Materialismu históricu

La espresión concepción materialista de la historia (tamién nomada materialismu históricu) ye un conceptu acuñáu pol marxista rusu Georgi Plejánov, que fai referencia al marcu conceptual identificáu por Karl Marx y usáu orixinariamente por elli y y Friedrich Engels pa comprender la historia humana^[1].

Parte de la serie sobre
Marxismu

Conceutos fundamentales

Materialismu dialéuticu

Medios de producción

Mou de producción

Plusvalor

Rellaciones de producción

Socialismu

Teoría del valor trabayu

Otros enllaces

Marxistes

Economía marxista

Magar que'l materialismu históricu ta perxuníu al comunismu marxista munchos historiadores, sociólogos ya intelectuales non comunistes tomaron elementos d'elli pa ellaborar sistemes y enfoques materialistes pal estudiu de la Historia.

...na producción social de la so vida los homes establecen determinaes rellaciones necesaries ya independientes de la so voluntá, rellaciones de producción que correspuenden a una fase determinada de desarrollu de les sos fuercies productives materiales. El conxuntu d'estes rellaciones de producción forma la estructura económica de la sociedá, que ye la base real sobre la que se llevanta la superestructura xurídica y política y a la que-y correspuenden determinaes formas de conciencia social. El mou de producción de la vida material condiciona el procesu de la vida social, política y espiritual en xeneral. Asina, nun ye la conciencia del home la que determina el so ser sinón, pol contrariu, ye'l ser social lo que determina la so conciencia.

Karl Marx, Prólogu a la Contribución a la Crítica de la Economía Política (1859)

Antecedentes

La teoría materialista de Marx reconoz múltiples influencies intelectuales y sociales:^[2]

Del filósofu alemán G. W. F. Hegel, el so métodu dialécticu.^[3]
De los filósofos materialistes de la Ilustración, la idea de la influyencia de les circunstancies y de la educación sobre les persones.
De los historiadores franceses del periodu de la Restauración, los conceptos de clase social y llucha de clases.^[4]
Del economista inglés David Ricardo la fundamentación económica de les contraposiciones de clase y la teoría del valor-trabayu.
Del socialista francés Pierre-Joseph Proudhon l'énfasis nel proletariáu como la clase revolucionaria de la dómina.
Del socialismu reaccionariu, la crítica amarga de los ideales del lliberalismu.
Del socialismu de Sismondi, la crítica de les consecuencias antisociales del réxime burgués.
De la izquierda hegeliana y del filósofu Feuerbach, la crítica de la filosofía especulativa y la idea de la relixón como resultáu de l'ayenación de la esencia humana.^[5]
De la Revolución francesa y de Blanqui, la doctrina de la dictadura revolucionaria.
De los cartistes ingleses, la importancia de la llucha política pa la clase obrera.
Del socialismu utópicu, los sos oxetivos caberos: l'abolición de les clases sociales.

La xénesis del materialismu históricu

El propiu Marx cuntó, nel so Prólogu a la Contribución a la Crítica de la Economía Política (1859),^[6] l'itinerariu de los estudios que-y llevaron a formular la so concepción de la historia, que llueu había desarrollar col so amigu y collaborador Friedrich Engels.

El primer trabayu qu'emprendí pa resolver les dudes que tenía foi una revisión crítica de la filosofía hegeliana del derechu, trabayu del que la introducción apaeció en 1844 nos “Anales francoalemanes”, que se publicaben en París. La mio investigación llevome a concluyir que nin les rellaciones xurídiques nin les formes d'Estáu pueden comprendese por sigo mesmes ni pola nomada evolución xeneral del espíritu humanu, sinón que, pol contrariu, radiquen nes condiciones materiales de vida que Hegel, siguiendo'l precedente de los ingleses y franceses del sieglu XVIII, axunta embaxu'l nome de “sociedá civil”, y que l'anatomía de la sociedá civil hai que la buscar na economía política. En Bruxeles, aú me treslladé tres de ser desterráu pol señor Guizot, siguí colos estudios d'economía política qu'escomenzara en París.

