Edurne Pasaban

Edurne Pasaban Lizarribar (1 d'agostu de 1973, Tolosa) ye una alpinista española y la primer muyer na historia en xubir a los 14 ochomiles (montes de más de 8.000 metros) del planeta y la ventena primer persona. Completó la so xesta en 9 años, dende la so primer ascensión a un ochomil nel Everest el 23 de mayu de 2001 a la postrera del Shisha Pangma el 17 de mayu de 2010.

Edurne Pasaban
Vida
Nacimientu	Tolosa, 1 d'agostu de 1973 (51 años)
Nacionalidá	España
Estudios
Estudios	Escuela Superior d'Alministración y Direición d'Empreses
Llingües falaes	vascu castellanu
Oficiu
Oficiu	alpinista, empresaria, podcaster
Llugares de trabayu	Barcelona
Premios	ver premio Sabino Arana  (2002) Distinción Lan Onari del Gobierno Vasco  (2009) Premio Reina Letizia  (2010) Premio Vasco Universal  (2010) Marca Leyenda  (2010) Medaya d'Oru de la Real Orde del Méritu Deportivu  (2010)
edurnepasaban.com y edurnepasaban.net

L'alpinista surcoreana Oh, Eun-Sun reclamaba completar antes l'ascensión a estes 14 visos, anque a la fin diéron-y la razón a la española. Síguen-yos l'austriaca Gerlinde Kaltenbrunner, que'l 23 d'agostu de 2011 completó los 14 ochomiles, anque toos ensin ayuda d'osíxenu, y siempres cola ayuda del so home. La tercera ye la italiana Nives Meroi con 11 cumes, esguilaos siempres en compañía del so home, Romanu Benet.

L'alpinista guipuzcoana cuenta davezu ente los sos principales patrocinadores col programa de Televisión Española (TVE) "Al filu de lo imposible", que la acompañó nos sos últimes ocho ascensiones.

Biografía

Ye inxeniera téunica industrial. Realizó darréu un máster de negocios na Escuela Cimera d'Alministración y Direición d'Empreses (ESADE) de Barcelona. De siguío, trabayó mientres cuatro años na empresa familiar dedicada a la construcción de maquinaria, compaxinándolo colos entrenamientos planiaos dende'l centru Kemen de Lazcano.

Na actualidá mora y trabaya en Barcelona impartiendo conferencies sobre superación personal en Esade, prepararse pa llograr el títulu d'entrenador personal y entrénase de forma diaria trés o cuatro hores nel Centru d'Altu Rendimientu de Sant Cugat (Barcelona). Amás, ye propietaria de  la casar-restorán de turismu rural Abeletxe, asitiada en Zizurkil (Guipúzcoa).

Entrena nesa paraxa. A los 14 años empezó a esguilar en roca nel club de monte de Tolosa y adulces foise enfusando nel mundu del alpinismu realizando ascensiones de mayor dificultá, como a los Pirineos, los Alpes (en dambos pasaba les sos vacaciones), Los Andes y l'Himalaya. En 1989, a los 16 años, viaxó per primer vegada a los Alpes, onde xubió'l Mont Blanc (4.810 metros), el Cervino (4.478 m.) y el Monte Rosa (4.614 m.). Con namái 17 años llegó al cume del Volcán Chimborazo, de 6.310 m. En 1994, con 21 años, de nuevu n'Ecuador, al Chimborazo sumó-y el Cotopaxi (5.897 m.), el Tungurahua (5.016 m.) y el Guagua Pichincha (4.971 m.). En 1996 treslladóse hasta'l Cordal Blancu de Perú y ente otros montes abolgó'l Neváu Ishinca (5.530 m.) y el Urús (5.495 m.).

En 1998 viaxó per primer vegada al Himalaya col club de monte de Tolosa ya intentó conquistar el so primeru ochomil, el Dhaulagiri (8.167 m.), pero tuvo qu'arrenunciar a falta de 272 metros pal visu pola nevadura acumulada, tardando diez años (hasta'l 1 de mayu de 2008) en poder algamar esti cume.

A finales del añu 2012 publicó'l llibru sobre coaching Oxetivu: Enfotu, onde se recueye la espedición al Everest en 2011.

