Corquiéu

Corquiéu ye un grupu de música folk d'Asturies con lletres n'asturianu que se formó en 1998 en Ribeseya.

Corquiéu
Datos xenerales
Orixe	Ribeseya  Asturies
Información artística
Xéneru(os)	Folk
Periodu d'actividá	1998 - n'activu
Miembros
Jorge Ibáñez Blanca Sáenz Daniel Álvarez Gema García David Mateos Roberto Suárez Pablo Valdés
[editar datos en Wikidata]

Historia

El grupu Corquiéu entama l'andar musical nel añu 1997 en Ribeseya, daquella la formación taba perfecha por cinco miembros que xuncieron los sos estremaos gustos musicales. Iván Vega (xiblata traviesa de madera), Pablo Valdés (guitarra acústica), Roberto Suárez, (Gaita asturiana en sib), Paul Balmori (Baxu llétricu) y David Mateos (Bodhran y caxón) entamen a montar un repertoriu sofitáu en temes tradicionales asturianos y composiciones propies.

Nel branu del añu 1998 danse a conocer na “Folixa riosellana de la sidra” ente abondu públicu pa entamar una ringlera conciertos pel conceyu Ribeseyanu destacando'l conciertu entamáu nes Fiestes de San Miguel en “El Covayu”. Darréu d'estos conciertos, el grupu plantégase la grabación d'una maqueta p'asoleyar los cantares compuestos nesti periodu.

Nel añu 2000, aporta Gema García al grupu, lo que supón un nuevu finxu nel grupu qu'entama un repertoriu nuevu que se sofita en temes cantaos ya instrumentales, siendo'l famosu filólogu asturianu Xandru Martino Ruz, l'encargáu de pone-y lletra a la voz de Gema.

Esti mesmu añu y tres de tocar abondos conciertos per toa Asturies, el grupu graba dos temes de creación propio nun discu recopilatoriu de grupos asturianos nuevos: “Xeneración folk” col sellu discográficu L'Aguañaz, recibiendo l'aplausu incondicional del publicu.

N'avientu del añu 2001 Corquiéu asoleya'l so esperáu discu “La Barquera” nuevamente col sellu discográficu L'Aguañaz, nel qu'aconceyen 11 temes, la mayor parte composición de so que lleva un pieslle esperimental. Aporta al grupu'l violinista asturianu Rubén Bada. Nesti discu, Corquiéu amiesta tendencies d'anguaño col so particular estilu folk. Con esti discu, el grupu sopelexa'l so frescor y la so calidá na interpretación, siendo quien a alcontrar un furacu nel panorama folk asturianu. Los conciertos per Asturies y España van de siguío con acoyida cada vuelta mayor.

Nel 2002 Corquiéu participa nel prestixosu Festival Intercélticu de Lorient (Bretaña) faciendo dos conciertos representando a la música folk asturiana y amosando un direutu dinámicu y la so calidá, en teniendo en cuenta la rempuesta del abondosu públicu y la importante venta discos.

Nel añu 2003, el grupu desendolca la so primer xira per Hungría, Chequia, y Eslovaquia, nos sos cabezaleros festivales (Beltine festival de Bratislava y Gyor, Fono club de Budapest, festival de Praga). En mayu d'esi añu aporta al grupu'l violinista asturianu Frankie Delgado, perconocíu miembru fundador del grupu asturianu Beleño y por grabar col grupu Húngaru Fianna. Esti mesmu añu, el grupu participa nún de los festivales más famosos d'Europa, en Dinamarca (Tonder Folk Festival) tocando cinco conciertos y compartiendo cartelu colos grupos más prestixosos del mundu, (como; Flook, Altan, Wolfstone, Shooglenifty, Zar, The Cootars, Chip Tylor, Karen Casey...etc) recibiendo los aplausos de la crítica del festival, prensa y públicu y siendo'l grupu revelación del festival.