Karl Marx y Friedrich Engels.

Marx tamién detalla, nesi mesmu testu, el desarrollu d'esta nueva concepción de la historia a partir de la so cooperación intelectual con Engels. Noma como testos qu'usen esta concepción los que vienen darréu:

L'ensayu d'Engels sobre la crítica de les categoríes de la economía política que se publicara nos Anales franco-alemanes.
El llibru d'Engels La situación de la clase obrera n'Inglaterra (1845).
La ideoloxía alemana, primer testu, inéditu, de Marx y Engels (1846).
El Manifiestu del Partíu Comunista, de 1847, escritu xunto con Engels.
Discursu sobre el llibrecambiu (1848)^[7].
Miseria de la Filosofía, obra polémica publicada en 1847 como rempuesta al llibru de Proudhon Filosofía de la Miseria.

Ente les categoríes teóriques centrales del materialismu históricu tenemos: fuercies productivas, rellaciones de producción, mou de producción, esplotación, ayenación, llucha de clases, plusvalor, y fetichismu de la mercancía.

El materialismu históricu: idees principales

El materialismu históricu parte d'una realidá fundamental soxacente a la esistencia humana: que pa que los homes puedan sobrevivir y continuar la so esistencia xeneración tres xeneración ye necesario que produzcan coses que satisfagan los requerimientos materiales de la vida. Marx estendió esta premisa afitando la importancia del fechu de que, pa llevar a cabo la producción y l'intercambiu de bienes materiales, les persones acaben encuadraes nún marcu de rellaciones sociales perdefiníu, les rellaciones de producción.

Pero la producción nun ye daqué abstracto, y ún nun se integra neses rellaciones de producción aleatoriamente o nel llugar nel qu'ún escueye. La humanidá trabaya, pero non toos faen lo mesmo: hai una división del trabayu na que nun ye namái que diferentes persones faigan distintos trabayos, sinón que, según la teoría marxista, hai xente que vive del trabayu de los otros porque controla los medios de producción. Cómo se organiza esa estraición del trabayu ayenu camuda en función del tipu de sociedá na que nos alcontremos, pero la producción desarróllase siempres al traviés de rellaciones perbién definíes, que tán determinaes pol nivel y el calter de les fuercies productives presentes nún momentu determináu de la Historia. Fuercies productives son, pa Marx, los medios de producción como les ferramientes, la teunoloxía, la tierra o les materies primes, pero tamién el conocimientu y les habilidaes pa usalos pa la producción de bienes.

Los escritores que s'identifiquen col materialismu históricu suelen defender que la sociedá, al traviés de la Historia, tien pasao por un garapiellu de tipos distintos de modos de producción. Los principales que Marx identificó inclúin: el comunismu primitivu o sociedá tribal (una estaya prehistórica), la sociedá antigua, el feudalismu y el capitalismu. En caún d'ellos el sobrante de la producción ye estrayíu de les clases dependientes d'una forma diferente. La sociedá antigua basábase nuna clase dominante de propietarios d'esclavos y notra, dependiente, d'esclavos; el feudalismu basábase nuna clase de propietarios de tierres y otra de siervos; y el capitalismu nuna clase de capitalistes y otra d'obreros o proletarios. La clase capitalista tien la propiedá de los medios de producción, distribución ya intercambiu, mentantu que la clase trabayadora gánase la vida vendiendo la so fuercia de trabayu a los capitalistes a cambiu d'un salariu.

Marx identificó les rellaciones de producción como la base económica de la sociedá, y esplicó tamién que a partir d'esa base económica nacen determinaes instituciones polítiques, lleis y cultures, pero tamién idees, formes de pensamientu y normes morales. Too eso forma la superestructura política ya ideolóxica de la sociedá. Ésta nun ye namái que tea'l so orixe na base económica, sinón que les sos carauterístiques correspuenden n'últimu términu al calter y grau de desarrollu d'esa base económica. O, por dicilo d'otra manera, la forma na que les persones organicen la sociedá ta determinada pola base económica y poles rellaciones sociales qu'emerxen del so mou de producción.

