Kajukenbo
El Kajukenbo ye un arte marcial híbridu que combina Boxéu, Yudu, Jujutsu, Kenpo Americanu, Eskrima, Tangsudo, y Kung Fu. Foi fundáu en 1947 nel pobláu Palama d'Oahu, Ḥawai. El propósitu orixinal del arte yera enfrentase con ésitu al crime llocal y aidar a la xente a defendese de los marineros de l'Armada de los Estaos Xuníos, que, cuando s’enfilaben, entamábenla colos paisanos. Los fundadores foron Sijo ("fundador") Adriano Emperado, Peter Young Yil Choo, Joe Holck, Frank Ordóñez y George Chang, que se daben pa sigo’l nome de “Black Belt Society”. A los fundadores del Kajukenbo pruyía-yos desendolcar un arte que "los fixera invencibles nes casi más abegoses de Ḥawai".
 | |
|---|---|
| Enfoque | Híbridu |
| Contautu/durez | Contautu plenu |
| País d'orixe |
 Estaos Xuníos d'América |
| Fundador | Adriano Emperado, Peter Young Yil Choo, Joe Holck, Frank Ordóñez, George Chang |
| Fecha de fundación | 1947 |
| Paternidá | Kenpo, Eskrima, Danzan-ryu Jujitsu, Boxéu, Chu'an Fa Kung-Fu, Yudu, Tangsudo |
| Deporte olímpicu | Non |
 | |
Historia
editarLos fundadores
editarCinco prauticantes d'artes marciales estremaes, que taben viviendo nes islles Ḥawai tres la Segunda Guerra Mundial, auniéronse pa crear un institutu de práutica qu'incluyera delles artes marciales:
- George Clarence Chang: profesor de boxéu chinu Sil Lum Kung Fu, estilu Shaolin del Norte y del Sur.
- Adriano Direuto Emperado: profesor de Kara-ho Kempo y esgrima filipina (eskrima).
- Joseph Joe Holck: profesor de Yudu Kodokan y Danzan-ryu Jujitsu.
- Frank F. Ordóñez: profesor de Yudu Kodokan y Sekeino Jujitsu.
- Peter Young Yil Choo: campeón ḥawaianu de boxéu occidental y maestru de Tangsudo, conocíu daquella como kárate coreanu (asemeyáu al taekwondo modernu).
Adriano Emperado (1926-2009) atrocó pa sigo’l títulu de Sijo (“fundador”).
Pa da-y un nome al sistema esbillaron les primeres sílabes de los nomes d'esos estilos que lu componíen nel aniciu:
- Ka, pol “Kárate coreanu”, ello ye, pol Tangsudo.
- Ju, pol Yudu (Judo) y pol Jujutsu, artes dambes d'orixe xaponés.
- Ken, pol Kenpo, d'orixe chinu y xaponés.
- Bo, pol Boxéu occidental, pero tamién pol boxéu chinu o Kung fu.
1945-1959
editarDe 1945 a 1947 estos cinco profesores punxeron a comuña los sos conocimientos, ensayando día tres día les posibles situaciones d'agresión que podíen atopase na vida real. Dempués decidieron llamar “kajukenbo” al sistema resultante y crearon la Black Belt Society (Sociedá de Cintos Negros), y darréu l'Institutu de Defensa Personal Kajukenbo. Col tiempu lo que s’enseñaba ende treslladóse a la costa oeste de los Estaos Xuníos, concretamente a la base aérea de Travis en California, au en 1958 el maestru Aleju Reyes abrió la primer escuela fuera de les islles Ḥawai. Dio clases especiales a los miembros del Exércitu del Aire de los Estaos Xuníos. Ún d'ellos foi’l profesor Richard Peralta, qu'escomenzó col kajukenbo en 1959.
En 1959, Sijo Emperado amestó más téuniques de wushu al kajukenbo, lo que camudó l'arte a una combinación fluyida de téuniques ”dures” y “suaves”.
Dempués de 1959
editarCharles Gaylord, Tony Ramos y Aleju Reyes, que recibieren el so cintu negru de manes d'Emperado, espardieron el kajukenbo pel continente americanu. Caún d'ellos abrió la so propia escuela de kajukenbo en California. En 1969, Tony Ramos prauticó con Bruce Lee y intercambió con él los sos métodos ya idees. Aleju Reyes morrió en 1977, y Tony Ramos morrió en Ḥawai en 1999. Nesi mediu tiempu Charles Gaylord centróse ensembre nel sistema, y acabó por inventar el llamáu "métodu de Gaylord." Ye presidente de l'Asociación de Kajukenbo d'América (Kajukenbo Association of America) y heriede de la continuación del arte del Sijo.