El 23 de mayu de 2001 Edurne Pasaban algama'l visu del so primer ochomil, el Everest (8.848 m.), con ayuda d'osíxenu artificial, pela Vía de la Collada Sur, xunto con Silvio Mondinelli, Mario Merelli, Iván Vallina y Dawa II Sherpa.

Yera la so tercer tentativa, n'arrenunciando en dos espediciones anteriores (en 1999 y 2000), por cuestiones meteorolóxiques, pela Vía Mallory y ensin osíxenu suplementario, la postrera d'elles yá con Mondinelli y Merelli. Convertíase asina na tercer muyer española n'abolgar el Everest tres la lleidatana Araceli Segarra en 1996 y la viguesa Chus Lago en 1999.

N'ochobre de 2001 Pasaban intentó per segunda vegada esguilar el Dhaulagiri (8.167m) xunto colos alpinistes Carlos Soria Fontán, Pepe Garcés, Silvio Mondinelli y Mario Merelli, de nuevu ensin ésitu. Intentaben l'aguada Norte. Lo peor vien cuando, tornando d'un intentu de cume, Garcés muerre al esnidiar y cayer al vaciu.

De siguío encabezó nel mesmu mes un equipu qu'intentó'l rescate de los cadabres de cinco montañero vascos y navarros qu'acababen de finar nel Pumori (nel Himalaya), misión de la que tuvieron qu'arrenunciar debíu al gran peligru de desprendimientos.

El 16 de mayu de 2002 sumó'l so segundu ochomil, el Makalu (8.465 m.), al faer visu al pie de Silvio Mondinelli, Mario Merelli y Carlos Pauner. Ascensu pela Vía de los franceses”. Mientres el trekking d'aproximamientu al campu base fueren interceptaos por un grupu de guerrilleros maoístes, que-yos esixeron el pagu d'una cantidá de dineru.

Intenta ensin ésitu'l Annapurna pola paré Sur esa mesma temporada, en compañía de Mondinelli, Merelli, Pauner, Abele Blanc y Kristian Kuntner.

El 5 d'ochobre d'esi 2002, algamó'l cume del Cho Oyu (8.201 m.) al pie de Juanito Oiarzabal, Iván Vallina y José Ramón Aguirre Marrón. Conviértese entós na española con más "ochomiles".

En 2003 llogró cumplir los sos trés oxetivos: fixo visu'l 26 de mayu nel Lhotse (8.516 m.) con Vallina y Ion Goikoetxea, el 19 de xunetu algamó'l Gasherbrum II (8.035 m.) con Oiarzabal, Bereziartua y Aguirre y una selmana dempués, el 26 de xunetu, el Gasherbrum I (8.068 m., tamién conocíu como Hidden Peak), con Juanito Oiarzabal y Bereziartua. Nestos dos últimes ascensiones acompáñalu por primer vegada un equipu d'Al filu de lo imposible.

Dende entós programó con Oiarzabal el xubir al añu siguiente al K-2 (8.611 metros), nel que grabaron un documental pal programa "Al filu de lo imposible". Esti séptimu ochomil y ventenu primeru del alavés consiguieron xunto con Juan Vallina y Mikel Zabalza el 26 de xunetu de 2004 pol denomináu Espolón de los Abruzzos. Nel descensu Edurne sufrió la conxelación de dos falanges de los dos deos segundos de los pies y Juanito Oiarzabal de los diez deos de los sos pies, que tuvieron de ser toyíos en dambos casos selmanes más tarde na Mutua d'Accidentes de Zaragoza (MAZ), clínica especializada na conxelación de miembros, onde tuvieron internaos mientres quince díes.

Edurne Pasaban recibe'l Premiu Vascu Universal 2010

Ye una de los cinco muyeres -a fecha de mayu de 2010- qu'esguilaron el K2, xunto cola italiana Nives Meroi, la xaponesa Yuka Komatsu, la coreana Oh, Eun-Sun y la noruega Cecilie Skog, que vive pa cuntalo, pos la gran mayoría de les muyeres qu'algamaron esti visu finaron nel so descensu o n'ascensiones posteriores a otros montes, como la escelente escaladora polaca Wanda Rutkiewicz.