Los principios fundamentales del materialismu históricu, en fin, podíen resumise asina:

La base de la sociedá humana ye la forma na que los humanos trabayen sobre los recursos naturales pa producir los medios de subsistencia.
Hai una división del trabayu en clases sociales (rellaciones de producción) que se basen nel fechu de que dalgunos, que tienen la propiedá de los medios de producción, viven del trabayu d'otros.
El sistema de división en clases depende del mou de producción, y este pela so parte básase nel nivel algamao poles fuercies productives.
La sociedá va evolucionando d'una etapa a otra cuando la clase dominante ye desplazada por una nueva clase emerxente. Esto ocurre cuando la superestructura social que soporta les vieyes rellaciones de producción ye inadecuada pa responder a les demandes creaes poles nueves fuercies productives. Produzse entós, a nivel políticu, una revolución pola que la clase dominada llibera les fuercies productives y establez nueves rellaciones de producción, y tamién un nuevu marcu de rellaciones sociales a partir d'elles.

La so aplicación científica y política

El materialismu históricu investiga la sociedá humana, y tenta de facelo ensin presupuestos ideolóxicos, sinón partiendo de los individuos empíricos y les rellaciones que s'establecen ente ellos.^[8] Al contrario de los enfoques qu'amuesen el capitalismu como un sistema estáticu o como'l productu final d'una evolución "natural" del ser humanu, la investigación histórico-materialista revela el so calter históricu, y polo tanto transitoriu, nel desarrollu de la humanidá.

Marx y Engels aplicaron esta nueva concepción de la historia al analís de los fechos políticos y sociales del pasáu y de la so dómina y a la creación de una nueva corriente del socialismu, qu'añadía al so apueste pol comunismu y la llucha de clases proletaria l'estudiu científicu de la sociedá burguesa y de la transición d'esta a la sociedá comunista.^[9] Esplicando les revoluciones políticas y sociales al traviés de la contradicción ente les fuercies productives y les rellaciones de producción y pola llucha de clases Marx y Engels combatieron tanto la visión burguesa de la historia basada na historia de les idees y de los "grandes homes" como les corrientes socialistes que deducíen la llucha pol socialismu a partir de los ideales abstractos de Xusticia, Llibertá ya Igualdá.^[10] El desarrollu revolucionariu de les fuercies productives embaxu'l comunismu permitía la satisfaición de toles necesidaes humanes, y tamién que'l desarrollu de la producción prescindiera de la división de la sociedá ente clases esplotadores (les propietaries de los medios de producción) y clases esplotaes (obligaes a mantener a les anteriores mediante'l plusvalor obteníu a partir del so trabayu). Con esti plantegamientu el comunismu podía concebise yá non como una aspiración utópica sinón como una necesidá histórica, una y bones les propies contradicciones internes del capitalismu facíen necesario revolucionar les rellaciones de producción burgueses y creaben al empar al suxetu históricu capaz del cambéu: el proletariáu.^[11]

Asina, el materialismu históricu, na formulación de Marx, nun puede separtase de la llucha de la clase proletaria pol comunismu.^[12] Sicasí, esto nun significa que les sos conclusiones (sobremanera nel campu económicu) nun seyan científiques. Sonlo, pero nun tán empobinaes a formar parte d'una ciencia "neutral", sinón a producir un conocimientu científicu útil pa la lliberación proletaria.^[13]

Evolución posterior del materialismu históricu nel marxismu

Engels y el materialismu históricu

Tres de la muerte de Marx, Engels continuó cola so actividá política ya intelectual na aplicación y divulgación de la concepción de la historia que desarrollara con Marx. Na so obra Del socialismu utópicu al socialismu científicu de 1880,^[14] diz:

