Cinturón d'asteroides

El cinturón d'asteroides ye una rexón del Sistema Solar, con forma de discu circunestelar, asitiada nel Sistema Solar, ente les órbites de los planetes Marte y Xúpiter. Esta rexón ta ocupada por un gran númberu de cuerpos estelares sólidos y de forma irregular, de tamañu variáu pero muncho más pequeños que planetes, nomaos asteroides o planetes menores. Esti cinturón d'asteroides ye nomáu tamién cinturón d'asteroides principal, o cinturón principal, pa distinguilu d'otres poblaciones d'asteroides del Sistema Solar, como los asteroides cercanos a la Tierra (Near-Earth asteroids, NEA) o los asteroides troyanos[1].

Ficha d'oxetu celesteCinturón d'asteroides
Parte de sistema solar interior (es) Traducir
Oxetu astronómicu padre Sol
Cambiar los datos en Wikidata

La metá de la masa del cinturón contiénenla los cuatro asteroides mayores: Ceres, Vesta, Palas ya Hygiea[1]. Sicasí, la masa total del cinturón ye pequeña, d'aprosimadamente'l 4% de la de la Lluna.

Cinturón d'asteroides del Sistema Solar interior. El cinturón d'asteroides, asitiáu ente les órbites de Marte y Xúpiter, ta representáu en collor blanco. En verde apaecen los troyanos de Xúpiter, y en naranxa'l grupu de Hilda.

Ceres, l'únicu de los asteroides del cinturón grande bastante pa ser incluyíu na categoría de los planetes nanos, tien un diámetru de 950 km, y los otros trés citaos anantes tienen diámetros medios de menos de 600 km[2][3][4]. El restu los oxetos del cinturón son de tamañu pervariable, y dalgunos son tan pequeños como una partícula de polvu. El material del cinturón ye tan ralo que numberoses naves espaciales non tripulaes tienen travesáolo ensin problema[5]. Sicasí, los choques ente grandes asteroides pasen, y de resultes d'ellos puede formase una familia d'asteroides que comparten les mesmes carauterístiques orbitales y composiciones. Los asteroides individuales categorícense, dientro del cinturón, pol so espectru, y la mayoría ta incluyíu nún de los siguientes grupos principales: carbonáceos (tipu C), silicatos (tipu S) y ricos en metales (tipu M).

El cinturón d'asteroides formose a partir de la nebulosa solar primordial como un grupu de planetesimales[6], que son los precursores, de pequeñu tamañu, de los protoplanetes. Na rexón ente Marte y Xúpiter les perturbaciones gravitacionales provocaes por Xúpiter cargaron a los protoplanetes con una cantidá d'enerxía orbital que-yos impidió xuntase pa formar un planeta[6][7]. Les colisiones yeren demasiao violentes y, en cuenta de fundise, los planetesimales y la mayoría de los protoplanetes rompiéronse. De resultes, el 99,9% de la masa orixinal del cinturón perdiose nos primeros 100 millones d'años d'esistencia del Sistema Solar[8]. Dellos asteroides cayeron al Sistema Solar interior, convirtiéndose en meteoritos que chocaron colos planetes d'esa zona. Entá güei, les órbites de los asteroides pertúrbense de forma medible cuando el so periodu de revolución alredor del Sol forma una resonancia orbital con Xúpiter. A eses distancies orbitales produzse un güecu de Kirkwood cuando los asteroides son arrastraos a otres órbites[9].

Hai dellos tipos de cuerpos celestes de pequeñu tamañu notres rexones del Sistema Solar: son los asteroides cercanos a la Tierra, los centauros, los oxetos del cinturón de Kuiper, los discos dispersos, los sednoides y los oxetos de la nube d'Oort.

El 22 de xineru de 2014 científicos de l'Axencia Espacial Europea notificaron la detección, por primera vegada, de vapor d'agua en Ceres, el mayor de los oxetos del asteroide[10]. La detección foi posible gracies a la capacidá d'observación del espectru infrarroxu llonxanu del observatoriu espacial Herschel[11]. El descubrimientu foi una sospresa, porque atribúise a los cometes, y non a los asteroides, la propiedá de "soltar chorros y plumes". Según ún de los científicos qu'espublizaron l'estudiu, "les llendes ente lo que ye un cometa y un asteroide son cada vegada más borroses"[11].

ReferenciesEditar

  1. 1,0 1,1 Williams M, What is the Asteroid Belt?, artículu na web Universe Today (23 d'agostu de 2015).
  2. Krasinsky GA, Pitjeva EV, Vasilyev MV, Yagudina EI, Hidden Mass in the Asteroid Belt. Icarus 2002;158(1):98-105. doi:10.1006/icar.2002.6837
  3. Pitjeva EV, High-Precision Ephemerides of Planets-EPM and Determination of Some Astronomical Contents. Solar System Research, 2005;39(3):176-186. doi:10.1007/s11208-005-0033-2
  4. Yeomans DK, JPL Small-Body Database Browser. NASA, 2006.
  5. Koberlein B, Why the Asteroid Belt Doesn't Threaten Spacecraft, artículu na web Universe Today (12 de marzu de 2014).
  6. 6,0 6,1 How Did The Asteroid Belt Form? Was There a Planet There?, artículu na web CosmosUp (17 de xineru de 2016).
  7. Redd NT, Asteroid Belt: Facts & Information, artículu na web space.com (5 de mayu de 2017).
  8. Beatty K, Sculpting the Asteroid Belt, artículu na web Sky & Telescope (10 de marzu de 2009).
  9. Delgrande JJ, Soanes SV, Kirkwood Gaps in the Asteroid Orbits. Journal of the Royal Astronomical Society of Canada, 1943;37:187.
  10. Küppers M, O'Rourke L, Bockelée-Morvan D, Zakharov V, Lee S, Von Allmen P et al, Localized sources of water vapour on the dwarf planet (1) Ceres. Nature, 2014; 505(7484):525-7. doi:10.1038/nature12918
  11. 11,0 11,1 Harrington JD, Herschel Telescope Detects Water on Dwarf Planet - Release 14-021, noticia na web de la NASA (22 de xineru de 2014).