Discos L'Aguañaz

Discos L'Aguañaz
	sellu discográficu
Llocalización
Sede	Avilés
Direición	España
	Web oficial

Discos L'Aguañaz ye un sellu discográficu con sede n'Avilés, dedicáu a la música asturiana d'estremaos xéneros. Anguaño tres un alcuerdu empresarial t'asociada a Ediciones Ámbitu.

Historia

L'Aguañaz foi creada en 1993 por Xune Elipe y Fernando Rubio, componentes del grupu Dixebra, xunto a Piedad Gutiérrez. El nome del sellu remanez d'un topónimu de la Sierra'l Cuera, asitiada nel Oriente d'Asturies.

Tres finar el contratu que venceyaba a Dixebra cola discográfica FonoAstur, cola qu'espublizaron el so primer discu, Xune y Fernando deciden arriesgase y sacar adelantre'l proyeutu de L'Aguañaz. Nun entamu, los oxetivos cimeros del sellu son aidar a los nuevos grupos de música tradicional asturiana que fueren surdiendo (el lema de la empresa ye Los nuevos soníos d'un vieyu país) y al mesmu tiempu editar los socesivos trabayos de Dixebra, nun importante pasu haza l'autoxestión del grupu.

Nos sos diez primeros años de vida, L'Aguañaz edita más d'una trentena de grabaciones. Amás, hasta siete años depués de la so creación, el sellu nun solicita sovenciones al Gobiernu d'Asturies, amosando asina que ye posible sacar alantre una discográfica colos propios recursos.

N'ochobre de 2006, anúnciase oficialmente un alcuerdu pol cual L'Aguañaz s'integra como parte de la editorial Ediciones Ámbitu, formando «la mayor empresa asturianista».

Grupos

Ente los grupos qu'editaron discos con L'Aguañaz rescamplen les bandes de rock n'asturianu Dixebra, Avientu y Skama la Rede; y dientro'l folk una bayura formaciones como Corquiéu, Skanda, N'Arba, La Cigua, Brenga Astur Balandrán, La Col.lá Propinde o Cave Canem. Anabel Santiago figura moza de la tonada tamién graba cola discográfica.

Proyeutos

D'esta miente, dellos de los proyeutos más importantes del sellu foron les sos recopilaciones de música, ente elles:

L'asturianu muévese en 1997, u 20 grupos de rock de tol Estáu español canten los sos temes n'asturianu. Participen ente otros Koma, Jesus Cifuentes, Siniestro Total, La Polla Records, Boikot, Matamala, Nación Reixa, Joxé Ripiáu, Os diplomáticos....

Rock'n'llingua en 2004, onde se da una oportunidá a seyes grupos rock noveles que canten en llingua asturiana.

Dende 2000, L'Aguañáz edita L' Anuariu de la Música Asturiana(AMA), que recueye tolo asocedío cada añu al rodiu de la son n'asturianu.

Goxe Records

Per otru llau, L'Aguañaz cuenta col subsellu Goxe Records, dedicáu a la espublización de discos d'artistes menos rellacionaos col folk, como Toli Morilla, Anarquía Positiva o Dark la eMe.

Ver tamién

Referencies

Enllaces esternos

Páxina oficial de la discográfica Archiváu 2022-02-08 en Wayback Machine