La concepción materialista de la historia parte de la tesis de que la producción, y tres d'ella el cambéu de los sos productos, ye la base de tol orde social; de qu'en toles sociedaes qu'hubo na Historia la distribución de los productos, y al empar la división social de los homes en clases o estamentos, ta determinada polo que la sociedad produz, por cómo lo produz y por cómo cambia los sos productos. Según eso, les causes últimes de tolos cambeos sociales y de toles revoluciones polítiques nun hai que buscales na mente de los homes nin na idea qu'ellos tengan de la verdá eterna o de la eterna xusticia, sinón nes tresformaciones operaes nel mou de producción y de cambiu; han de buscase non na filosofía, sinón na economía de la dómina de que se trata. Cuando priende na mente de los homes la conciencia de que les instituciones sociales esistentes son irracionales ya inxustes, de que la razón convirtióse en sinrazón y la bendición en plaga, esto ye una señal de que nos métodos de producción y nes formes de cambiu produciéronse, selemente, tresformaciones coles que l'orde social, formáu a partir del molde de les condiciones económiques anteriores, yá nun concuerda. Poro, nes nueves rellaciones de producción han de contenese yá -más o menos desarrollaos- los medios necesarios pa poner acabación a los males descubiertos. Y esos medios nun han de sacase del maxín de naide, sinón que ye'l maxín el que tien que descubrilos nos fechos materiales de la producción según los ofrez la realidá.

Esta concepción, sicasí, foi distorsionada por dalgunos, entá en vida de Marx, hasta convertila nun simple determinismu económicu. Engels denuncia esti fechu na so carta a Joseph Bloch de 1890, na que, magar que reivindica que la causa última de los cambeos sociales ta nes condiciones económiques, refuga qu'esta influyencia seya unilateral ya inmediata y tamién que seya posible desplicar caún de los cambios sociales a partir de la economía. Y almite qu'esta malinterpretación economicista del materialismu históricu débese a que, na so polémica colos socialistes utópicos y otros grupos que negaben la influyencia de la economía nos cambeos sociales, Marx y elli tuvieron qu'emponderar el rol de les condiciones económiques a costa de dexar de llau la importancia que tienen tamién les condiciones extraeconómiques.^[15]

De teoría revolucionaria del proletariáu a ciencia positiva

Karl Korsch afirma, nes sos obres Marxismu y filosofía (1923) y Karl Marx (1938), que'l materialismu históricu marxianu, na forma na que foi heredáu pola socialdemocracia alemana, perdió'l so calter de teoría crítica con finalidá práutica pa pasar a ser una doctrina d'analís positivu de la realidá y, poro, el fundamentu d'una ciencia positiva. Pa Korsch esa esviación tien el so guañu nel marxismu orixinal pola dependencia d'esti de la filosofía heredada de la burguesía y pola influyencia, en Marx y Engels, de la tradición revolucionaria xacobina de la revolución francesa.

Por culpa d'esta disociación ente la teoría histórico-materialista y la so aplicación pa la llucha de clases proletaria foi afitándose la creyencia de qu'esta dialéutica podía ser usada como elementu pa la investigación científica positiva inclusive fuera del campu de les ciencies sociales. Un exemplu d'ello alcontrámoslo na obra d'Engels Dialéutica de la naturaleza.

Otros enfoques materialistes de la historia

Hai, aparte del materialismu históricu de Marx, otros métodos d'investigación histórica pa los que los rasgos que definen les sociedaes humanes y la so evolución histórica tán determinaos o fuertemente condicionaos polos factores materiales (teunoloxía disponible, sistema de producción, carauterístiques xeográfiques y climátiques...). Nún intentu de separtar les idees del materialismu históricu del so orixe marxista acuñáronse nomes nuevos (materialismu cultural, funcionalismu ecolóxicu, determinismu xeográficu, determinismu económicu...) pa denomar métodos d'investigación que pueden considerase concepciones materialistes de la Historia. Asina, autores como Jared Diamond o Marvin Harris trataron en detalle la evolución histórica d'árees xeográfiques perestenses, y tentaron d'esplicar los rasgos definitorios de la sociedá a partir de factores materiales, que son pa ellos los que hai que tener en cuenta cuando intenta entendese la evolución de les sociedaes y les civilizaciones.

