Fernando Valle Roso

Fernando Valle Roso (1986, Llangréu) ye un cantador asturianu de tonada, que vien formando pareya cola so hermana, Marisa, amás de desarrollar trabayu en solitariu como intérprete.

Fernando Valle Roso
Vida
Nacimientu	Llangréu, 1986 (37/38 años)
Nacionalidá	España
Familia
Hermanos/es	Marisa Valle Roso
Estudios
Llingües falaes	castellanu
Oficiu	cantante de tonada
Premios	ver Premiu de la Crítica RPA

Biografía

Fernando Valle Roso entamó nel mundu de la tonada nel añu 2000, de la mano d'una de les voces más importantes del so momentu, Alfredo Canga. Dende entós tien algamao una buena riestra de premios nos meyores concursos de canción asturiana: La Nueva (2002 y 2003), L'Entregu (2003 y 2006), Amieva (2004) y Xixón (2004) en categoría xuvenil, y en categoría absoluta algamó un primer premiu nel apartáu de canción minera del Concursu de la Canción de les Mines de La Nueva (2007) y el tercer premiu en tonada renovada del Concursu y Muestra de Folclor Ciudá d'Uviéu (2008).

Los Hermanos Valle Roso vienen faciendo interpretaciones de tonada dialogada (como lo ficiera'l propiu Alfredo Canga xunto con Diagmina Noval) y de tonada a dos voces. Tienen grabaos dellos discos coleutivos con otros autores. Nel añu 2009 graben el so primer discu en solitario, Un pasu más, nel que dan un toque personal a la tonada tradicional. Esta grabación considérase una de les más interesantes de la década dientro del apartáu de renovación del xéneru de l'asturianada.

En 2012 sacó'l CD Camín d'ayures, que recibió'l Premiu de la Crítica RPA 2012 al Meyor Discu del Añu. Quince canciones que repasen la música tradicional, con arreglos mui curiaos, al delláu de pieces orixinales de Macu González o la conocida Carmina de Víctor Manuel.

Fernando asoleyaría'l so segundu trabayu en solitario nel añu 2016, col títulu Con estes y otres pallabres con lletres d'Ismael González Arias (sobre poemes d'Ana Ajmotova, Ibn Hazm de Córdoba y Constantin Kavafis) y d'Alberto Vega

Discografía

• Con estes y otres pallabres. A Mansalva. 2016
• Camín d'ayures. Every Good Song. 2012
• 13 X Mánfer. L'aguañaz. D. L.: AS-1254/11. 2011
• 25 clásiques de l'Asturianada. L'aguañaz. CDÑAZ 161. 2010
• Un pasu más. L'aguañaz. CDÑAZ 157. 2008
• Asturianaes. Fonográfica Asturiana. CD SFA-379. 2006
• La mina que nun cierra. Llibru-discu Foro por la Poesía de la Cuenca del Nalón. KRK EDICIONES. D.L.: AS-2380/06. 2006
• Con voz de muyer. Instituto asturiano de la mujer. Publicaciones Ámbitu. D.L.: AS-0671/04. 2004
• Cantares de mina. Ámbitu. CD-AM005. 2003

Enllaces esternos

• Páxina oficial de la casa discográfica

Referencies

• Datos: Q626897