Partió de nuevu escontra l'Himalaya y el 20 de xunetu de 2005 esguiló'l Nanga Parbat (8.125 m.), en compañía de Josu Bereziartu, Marianne Chapuisat, Ester Sabadell ya Iván Vallina. La idea orixinal de la espedición yera intentar dempués el Broad Peak, pero la durez de la espedición al Nanga y l'anunciu de males condiciones climatolóxiques fixéron-yos arrenunciar del so segundu oxetivu. Al so regresu cayó nuna depresión mientres un añu y mediu que tuvo a puntu de face-y arrenunciar del so intentu de ser la primer muyer en xubir a los 14 ochomiles.

En recuperándose, el 12 de xunetu de 2007 atropó'l so novenu ochomil al rematar l'ascensu al Broad Peak (8.047 m.), anque falló nel so intentu d'algamar el Shisha Pangma (8.046 m.).

El 1 de mayu de 2008 algamó'l visu del Dhaulagiri (8.167 m.) y el 5 d'ochobre de 2008 algamó'l visu del Manaslu (8.156 m.), al pie de Alex Txikon, Asier Izaguirre, Mikel Zabalza, Ester Sabadell (que sufrió conxelaciones en dellos deos), Ferrán Latorre, Juanjo Garra y los sherpas Muktu, habitual nes espediciones de Pasaban dende 1998, y Pemba. En faciendo visu nel Manaslu, sumaba'l so oncenu ochomil de los catorce esistentes, igualando los que teníen entós l'austriaca Gerlinde Kaltenbrunner y la italiana Nives Meroi.

En concluyendo l'ascensión presentóse-y la oportunidá de xubir el Shisha Pangma (8.046 m., en China), ensin consiguilo, debíu nuevamente a la climatoloxía adversa, lo que podría suponer el so docenu ochomil. Esta vegada Edurne Pasaban y el so equipu pretendíen xubilo pela cara sur (la ruta británica), dempués de los dos fracasos d'años anteriores pela cara norte.

A finales de marzu de 2009 Edurne Pasaban partió escontra Nepal xunto colos sos compañeros d'espedición coles mires d'esguilar el Kangchenjunga, el primeru de los trés "ochomiles" que-y faltaben. Acompañáron-y na ascensión Juanito Oiarzabal, Ferrán Latorre, Alex Txikon, Asier Izaguirre, Jorge Egocheaga, Pasang Sherpa y Zangmu Sherpa. Pasaban xubió afeutada por una traqueobronquitis, lo qu'amenorgó les sos capacidaes hasta'l puntu de llegar al escosamientu'l segundu día del descensu. Latorre foi'l primeru en faer cume, sobre les 14:45 del 18 de mayu, Oiarzabal, Pasaban, Izaguirre y Pasang facieronloer dos hores dempués, a una hora considerada demasiáu tardida p'asegurase un descensu ensin problemes. Txikon diérase la vuelta al comprobar que se-yos fadría de nueche na baxada, y Egocheaga tuviera que baxar el día anterior al campu base al carecer bronquitis, cuando yá s'atopaba nel campu-4 (a 7.700 metros d'altitú). Edurne Pasaban convirtióse asina na cuarta muyer n'algamar el visu, tres la inglesa Ginette Harrison (en 1998), l'austriaca Gerlinde Kaltenbrunner (en 2006) y la surcoreana Oh, Eun-Sun (7 de mayu de 2009), que sumaba con ésti'l so décimu "ochomil", anque dalgunos tán en discutiniu. Nun esiste constancia de que lo llograra la famosa alpinista polaca Wanda Rutkiewicz, sumida en 1992 cuando intentaba l'ascensión pola cara suroeste d'esti peligrosu monte, de la que nun volvieron 40 de los montañeros qu'intentaron la so ascensión, la mayoría por causa de les bien frecuentes ábanos. Tres el cume pernoctaron nel campu-4, tres más de 24 hores d'esfuerciu. A otru día, cuando siguíen el descensu, Edurne Pasaban, escosa, sintió que les fuercies abandonábenlu y reconoz que llegó a pensar en rindise. Llogró completar el descensu gracies al esfuerciu de los sos compañeros y al osíxenu proporcionao por Oriol Riba, miembru d'otra espedición. En dichu descensu tanto ella como Alex Txikon sufrieron conxelaciones, qu'obligaron al so internamientu na clínica MAZ y de les que se recuperaron satisfactoriamente.