Pela so banda Maurice Godelier, ente más otros, intentó demostrar cómo'l marxismu yera'l mou más afayaízu pa enfrentase a la Historia d'una manera científica, y pa ello intentó satisfacer toles desixencies epistemolóxiques y tolos requisitos formales pa demostrar l'estatutu científicu de la Historia como disciplina científica.

Ver tamién

Materialismu dialéuticu

Referencies

↑ "Qu'anantes y demientres los cuarenta años de la mi collaboración con Marx tuve della parte independiente na fundamentación y, especialmente, na ellaboración de la teoría, ye cosa que nun ye de negar. Pero la parte más principal de les principales idees directrices, particularlmente no que cinca al terrenu económicu ya históricu, y especialmente na so formulación definitiva, correspuénden-y a Marx." - Friedrich Engels, Feuerbach y el fin de la filosofía clásica alemana (1880)
↑ "...el material intelectual acumuláu por Hegel ye namái una de les corrientes que Marx y Engels ficieron desaguar nel anchu ríu de la so nueva teoría materialista de la sociedá. Coyeron de los historiadores burgueses del periodu de la restauración el conceptu de clase social y el de llucha de clases; de Ricardo la fundamentación económica de les contraposiciones de clase; de Proudhon la proclamación del proletariáu modernu como única clase verdaderamente revolucionaria; de los acusadores feudales y cristianos opuestos al nuevu orden económicu nacíu de la revolución del sieglu XVIII el desenmascaramientu de los ideales lliberal-burgueses (...); del socialismu pequeño-burgués de Sismondi l'aguda descomposición de les contradicciones irresolubles del mou de producción modernu; de los iniciales compañeros de viaxe de la izquierda hegeliana, y n'especial de Feuerbach, el humanismu y la filosofía de l'aición; de los partíos políticos obreros contemporáneos -los reformistes franceses y los cartistes ingleses- la importancia de la llucha política pa la clase obrera; de la Convención francesa, de Blanqui y de los blanquistas la doctrina de la dictadura revolucionaria; de Saint Simon, Fourier y Owen tou el conteníu de les sos metes socialistes y comunistes: la subversión total de los fundamentos de la esistente sociedad capitalista, la eliminación de les clases y de les contraposiciones de clase y la tresformación del Estáu nún simple alministrador de la producción." - Karl Korsch, Karl Marx (1938)
↑ "El mi métodu dialécticu nun ye que seya distinto no esencial al de Hegel, sinón que ye, en too y por too, la so antítesis. Pa Hegel, el procesu de pensamientu, al que inclusive convierte, embaxu'l nome d'Idea, nún suxetu con vida propia, ye'l demiurgu de lo real; y lo real ye namái la forma esterna na que toma cuerpu la Idea. Por embargu, pa mí lo ideal nun ye más que lo material tresferíu y traducíu nel cerebru de los homes (...). Sicasí, el fechu de que la dialéutica seya mistificada por Hegel nun quita pa qu'elli fora'l primeru n'esponer, de forma consciente y nún sentíu ampliu, les sos formes xenerales de movimientu. Lo que pasa ye que nes sos obres la dialéutica apaez pates p'arriba, vuelta del revés. Basta con dá-y la vuelta, esto ye, ponela de pie, pa ver embaxu d'esa corteya mística la so simiente racional. La dialéutica mistificada consiguió ponese de moda n'Alemaña porque paecía tresfigurar lo esistente. Pero na so forma racional nun gusta un res a la burguesía (...), porque na comprensión y esplicación positiva de lo esistente inclúi la intelixencia de la so negación y muerte forzosa: y al ser esencialmente crítica y revolucionaria ye capaz de facer evidentes les formes actuales en plenu movimientu ensin ocultar el so carácter finitu." - Karl Marx, Prólogu a la segunda edición de El Capital
↑ "Nun ye míu'l méritu de tener descubierto la esistencia de les clases na sociedá moderna ni la llucha ente elles. Bien de tiempu anantes que yo dellos historiadores burgueses teníen espuesto yá el desarrollu históricu d'esta llucha de clases, y dalgunos economistes burgueses l'anatomía económica d'estes." - Karl Marx, Carta a Joseph Weydemeyer (5 de marzu de 1853). http://www.marxists.org/espanol/m-e/cartas/m5-iii-52.htm
↑ "Sólo teniendo vivío l'aición lliberadora d'esti llibru [La esencial del cristianismo de Feuerbarch], puede ún facese una idea d'ello. L'entusiasmu foi xeneral, y toos nos volviemos feuerbachianos. Con qué gayola acoyó Marx la nueva idea y cuántu foi influyíu por ella -magar qu'amosaba bien de reserves crítiques p'hacia ella- puede vese lleendo La Sagrada Familia." F. Engels, Ludwig Feuerbach y el fin de la filosofía clásica alemana (1886). http://www.marxists.org/espanol/m-e/1880s/feuer/index.htm
↑ Puede accedese al testu completu n'español na web marxists.org
↑ Puede accedese al testu completu del discursu (n'español) na web marxists.org [1]
↑ "Les nueses premises iniciales nun son arbitraries, nun son dogmes, sinón premises reales de les que namái puede ún abstraese col maxín. Son los individuos reales, la so aición y les sos condiciones materiales de vida, tanto les qu'había anantes d'ellos como les que consiguieron coles sos aiciones. Estes premises pueden, poro, comprobase por una vía puramente empírica." Karl Marx y Friedrich Engels, La ideoloxía alemana (1846). http://www.marxists.org/espanol/m-e/1840s/feuerbach/1.htm
↑ Karl Marx, Crítica al Programa de Gotha (1875)
↑ Friedrich Engels, Anti-Dühring (1878)
↑ Friedrich Engels, Del socialismu utópicu al socialismu científicu (1880)
↑ Karl Korsch, Marxismo y filosofía (1923)
↑ Karl Korsch, Karl Marx (1938)
↑ Puede consultase'l testu completu n'español na web marxists.org
↑ Puede consultase'l testu completu n'español na web marxists.org