El so espardimientu pel restu’l mundu ye bien pequeñu, rellacionáu sobre too cola iniciativa d'unes poques persones que por razones de serviciu foron treslladaes a los llugares onde lu aniciaron.
N’España’l biltu semólu Edward C. Sheppard (un militar alumnu de Richard Peralta) qu'a primeros de los años 1970 foi unviáu a la Base Aérea de Torrejón de Ardoz, au entamó a dar clases d'esti sistema na fastera americana. En 1973 incorporóse a les sos clases Ángel García Soldado, figura decisiva del kajukenbo n’España darréu que d'él habrán provenir col tiempu tolos cintos negros españoles más antiguos. Dende 1986, col títulu de “Grand Master” (foi conseyeru de Sijo Emperado, y ye un de los pocos del conseyu habilidáu pa firmar el grau de novenu grau) Ángel García habrá ser l'encargáu d'estender el Kajukenbo per toa Europa. En 1978 otru alumnu d'Edward C. Sheppard llamáu René R. Rodríguez escomenzó a enseñar na llocalidá d'Alcalá d'Henares. Nesi añu principió como alumnu d'él Agustín López Campos. Cuando a René Rodríguez lu treslladaron a otra base, Agustín López siguió deprendiendo con GM Ángel García Soldado. En 1990 Agustín López conoció al profesor Richard Peralta (que morrió nel 2005) y fundó en 1991 otra Asociación Española de Kajukenbo. En resultancia güei síguense n’España dos llinies fundamentalmente: KSDI Europa, que sigue’l llinax d'Emperado a traviés del GM Ángel García y que prautica una evolución del Kajukenbo aceutada por Sijo; y el KSDS, que sigue les enseñances de Richard Peralta a traviés d'Agustín López Campos, con un Kajukenbo más tradicional .
El kajukenbo anguaño
editarEl kajukenbo actual tien más téuniques de prinda y más proyeiciones (téuniques pa valtar al oponente) qu'otres escueles de kenpo. Les sesiones de trabayu atienden muncho al acondicionamientu cardiovascular y al fortalecimientu funcional. Hai variaciones d'escuela a escuela, pero nun ye raro entrenar con sacos pesaos y con guantes de boxéu. Les téuniques de defensa del kajukenbo son una mecedura de golpes escoyíos d'estilos estremaos que nuna secuencia mortal lleven a la inmovilización, de cutiu definitiva, del oponente. Inclúin llaves a les articulaciones, golpes baxos y ataques combinaos. Anque tien dellos aspeutos competitivos, céntrase principalmente nel combate real, na eficacia y nel significáu de los análisis práuticos. En xeneral, les persones que prautiquen kajukenbo creyen que les aiciones innobles y desagradables, como los golpes a los güeyos o a los xenitales, son aceutables dafechu si agabitan a la defensa contra un agresor na cai. La mayoría de les escueles de kajukenbo refuguen los movimientos fachendosos y acrobáticos, que son poco práuticos. La mayoría de los currículos inclúin contrataques contra golpes de puñu y pierna, contra cuchiellos, contra palos, contra armes de fueu y contra prindes de llucha.
La base ye común pa estes escueles, lo que les fai asemeyaes enforma, pero permítense los camudamientos a los deleres d'elles. Teniendo en cuenta les diferencies ente los cuatro estilos fundacionales del kajukenbo, faise imposible incorporalos ensembre y, pela cueta, ye inevitable un ciertu grau d'especialización. Esta apertura nel enfoque tiende a afalar a les escueles pa qu'incorporen otres artes nes sos práutiques. Dellos exemplos son la esgrima filipina y l'aikido xaponés.
Dalgunes escueles de kajukenbo carauterícense por tener 26 formes ("kata") dividíes en 13 pinyans llamaos a veces Palama sets: los conxuntos (de secuencies) de Palama; asina como en 13 "concentraciones". Cada "concentración" tien el so propiu nome, por exemplu la númberu ún llámase "golpe de la grulla/garra del tigre." El nome de cada "concentración" describe’l movimientu carauterísticu de so. Poro, la primer concentración inclúi un golpe de grulla y una garra de tigre. Estes secuencies amestáronse al kajukenbo p'ameyorar les habilidaes del estudiante. Cada movimientu d'estes formes tien la so función. Por exemplu, el primer movimientu en "pinyan 1" ye’l golpe de derecha haza fuera moviéndose a una posición cola pierna izquierda atrás. Esti movimientu pue aplicase pa bloquiar un puñetazu. Dellos kates céntrense tamién nel combate contra dellos enemigos.