Nel añu 2004 siguen los viaxes per Europa rescamplando la participación nel Festival de “Les Anhinoises” en Liege (Bélxica) y el Festival del les islles Shettland (Escocia) au toquen cinco conciertos. En branu aporta al grupu'l flautista navetu Xurde Fernández y el grupu desendolca la so primer xira pel norte d'Italia nel ciclu de conciertos Andar per Música (Arenzano en Xénova, Montorio Veronesse en Verona, Pedrengo en Bergamo y Arzignano en Vicenza). En payares, fadríen tamién una xira per Holanda actuando nos principales teatros (Hoogeveen, Den Helder, An till, Leen Warden).

A lo cabero d'esi añu, el grupu recibe un premiu pol so llabor d'espardimientu de la música asturiana per Europa, entamau pol departamentu de migración del Principáu d'Asturies.

Darréu del ésitu del primer discu “La Barquera”, Corquiéu graba'l so segundu discu “Salia” col sellu “Tierra discos” de Xixón nel que s'acolumbra la evolución musical del grupu demientres los años anteriores. En "Salia" aporta cola flauta Xurde Fernández, tres l'abandonu del flautista y cofundador del grupu Iván Vega.

Nesti discu atópense 12 temes de creación propio, nos que se mecen el dulzor de la voz de Gema y la enerxía de los temes instrumentales. Vitalidá, enerxía, dinamesmu y dulzor son les pallabres que definen esti trabayu. La producción executiva ta fecha por Corquiéu. El productor musical foi Ígor Medio del grupu Felpeyu y como téunicu de soníu, el perconocíu productor escocés Grant Milne (Capercaillie, Tannahill Weaves, Alasdair Fraser, etc.). Tamién echaron un gabitu los músicos asturianos Ramón G. Morán (teclaos) y Horacio A. García (contrabaxu y baxu llétricu).

Nel branu del 2005 faen la so segunda xira per Italia, mentanto, nun paren los conciertos per Asturies y el restu del estáu, destacando'l festival llaniscu “Llanes al cubo”.

Nel entamu del añu 2006 Corquiéu recibe los premios AMAS de la música asturiana nes categoríes de Meyor discu folk 2005 por “Salia” y Meyor canción folk por “Ribeseyana”. Tamién reciben el so segundu reconocimientu pol so llabor de difusión de la música asturiana. En marzu participen na 7ª Nueche Celta d'Atter, Luxemburgu, compartiendo cartelu con Alan Stivel teniendo un ésitu pergrande y una venta de discos espectacular.

Anguaño'l grupu prepara'l so tercer discu y la so xira “SALIA” de conciertos na qu'actuarán en Normandía y otra vuelta Italia, amás de conciertos per Asturies y el restu del estáu nes sos cites más importantes. Amosar la incorporación al grupu de la violinista lleonesa Blanca Sáenz, el flautista mierense Dani Álvarez y, tres la marcha de Paul Balmori, el buzukista cántabru Jorge Ibáñez, que completen la formación de güei con un sofitu sólidu nos aspeutos vocal, rítmicu y melódicu.

Componentes

• Jorge Ibáñez, buzuki y baxu pedal.
• Blanca Sáenz, violín.
• Daniel Álvarez, flauta maera.
• Gema García, voz.
• David Mateos, bodhran y caxón.
• Roberto Suárez, gaita y low whistle.
• Pablo Valdés, guitarra.

Discografía

• LA BARQUERA (Discos L'Aguañaz, 2001)

1. La Xana
2. La Barquera
3. Onde vas por agua
4. Veriña
5. La Molinera
6. Tanda
7. Eita
8. Naguando por Asur
9. Saltón de Güexes
10. Lo Sueltu d'Ayer
11. Les Naranxes
12. Bonus: Onde vas por agua REMIX

• SALIA (Tierra Discos, 2005)

1. Ribeseyana
2. Frieras
3. Llara
4. Bargaz
5. Entaina
6. Viquina
7. Polques
8. Boriada
9. Tubería
10. País Silente
11. Fontaine
12. Gaita

• SUAÑA (Tierra Discos, 2010)

1. Llabios de miel
2. Bratislava
3. Alma balera
4. I&C
5. Muñeires de Ribeseya
6. Sahara
7. Anaxela
8. Suaña
9. Muñeires de Valdés
10. Romería
11. Bonus: Los suaños

Referencies

• Datos: Q2997859