Wikipedia

Mikel Laboa

Mikel Laboa Mancisidor (15 de xunu de 1934, Donostia – 1 d'avientu de 2008, Donostia) foi ún de los más importantes cantautores del País Vascu.

Mikel Laboa
Vida
Nacimientu Donostia[1], 15 de xunu de 1934[2]
Nacionalidá Bandera de Francia Francia
Muerte Donostia, 1 d'avientu de 2008[3] (74 años)
Estudios
Llingües falaes vascu[2]
castellanu
Oficiu guitarrista, cantante, compositor, cantautor
Llugares de trabayu Donostia
Premios
Xéneru artísticu Folk rock
música tradicional
Instrumentu musical guitarra
voz
IMDb nm0479548
Cambiar los datos en Wikidata

Anguaño se-y considera'l patriarca de la música vasca pola influencia de la so obra nes xeneraciones de músicos más mozos.

Casi tolos sos cantares son n'euskera, magar que tien emplegáu tamién el francés, el portugués o el castellanu, ente otros idiomes, nes sos composiciones.

Biografía

editar

Mikel Laboa naciera'l 15 de xunu de 1934 en San Sebastián (Guipúzcoa), anque pasó bona parte de la so mocedá en Lequeitio (Vizcaya). Na década de 1950 estudió medicina y psiquiatría en Pamplona y acompangó siempre la so carrera artística cola de médicu, desendolcada fundamentalmente na unidá de Neuropsiquiatría infantil del Patronato San Miguel de San Sebastián, na que trabayó casi 20 años.

Durante la so etapa d'estudiante interesóse na música influyíu por artistas como Atahualpa Yupanqui y Violeta Parra. Laboa identificaríase a sí mesmu col rol d' «artista políticu». Debutó nel Teatru Gayarre de Pamplona en 1958.

Durante la década de 1960 fundó xunto con otros artistes vascos el grupu cultural Ez Dok Amairu (Nun existe'l trece), que buscaba l'espoxigue dende estremaos ámbitos de la cultura vasca, enforma murnia durante la dictadura franquista. Nesi sen, ficieron cincapié na recuperanza y dignificación de la llingua vasca. Dentro d'esi grupu y nel planu musical, Laboa apaeció xunto con Benito Lertxundi, como máximu esponente de la nomada «nueva canción vasca».

La so música se puede definir como un amestáu de trafición poesía y esperimentalismu, al estilu de los cantautores de les décades de 1960 y 1970, pero dotáu d'un fuerte estilu y una voz peculiar. La so obra amesta vieyos cantares populares con estilos más modernos, poesíes musicaes d'autores como Bertolt Brecht y composiciones de so. Mención aparte merecen los sos Lekeitioak, canciones esperimentales cantaes a berríes y soníos onomatopéyicos.

El so discu Bat-Hiru de 1974 foi escoyíu «Meyor Discu Vascu de la Historia» por una votación popular del periódicu El Diario Vasco. Delles de les sos canciones son ya clásicos populares nel País Vascu, especialmente Txoria txori («Páxaru (ye) páxaru»), que ye'l so cantar más conocíu, y que fuera interpretáu por Joan Baez na so versión orixinal en vascu. Otros cantares que rescamplen nel so repertoriu son Gure Hitzak (Nueses pallabres), Haika mutil y Baga, biga, higa.

El 11 de xunetu de 2006 ufrió la so actuación cabera, teloneando a Bob Dylan nun Conciertu pola Paz que se celebró na ciudá de San Sebastián.

Discografía

editar
  • Lau herri kanta, 1964 (EP)
  • Ursuako Kantak, 1966 (EP)
  • Bertolt Brecht, 1969 (EP con testus de Bertold Brecht)
  • Haika Mutil, 1969 (EP)
  • Euskal Kanta Berria, 1972 (LP colos sos EP's anteriormente espublizaos)
  • Bat-Hiru, 1974. (Doble LP).
  • Lau-bost, 1980 (Doble LP).
  • 6 (Sei), 1985.
  • Lekeitioak, 1988 (Recopilatoriu de sus lekeitioak)
  • 12 (Hamabi), 1989
  • 14 (Hamalau), 1994
  • Mikel Laboa Zuzenean, 1997 (Discu en direuto).
  • Zuzenean II - Gernika, 2000 (Discu en direuto).
  • 60ak+2, 2003 (Recopilatoriu de les sos obres de los años 60).
  • Xoriek - 17, 2005
  • Lekeitioak2007

Referencies

editar
  1. ↑ Afirmao en: Enciclopedia Auñamendi. Llingua de la obra o nome: castellanu. ISSN: 2444-5487.
  2. ↑ 2,0 2,1 Afirmao en: autoridaes BNF. Identificador BnF: 165261678. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
  3. ↑ URL de la referencia: http://www.guardian.co.uk/music/2008/dec/09/mikel-laboa-obituary.

Enllaces esternos

editar
Sacáu de «https://ast.wikipedia.org/w/index.php?title=Mikel_Laboa&oldid=4301899»