Casa de Cultura Teodoro Cuesta

La Casa de Cultura "Teodoro Cuesta" de Mieres foi inaugurada'l 31 de mayu de 1988 y dende entós vien exerciendo de catalizador d'actividaes y proyeutos apostando decidío poles nueves iniciatives nel dominiu de les artes escéniques, les artes plástiques, les artes gráfiques y la música, asina como pola valoración y estudiu d'aquelles que, de mou específicu, toquen los aspectos propios de les artes tradicionales.

Casa de Cultura Teodoro Cuesta
centru cultural
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Mieres
Coordenaes	43°15′01″N 5°46′23″W
Casa de Cultura Teodoro Cuesta Casa de Cultura Teodoro Cuesta (Asturies)
Historia y usu
Apertura	31 mayu 1988
Orixe del nome	Teodoro Cuesta

Lleva'l nome del que fuera'l más conocíu de los escritores en llingua asturiana, Teodoro Cuesta, amás de músicu y compositor. Dende l'añu 1989 ye direutor de la Casa de Cultura "Teodoro Cuesta" l'escritor Ismael González Arias.

Dende l'añu 2007 cuenta con un teatru con capacidá pa 400 persones y salón d'actos con capacidá pa 120 persones.

Actividaes

A lo llargo del añu destaquen, pola so trescendencia n'Asturies, los sos programes:

• Premiu Teodoro Cuesta de Poesía, el de más grande prestixu de los que se convoquen n'Asturies y que contó ente los sos ganadores con Berta Piñán, Lourdes Álvarez, Xuan Bello o Antón García.
• Xornaes Internacionales de Montaña, consideraos ún de los principales eventos d'esti xéneru de los que se celebren en too España, según la revista Desnivel, especialista nestos deportes.
• Memorial "Silvino Argüelles", nel que se dan los premios a les diez meyores voces del añú en tonada asturiana y al meyor gaiteru acompañante de tonada, consideraos los principales premios del ámbitu de la canción asturiana.
• Conciertos del Camín, una de les principales cites de lés músiques folk, xunto colos Conciertos del Valle, dedicaos nesti casu a los grupos asturianos y que se programen pa llevase a cabu nel Valle de Cuna.
• Festival Son d'Uxo, alcuentru de bandes de gaites que tien llugar nel mes de marzu en dichu pueblu.
• Festival Más/Menos Celta de Baíña, nueche folk que tien llugar nel pueblu citáu de Baíña.

Centros dependientes

Dependen de la Casa de Cultura "Teodoro Cuesta" les siguientes instalaciones culturales del conceyu de Mieres:

• Atenéu de Turón (y biblioteca), especializáu n'alcuentros lliterarios.
• Centru d'Arte Casa Duró, de tipu xeneralista.
• Biblioteca d'Uxo, dependiente de la de Mieres, asitiada na propia Casa de Cultura "Teodoro Cuesta", como la siguiente.
• Biblioteca de Santa Cruz.

Enllaces esternos

• Datos: Q13146883
• Multimedia: Casa de Cultura, Mieres