[1] "Qu'anantes y demientres los cuarenta años de la mi collaboración con Marx tuve della parte independiente na fundamentación y, especialmente, na ellaboración de la teoría, ye cosa que nun ye de negar. Pero la parte más principal de les principales idees directrices, particularlmente no que cinca al terrenu económicu ya históricu, y especialmente na so formulación definitiva, correspuénden-y a Marx." - Friedrich Engels, Feuerbach y el fin de la filosofía clásica alemana (1880)

[2] "...el material intelectual acumuláu por Hegel ye namái una de les corrientes que Marx y Engels ficieron desaguar nel anchu ríu de la so nueva teoría materialista de la sociedá. Coyeron de los historiadores burgueses del periodu de la restauración el conceptu de clase social y el de llucha de clases; de Ricardo la fundamentación económica de les contraposiciones de clase; de Proudhon la proclamación del proletariáu modernu como única clase verdaderamente revolucionaria; de los acusadores feudales y cristianos opuestos al nuevu orden económicu nacíu de la revolución del sieglu XVIII el desenmascaramientu de los ideales lliberal-burgueses (...); del socialismu pequeño-burgués de Sismondi l'aguda descomposición de les contradicciones irresolubles del mou de producción modernu; de los iniciales compañeros de viaxe de la izquierda hegeliana, y n'especial de Feuerbach, el humanismu y la filosofía de l'aición; de los partíos políticos obreros contemporáneos -los reformistes franceses y los cartistes ingleses- la importancia de la llucha política pa la clase obrera; de la Convención francesa, de Blanqui y de los blanquistas la doctrina de la dictadura revolucionaria; de Saint Simon, Fourier y Owen tou el conteníu de les sos metes socialistes y comunistes: la subversión total de los fundamentos de la esistente sociedad capitalista, la eliminación de les clases y de les contraposiciones de clase y la tresformación del Estáu nún simple alministrador de la producción." - Karl Korsch, Karl Marx (1938)

