Mánfer de la Llera

Manuel de Andrés Fernández (7 d'abril de 1918, Llangréu – 6 d'abril de 2005, Xixón), más conocíu pol nomatu lliterariu Mánfer de la Llera, foi un escritor asturianu.

Mánfer de la Llera
Mánfer de la Llera en 1991
Vida
Nacimientu	Llangréu, 7 d'abril de 1918
Nacionalidá	España
Muerte	Xixón, 6 d'abril de 2005 (86 años)
Familia
Fíos/es	Ramón d'Andrés Vital d'Andrés
Estudios
Llingües falaes	castellanu asturianu
Oficiu	escritor

Nació en Les Cuestes, Ciañu, Llangréu, en 1918 y morrió en Xixón nel 2005 a la edá de 86 años. Escritor n'asturianu, ye autor de seis llibros onde emplega la prosa y el versu, ente ellos Cielo bajo tierra (1982), Garrapiellu lliterariu asturianu (1983), Cabalgando sol tiempu (1990), Coses vivíes (1998) y La mio prosa atada en versu (2002).

Trabayador nes mines de carbón del centru d'Asturies, dase a conocer como escritor de monólogos humorísticos y poesía costumista, acordies cola mena de lliteratura qu'avezaba a escribise nos años de la posguerra, cuando Manfer de la Llera espubliza los sos primeros versos en 1953. Más tarde va interesase polos temes de la mina, de los que traten la mayoría de los sos llibros; nellos axunta la denuncia social, la reivindicación del idioma asturianu y la quexa esistencialista en formes poemátiques que s'averen davezu a la prosa. Bona parte de los sos escritos vieron la lluz na prensa periódico d'Asturies y porfolios de fiestes del so Llangréu de nacencia.

Foi miembru de l'Academia de la Llingua Asturiana y pá de dos autores en llingua asturiana: Vital d'Andrés y Ramón d'Andrés. Con esti últimu escribió Mánfer de la Llera un "Vocabulariu asturianu de la mina", espublizáu por "Alborá" en 1997. En 1998 apaez na antoloxía El cuentu asturianu tres la guerra d'Antón García, xunto a los más destacaos narradores asturianos de posguerra, y asoleya "Coses vivíes", unes memories onde recueye vivencies de los abegosos tiempos d'enantes y depués de la guerra.

Activismu social y cultural

Mánfer de la Llera foi tamién conocíu poles sos xeres n'iniciatives y movimientos sociales y culturales nos años 70 y 80 del sieglu XX, como l'Asociación Regional de Pensionistas de Asturias (ARPA), el coleutivu de defensa del idioma asturianu Conceyu Bable (del que foi presidente) o'l movimientu vecinal de Xixón.

Obra

• Cielo bajo tierra : (prosa y versos de la mina) / Manuel d'Andrés Fernández. — Xixón : l'autor, 1982.

• Garapiellu lliterariu asturianu: (cuentos y poemes) / Manuel d'Andrés Fernandéz (Mánfer de la Llera). — [S.l. : s.n.], 1983 (Xixón : Gráf. Posada).

• Cabalgando sol tiempu / Mánfer de la Llera. — Uviéu : Academia de la Llingua Asturiana, 1990. — (Llibrería académica ; 17).

• Coses vivíes / Manuel d'Andrés Fernández. — Xixón : Alborá, 1998.

• La mio prosa atada en versos / Manuel d'Andrés Fernández. — Uviéu : Publicaciones Ámbitu, 2002.

• Cróniques y suaños / Mánfer de la Llera. — Uviéu : Trabe, 2004.

• Monólogos d'ente dos sieglos / Mánfer de la Llera. — Uviéu : Publicaciones Ámbitu, 2005.

• En cata de la mio lluna. Antoloxía lliteraria / Manuel d'Andrés Fernández / Severino Antuña (editor literario). — Uviéu : Trabe / Gobiernu del Principáu d'Asturies, 2011.

Investigación

• Vocabulariu asturianu de la mina / Ramón d'Andrés Díaz, Manuel d'Andrés Fernández. — Xixón : Alborá Llibros, 1997. — (Llibros del país ; 2)

Bibliografía

• Carmen Díaz Castañón, Lengua y Literatura, Xixón, Júcar, 1981, p. 274.

• Antón García, El cuentu asturianu tres la guerra, Uviéu, Trabe, 1998, p. 120.

• Xuan Xosé Sánchez Vicente, Crónica del Surdimientu, Uviéu, Barnabooth, 1991, páxs. 56–57-

Enllaces esternos

• Páxina d'Araz.net sobre Mánfer de la Llera
• Reseña d'El País sobre Mánfer de la Llera pol so fallecimientu

• Datos: Q9048044