Mensa

Mensa ye una organización pa persones con cociente intelectual peraltu. L'únicu requisitu pa ser aceutáu como sociu ye sacar nun test d'intelixencia una nota que tea nel 2% cimeru la población.

Entamu

Roland Berrill, un abogáu australianu y Lancelot Ware, científicu y xurista inglés, fundaron Mensa na Inglaterra en 1946. La so idea yera crear una asociación de superdotaos, que tuviere un únicu requisitu d'almisión basáu nel cociente intelectual. L'oxetivu inicial, que entovía güei ta vixente, yera formar un grupu de xente ayenu a cualquier clas de diferiencies polítiques, relixoses, ideolóxiques o nacionales.

Mensa axunta a tou tipu de persones de cualquier orixe y preparación col oxetivu de puxar por un mayor arriquecimientu nel ámbitu social. Mensa aceuta como seña d'ingresu un certificáu expedíu por un sicólogu autorizáu de manera oficial pa exercer la so profesión y que tea capacitáu pa facer tests de cociente intelectual. Mensa Internacional tien unos 100.000 socios.

El nome vien de mensa, (mesa en llatín), n'alcordanza de la "mesa redonda" del Rei Arturo, como símbolu de que ye un club de socios iguales en derechos y obligaciones.

Oxetivos de Mensa

Mensa tien tres oxetivos declaraos: identificar y promover la intelixencia en beneficiu de la humanidá; promover la investigación sobre la naturaleza, calter y aplicaciones de la intelixencia y crear un ambiente social que fomente l'actividá intelectual de los sos socios.

Organización

Mensa Internacional ye un ensame de Mensas Nacionales. Los socios que viven nun país onde hai una Mensa formada son miembros d'esi grupu, mientres qu'en países con pocos socios, formen parte de Mensa Internacional. Los dos grupos punteros son American Mensa, con 50.000 socios, y British Mensa (Reinu Xuníu ya Irlanda), con unos 25.000. Mensa España funciona dende 1984 y tien 1.200 socios. Hai tamién grupos nacionales reconocios n'Arxentina y Colombia.

Mensa

Conteníu

Entamu

Oxetivos de Mensa

Organización

Miembros de Mensa destacaos

Referencies

Enllaces esternos