Cai de rodaxe
Una pista de rodaxe o cai de rodaxe (del inglés taxiway) ye parte de la infraestructura del «llau del aire» (del inglés airside), que permite coneutar les zones d'hangares y terminal cola pista d'aterrizaxe. Dependiendo del país, la terminoloxía pa referise a los mesmos elementos varia sustancialmente y por eso recibe tantos nomes. De vezu tán pavimientaes con asfaltu o formigón, anque los aeródromos más pequeños y menos importantes utilicen dacuando tritu o yerba.
Funciones editar
Nos aeropuertos con muncho tráficu, constrúyese una pista paralela a la pista d'aterrizaxe col envís d'evitar que, tanto los aviones que despeguen como los qu'aterricen, ocupen la pista innecesariamente mentanto tán en tránsitu escontra la terminal dempués d'aterrizar o escontra la cabecera de la pista antes del despegue. Esto ye, que con una cai de rodaxe los aviones dempués d'aterrizar pueden abandonar la pista d'aterrizaxe apenes mengüen la so velocidá y circular escontra la terminal per fuera de la pista d'aterrizaxe, dexando qu'otros aviones puedan utilizar la pista nesos momentos. Esto permite aumentar la capacidá (númberu total d'operaciones) que pueden llograse cola pista. P'ameyorar entá más la capacidá de les pistes, suelen construyise delles salíes rápides de la pista (escontra la cai de rodaxe) pa dexar que los aviones salgan de la pista d'aterrizaxe haza la cai de rodaxe a velocidaes más altes. Esto facilita que l'avión desocupe la pista más rápido, faciendo posible qu'otros aterricen nun espaciu más curtiu de tiempu. Si l'aeródromu nun cunta con cai de rodaxe paralela a la pista d'aterrizaxe, ésta última va riquir enanches nes sos cabeceres pa que los aviones puedan dar la vuelta.
Señalización editar
Pa les operaciones nocherniegues, les cais de rodaxe (taxiways) bórdiense xeneralmente con lluces azules, pa estremales de les lluces blanques d'una pista d'aterrizaxe. Los aeropuertos más grandes amiesten dacuando lluces verdes nel centru.