Col visu del Kangchenjunga Pasaban convirtióse na primer muyer en xubir 12 "ochomiles". Tres díes antes xubiera a esti monte Oh Eun-sun, qu'entós sumaba 10 "ochomiles". Gerlinde Kaltenbrunner igualó dos díes más tarde a Pasaban al faer visu nel Lhotse. Nives Meroi, qu'intentaba tamién algamar el visu nel Kangchenjunga y sumar el so docenu ochomil, tuvo qu'arrenunciar al amosar el so maríu, Romanu Benet, col que siempres escala, graves problemes físicos. A la vista de la so desventaxa y de les poques esperances de puesta recuperación d'ésti, declaró nel branu de 2009 que nun siguiría intentando convertise na primer muyer en xubir los catorce ochomiles.

Na seronda de 2009 Pasaban, en compañía de Ferrán Latorre, Alex Txikon, Asier Izaguirre, Pasang Sherpa y Zangmu Sherpa, intentó per cuarta vegada l'ascensión al Shisha Pangma (8.046 m), ensin ésitu, por cuenta de les desfavorables condiciones meteorolóxiques. La decisión d'abandonar l'intentu coincidió col fallecimientu de Roberto Piantoni, miembru d'una espedición italiana cola que compartieren el campu base. Los miembros de la espedición de Pasaban xuniéronse a los compañeros de Piantoni nel llabor de recuperar el so cuerpu.

El 17 d'abril de 2010, en redol a les 10:30 hora española (3,45 hores más en Nepal), algamó'l visu del Annapurna (8.091 m.), al pie de Asier Izaguirre, Alex Txikon, Joao Garcia y Nacho Orviz. El visu del Annapurna, que Edurne yá intentara con anterioridá en mayu de 2007, foi'l so decimotercer ochomil.

El 17 de mayu de 2010 coronó, no que yera'l quintu intentu de Edurne, el Shisha Pangma, completando d'esta miente los 14 ochomiles. Llegó al visu colos sos compañeros d'espedición Asier Izaguirre, Alex Txikon y Nacho Orviz,  tres  miembros d'una espedición italiana (Mario Panzeri, Michele Compagnioni y Alberto Magliano), y dellos miembros d'otros dos espediciones, española y xaponesa, respeutivamente.

Los 14 ochomiles coronaos

Ochomiles por orde cronolóxicu

1. Everest (8.848 m.), China/Nepal, 23 de mayu de 2001
2. Makalu (8.465 m.), China/Nepal, 16 de mayu de 2002
3. Cho Oyu (8.201 m.), China/Nepal, 5 d'ochobre de 2002
4. Lhotse (8.516 m.), China/Nepal, 26 de mayu de 2003
5. Gasherbrum II (8.035 m.), China/Paquistán, 19 de xunetu de 2003
6. Gasherbrum I (8.068 m.), China/Paquistán, 26 de xunetu de 2003
7. K2 (8.611 m.), China/Paquistán, 26 de xunetu de 2004
8. Nanga Parbat (8.125 m.), Paquistán, 20 de xunetu de 2005
9. Broad Peak (8.047 m.), China/Paquistán, 12 de xunetu de 2007
10. Dhaulagiri (8.167 m.), Nepal, 1 de mayu de 2008
11. Manaslu (8.156 m.), Nepal, 5 d'ochobre de 2008
12. Kangchenjunga (8.598 m.), India/Nepal, 18 de mayu de 2009
13. Annapurna (8.091 m.), Nepal, 17 d'abril de 2010
14. Shisha Pangma (8.027 m.), Tibet, 17 de mayu de 2010

La carrera por ser la primer muyer en coronar los 14 ochomiles

• Edurne Pasaban (1973, Tolosa, Guipúzcoa, España):
  • Abolgó los 14 ochomiles: Everest, Makalu, Cho Oyu, Lhotse, Gasherbrum II, Gasherbrum I, K2, Nanga Parbat, Broad Peak, Dhaulagiri, Manaslu, Kangchenjunga, Annapurna y Shisha Pangma.