Una parte importante en delles clases de kajukenbo ye la “Oración del Kajukenbo”, escrita por Frank Ordóñez, anque munches escueles son llaiques dafechu. En delles clases acostúmase a finar la sesión con una referencia a la trinidá del kajukenbo: espíritu, mente y cuerpu (caún col so propiu xestu de manes). Dempués de la trinidá los estudiantes y instructores al empar abren les sos manes pa representar la paz y darréu inclinen les cabeces en señal de respetu. Nos vezos de manches escueles faise tamién un saludu carauterísticu: los estudiantes saluden a la bandera americana y a los sos instructores p'amosar respetu. Los estudiantes y instructores al empar saluden a los cintos negros cuando entren na sala.
Carauterístiques téuniques
editarLo Duro y lo Suave
editarLes artes marciales tradicionales estrémense polo xeneral según dos categoríes: les artes marciales esternes, o estilos duros, como’l kárate y el yudu; y les artes marciales internes, o estilos suaves, como’l tai chi chuan y el qigong. Los estilos suaves básense nel principiu d'absorber la enerxía de los golpes al envís de tornala más fácilmente a la escontra del contrariu, mentanto los estilos duros respuenden a los adversarios cola fuercia y con bloqueos “secos”. Cada categoría esfíciase nel so principiu básicu.
El kajukenbo amiesta dambos principios, duru y suave, porque ello aumenta les posibilidaes de respuesta y facilita les capacidaes d'adautación a les estremaes situaciones a les qu'un prauticante pue enfrentase.
La percusión múltiple
editarEl kajukenbo ye un estilu de kenpo orientáu a la defensa personal eficaz en situaciones reales, en visu a valtar al agresor y ponese fuera de peligru. Nun enfrentamientu real nun ye seguro que los golpes puedan dar nel blancu. P’aumentar les posibilidaes de llograr l'oxetivu, les téuniques de kajukenbo tan formaes por una restrayada de golpes, una decena o más, solmenaos a los puntos vitales del cuerpu.
El “checking”
editarUna de les especialidaes del kajukenbo ye’l “checking”. Checking significa control. Trátase, poro, d'un control del movimientu del adversariu cola aida d'un bloquéu que se fai por contautu y/o presión.
Los “checkings” atópense en cuasi toles téuniques de kajukenbo. Igual que pueden torgar la movilidá del oponente y los contrataques d'ésti, presten tamién pa “rellenar” los espacios de tiempu que queden ente dos golpes. Ufren tamién al prauticante la oportunidá d'aprovechase d'un pocoñín de tiempu pa decidir el movimientu siguiente (llocalización, intensidá…).
Los puntos vitales
editarAsina mesmo, al envís de llograr mayor eficacia, los golpes en kajukenbo empónense principalmente a puntos vitales. Pueden causar el “ko” del oponente o mancadures graves, o inclusive provocar la muerte.
Les armes
editarEl kajukenbo ye un sistema de defensa a mano vacía contra tou tipu d'ataques (con o ensin armes). Integra tamién el remanamientu de les principales armes del kali adautándolu al contestu d'esta dómina. L’oxetivu principal ye siempre consiguir una defensa personal realista.
En xeneral hai tres tipos de defensa contra armes: mano vacía contra cuchiellu, palu contra cuchiellu y cuchiellu contra cuchiellu.
Mano vacía contra cuchiellu
El deprendimientu de la defensa a mano vacía contra una agresión con cuchiellu básase en téuniques de bloquéu y de desarme en visu a amenorgar el númberu y la gravedá de les firíes que pue recibir un prauticante nuna situación real d'agresión.
Esta riestra de téuniques cubre tolos tipos posibles d'ataque, ensin importar l'ángulu o la trayeutoria del arma; por exemplu circular al pescuezu o de pinchu al vientre.
Palu contra cuchiellu
El kajukenbo apriende de los distintos estilos filipinos d'eskrima, como’l “Doce Pares” o’l “Lameco”. Les téuniques de palu aseméyense daqué a les de mano vacía, porque tienen igualmente por oxetivu desarmar al oponente.
Les téuniques de palu permiten trabayar en distancies más grandes y, poro, más segures. El llargor que da’l palu aumenta tamién la fuercia y la potencia d'impautu. Sobre too apriéndese a cutir nes articulaciones, porque estos son los golpes que favorecen el desarme y que dexen inútil el brazu del oponente.
