ribera del Órbigu, formando un territoriu de soberanía real, lo que llámase realengu. Foi bien posiblemente en tiempos del Rei Alfonso IX (1188-1230) cuando foi creáu'l Señoríu de Benavides. Dalgún historiador afirma que l'apellíu Benavides tien sangre real, d'unu de los fíos d'Alfonso IX y que esti fíu foi'l primer Señor de Benavides, Dalgunu hasta-y pon nome a esti primer Señor, Pedro Fernández de Lleón. La lleenda, sicasí, axudica esti primer títulu a don Mendo de Benavides. Esti asegura que l'escudu d'armes del Señoríu de Benavides tien el so orixe nun privilexu d'Alfonso IX (un lleón con gules) escontra'l so propiu fíu al igual que'l so güelu Alfonso VII dio un lleón como escudu al Rei de Zaragoza pola so reconocencia como vasallu al ser coronáu Emperador d'España.
Unu de los señores más conocíos y famosos foi Juan Alfonso de Benavides, que recibió del Rei Fernandu IV el privilexu del mercáu de los xueves el 28 d'agostu de 1306. Un mercáu llenu de franquicies y privilexos pa tolos xueves del añu. A partir d'esta fecha, Benavides algama la so mayor rellumanza, llegando a repoblar tierres na provincia de Zamora hasta Sanabria.
En tiempos del Rei Pedro I (1350-1369) Juan Alfonso de Benavides aportó a Mayor del Rei en Xusticia y Notariu Mayor d'Andalucía. El 7 d'agostu de 1358, por aiciones de combate na Batalla del Salado concédese-y al Señoríu de Benavides el títulu de Mayoralgu caballerescu. El 14 de setiembre de 1408 el Señor Sánchez de Benavides presenta en Valladolid ante'l Rei Xuan II la carta fundacional del Mayoralgu de Benavides. Esi día 14 yera'l día de la Esaltación de la Santa Cruz, fiesta patronal de Benavides.
La influyencia de los Benavides decai ante la preponderancia de los Condes de Ḷḷuna. El primeru d'ellos, Diego Fernández Quiñones y la so esposa Xuana Enríquez fundaron en 1460 el Conventu Franciscanu que perduró hasta la desamortización de Mendizábal, 18 de febreru de 1836. De la fortaleza y del palaciu de los Condes namái queda'l nome Prao Palaciu y del conventu de los Franciscanos caltiénense entá unes ruines.
Infraestructures
editarEn creciente desendolcu, cuenta con una escelente flota d'autobuses que comuniquen al pueblu coles grandes capitales españoles como Barcelona, Madrid, Sevilla... Benavides cunta amás con un ambulatoriu municipal qu'abarca tola ribera (aprox. 12.000 persones), tamién cunta con un polideportivu municipal, un auditoriu y escuela de música y una piscina municipal que según fontes oficiales ye visitada por hasta más de 800 persones diaries nos meses branizos.
Mercáu de los xueves
editarEn dicha llocalidá celébrase un mercáu tolos xueves dende hai 800 años, desque nel añu 1306 el rei Fernandu IV concediera dichu privilexu a la villa de Benavides d'Órbigu dándo-y una gran importancia económica a la llocalidá poniéndose al nivel de ciudaes como Lleón, Estorga y Sahagún. Nel añu 2006 celebróse'l 7º centenariu del mercáu y pa conmemoralo hubo numberosos acontecimientos como la retresmisión del sortéu de la llotería de Navidá dende'l pueblu.
Demografía
editar| Gráfica d'evolución de Benavides ente 1857 y 2016 |
 |
| Población de drechu según los censos de población del INE.[3]
Población según la rellación d'unidaes poblacionales del INE. |
Nucleos de población
editarEl conceyu de Benavides ta formáu por 6 nucleos de población, siendo Benavides el principal. Teníen la siguiente población en 2016 según l'INE.[4]
| Nucleu de población | Población |
|---|---|
| Benavides | 1825 |
| Quintanilla del Monte | 439 |
| Antoñán del Valle | 165 |
| Quintanilla del Valle | 110 |
| Vega d'Antoñán | 41 |
| Gualtares d'Órbigu | 7 |
Comunicaciones
editarCarreteres
editarBenavides comunícase con delles carreteres llocales, la LE-420 y la LE-443. A escasos quilómetros atópase un accesu a la rede d'alta capacidá na AP-71.
Tresporte aereu
editarL'aeropuertu de Lleón, qu'entró en serviciu nel añu 1999, ye l'aeropuertu más cercanu, atopándose a 31 quilómetros de Benavides. Según les estadístiques de Aena, en 2008 l'aeropuertu movió 122.809 pasaxeros, 5.700 operaciones y 15,9 tonelaes de carga.[5] Caltién vuelos con Madrid , Barcelona , Valencia, Tenerife y París tol añu, que se refuercen en temporada braniza con enllaces a Palma de Mallorca, Málaga, Eivissa, Gran Canaria y Menorca. Atópase somorguiáu amás nunes obres d'ampliación que se centren na construcción d'una nueva área terminal y na duplicación de la superficie actual de la plataforma.
Economía
editarLa economía de la villa de Benavides de Órbigo básase nel sector servicios, nel que cabe destacar el pesu que tien la restauración con más de 40 llocales d'esti tipu. Tamién son importantes l'agricultura (col cultivu del lúpulu y el maíz, sobremanera) y la industria (fábriques cerámiques y del dulce, ente otres).
Ciudadanos pernomaos
editar- Guillermo del Riego, medayista olímpicu en piragüismu.
Referencies
editar- ↑ Afirmao en: Llista de Conceyos y los sos Códigos por Provincies a 1 de xineru de 2019. Data d'espublización: 8 febreru 2019. Editorial: Institutu Nacional d'Estadística.
- ↑ URL de la referencia: https://www.aemet.es/es/eltiempo/prediccion/municipios/benavides-benavides-de-orbigo-id24015.
- ↑ INE. «Alteraciones de los conceyos en los Censos de Población desde 1842». Consultáu'l 4 de mayu de 2016.
- ↑ Instituto Nacional de Estadística. «Nomenclátor: Población del Padrón Continuo por Unidad Poblacional». Consultáu'l 4 de marzu de 2016.
- ↑ Aena (ed.): «Estadística de aeropuertos españoles 2008». Archiváu dende l'orixinal, el 6 de marzu de 2009. Consultáu'l 21 de marzu de 2009.