• Oh, Eun-Sun (1966, Namwon, Corea del Sur):
  • Abolgó 14 ochomiles: Gasherbrum II, Broad Peak, Everest, Shisha Pangma, Cho Oyu, K2, Makalu, Lhotse, Manaslu, Dhaulagiri, Nanga Parbat, Gasherbrum I, Annapurna y Kangchenjunga.

• Gerlinde Kaltenbrunner (1970, Kirchdorf an der Krems, Baxa Austria, Austria):
  • Abolgó los 14 ochomiles ensin osíxenu: Cho Oyu, Makalu, Manaslu, Nanga Parbat, Annapurna, Gasherbrum I, Shisha Pangma, Gasherbrum II, Kangchenjunga, Broad Peak, Dhaulagiri, Lhotse, Everest y K2.

• Nives Meroi (1961, Bonate Sotto, Bérgamo, Italia):
  • Abolgó 11 de los 14 ochomiles: Nanga Parbat, Shisha Pangma, Cho Oyu, Gasherbrum I, Gasherbrum II, Broad Peak, Lhotse, Dhaulagiri, K2, Everest y Manaslu.
  • Fálta-y por xubir 3 ochomiles: Makalu, Kangchenjunga y Annapurna.

• Anna Czerwińska (1949, Varsovia, Polonia).
  • Abolgó 6 de los 14 ochomiles: Nanga Parbat, Monte Everest, Lhotse, Cho Oyu, Gasherbrum II y Makalu.
  • Fálta-y por xubir 8 ochomiles: Manaslu, Dhaulagiri, Broad Peak, K2, Shisha Pangma, Gasherbrum I, Kangchenjunga, y Annapurna.

• Kinga Baranowska (1976, Wejherowo, Polonia).
  • Abolgó 7 de los 14 ochomiles: Cho Oyu, Broad Peak, Nanga Parbat, Dhaulagiri, Manaslu, Kangchenjunga y Annapurna.
  • Fálta-y por xubir 7 ochomiles: Shisha Pangma, K2, Monte Everest, Lhotse,Gasherbrum I, Gasherbrum II y Makalu.

• Badía Bonilla (1968, Méxicu).
  • Abolgó 5 de los 14 ochomiles: Cho Oyu, Monte Everest, Lhotse, Gasherbrum II y Manaslu.
  • Fálta-y por xubir 9 ochomiles: K2, Gasherbrum I, Nanga Parbat, Broad Peak, Shisha Pangma, Makalu, Annapurna, Dhaulagiri y Kangchenjunga.

Premios

• Premiu a la mayor xesta deportiva del añu pa la Diputación Foral de Guipúzcoa en 2001.
• Premiu deportivu de la Fundación Sabino Arana en 2002.
• Premiu "Muyer y Deporte" a la meyor deportista femenina del añu n'España, concedíu per primer vegada pol Comité Olímpicu Español en 2005.
• Distinción Lan Onari dada en 2009 pol Gobiernu vascu en reconocencia al so trabayu.
• Marca Lleenda en 2010.

Condecoraciones

Distinción	Añu
Medaya d'Oru Real Orde del Méritu Deportivu	2010
Gallardón	Añu
Premiu Nacional del Deporte Meyor deportista española del añu»	2010

Ver tamién

• Wanda Rutkiewicz, considerada la meyor alpinista del sieglu XX
• Reinhold Messner, primer persona n'esguilar les 14 cumes de más de 8.000 metros
• Juanito Oiarzabal, primer español n'esguilar les 14 cumes de más de 8.000 metros
• Ochomil, llista de los 14 ochomiles de la Tierra y de los alpinistes que los xubieron per vegada primera
• Llista de los montes más altos
• Al filu de lo imposible, programa de televisión que los sos equipos acompañen a Edurne Pasaban nes sos espediciones.

Referencies

• Datos: Q253244
• Multimedia: Edurne Pasaban