Les téuniques de palu del kajukenbo nun siguen ensembre les de los estilos d'orixe. A la práutica del kajukenbo incorporáronse les más afechisques pal so funcionamientu lóxicu y les que se trabayen fácil nuna orientación de defensa personal.
Cuchiellu contra cuchiellu
Escuéyense principalmente na eskrima filipina, anque’l kajukenbo dexa sólo les más simples y eficaces. L’oxetivu ye desarmar al adversariu y controlalu al envís de que dexe de ser un peligru.
Los Palama sets
editarComo ya se dixo, trátase de formes asemeyaes a los kates o a los tao que puen atopase nes artes marciales orientales tradicionales, magar que tamién s’inspiren nel trabayu del “boxéu de sombra”, una forma d'entrenamientu del combate al aire. El so deprendimientu tien por oxetivu que l'estudiante desarrolle la estabilidá, la precisión y el propiu estilu.
Rapidez, precisión, potencia y adautación
editarLa respuesta a l'agresión hai que la facer d'una manera mui rápida y esplosiva al envís de sorprender al enemigu y da-y el menor tiempu posible a reaicionar. El kajukenbo ta diseñáu pa ser eficaz cualquiera que sía la distancia a la que ta l'oponente. Con esti fin, el kajukenbo trabaya distintos tipos de movimientos: golpes, torcimientos, proyeiciones, inmovilizaciones, etc.
En kajukenbo trabáyase siempre a la gueta de la eficacia en casu de combate real. Los entrenamientos tienen por oxetu algamar la condición física necesaria p'aguantar el tiempu d'una engarrada caleyera. Les téuniques trabáyense al envís de desendolcar los reflexos que presten pa saber qué facer neses situaciones. Trabáyense con tinu respetando siempre lo específico de caún (según sía unu más pequeñu, más grande, de brazos menos fuertes…).
Polo tanto’l kajukenbo nun s’enseña ríxidamente como otres artes marciales, au l'oxetivu ye reproducir lo más fielmente posible los movimientos realizaos pol maestru. El kajukenbo tien l'oxetivu de dotar a cada prauticante de téuniques eficaces independientemente del so tamañu o de les sos capacidaes.
Graos y títulos d'enseñanza
editarAnque les distintes escueles usen graos y títulos diferentes, que varien enforma a vegaes, síguese davezu un sistema de cintos de colores pa los graos más baxos (perbaxo’l negru) asemeyáu al de les artes marciales d'orixe oriental.
En cuantes a los cintos negros, estos usen títulos d'enseñanza d'orixe chinu. Los de primer (cintu negru a cencielles) a segundu grau usen el títulu de "Sibak" (Asistente del Profesor; llit. “Tíu Mayor”) o "Sisuk" (Instructor Mozu). De tercer a quintu grau usen el de "Sifu" (Instructor; llit. “Güelu”), o "Simu" (Instructora o Muyer del Instructor) si ye muyer. Al sestu y séptimu grau llámenlos "Sigung" (“Tíu del Instructor”). Los cintos negros d'octavu grau son "Profesores", y el novenu grau ye un "Grand Master" (GM, Gran Maestru). Pal fundador, Adriano Emperado, atrocóse’l títulu de "Sijo" (Fundador; llit. “Gran Güelu”), col décimu grau de cintu negru.
Referencies
editarEnllaces esternos
editar- AKCM.wordpress.com (Asociación de Kajukenbo de Castiella-La Mancha).
- Asociación Madrilana de Kajukenbo.
- Sitiu d'Adriano Emperado.
- Sitio de l'Asociación Española de Kajukembo, dirixida pol profesor Agustín López Campos
- KSDI Francia.
- KSDI Belgia.
- Asociación de Kajukenbo en Méxicu.
- Kajukenbo.org.
- Foru de kajukenbo nos Estaos Xuníos Archiváu 2009-06-15 en Wayback Machine.
- KajukenboCanarias.com.
- Asociación Catalana de Kajukenbo Archiváu 2011-01-09 en Wayback Machine.
- Sitiu d'Ángel García-Soldado Archiváu 2007-09-09 en Wayback Machine.
- KajukenboHispano.com Archiváu 2011-02-07 en Wayback Machine.
- Escuela Española de Kajukenbo Kahuna, en Madrid.
- Páxina de la Sigung Ángela Blanco Archiváu 2020-02-02 en Wayback Machine.