[3] "El mi métodu dialécticu nun ye que seya distinto no esencial al de Hegel, sinón que ye, en too y por too, la so antítesis. Pa Hegel, el procesu de pensamientu, al que inclusive convierte, embaxu'l nome d'Idea, nún suxetu con vida propia, ye'l demiurgu de lo real; y lo real ye namái la forma esterna na que toma cuerpu la Idea. Por embargu, pa mí lo ideal nun ye más que lo material tresferíu y traducíu nel cerebru de los homes (...). Sicasí, el fechu de que la dialéutica seya mistificada por Hegel nun quita pa qu'elli fora'l primeru n'esponer, de forma consciente y nún sentíu ampliu, les sos formes xenerales de movimientu. Lo que pasa ye que nes sos obres la dialéutica apaez pates p'arriba, vuelta del revés. Basta con dá-y la vuelta, esto ye, ponela de pie, pa ver embaxu d'esa corteya mística la so simiente racional. La dialéutica mistificada consiguió ponese de moda n'Alemaña porque paecía tresfigurar lo esistente. Pero na so forma racional nun gusta un res a la burguesía (...), porque na comprensión y esplicación positiva de lo esistente inclúi la intelixencia de la so negación y muerte forzosa: y al ser esencialmente crítica y revolucionaria ye capaz de facer evidentes les formes actuales en plenu movimientu ensin ocultar el so carácter finitu." - Karl Marx, Prólogu a la segunda edición de El Capital

[4] "Nun ye míu'l méritu de tener descubierto la esistencia de les clases na sociedá moderna ni la llucha ente elles. Bien de tiempu anantes que yo dellos historiadores burgueses teníen espuesto yá el desarrollu históricu d'esta llucha de clases, y dalgunos economistes burgueses l'anatomía económica d'estes." - Karl Marx, Carta a Joseph Weydemeyer (5 de marzu de 1853). http://www.marxists.org/espanol/m-e/cartas/m5-iii-52.htm

[5] "Sólo teniendo vivío l'aición lliberadora d'esti llibru [La esencial del cristianismo de Feuerbarch], puede ún facese una idea d'ello. L'entusiasmu foi xeneral, y toos nos volviemos feuerbachianos. Con qué gayola acoyó Marx la nueva idea y cuántu foi influyíu por ella -magar qu'amosaba bien de reserves crítiques p'hacia ella- puede vese lleendo La Sagrada Familia." F. Engels, Ludwig Feuerbach y el fin de la filosofía clásica alemana (1886). http://www.marxists.org/espanol/m-e/1880s/feuer/index.htm

[6] Puede accedese al testu completu n'español na web marxists.org

[7] Puede accedese al testu completu del discursu (n'español) na web marxists.org [1]

[8] "Les nueses premises iniciales nun son arbitraries, nun son dogmes, sinón premises reales de les que namái puede ún abstraese col maxín. Son los individuos reales, la so aición y les sos condiciones materiales de vida, tanto les qu'había anantes d'ellos como les que consiguieron coles sos aiciones. Estes premises pueden, poro, comprobase por una vía puramente empírica." Karl Marx y Friedrich Engels, La ideoloxía alemana (1846). http://www.marxists.org/espanol/m-e/1840s/feuerbach/1.htm

[9] Karl Marx, Crítica al Programa de Gotha (1875)

[10] Friedrich Engels, Anti-Dühring (1878)

[11] Friedrich Engels, Del socialismu utópicu al socialismu científicu (1880)

[12] Karl Korsch, Marxismo y filosofía (1923)

[13] Karl Korsch, Karl Marx (1938)

[14] Puede consultase'l testu completu n'español na web marxists.org

[15] Puede consultase'l testu completu n'español na web marxists.org

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]