Pablo Maojo

Pablo Maojo Acebedo (6 de febreru de 1961, San Pedru Ambás) ye un escultor asturianu.

Pablo Maojo
Vida
Nacimientu	San Pedru Ambás, 6 de febreru de 1961 (63 años)
Nacionalidá	España
Estudios
Llingües falaes	castellanu
Oficiu	escultor
Trabayos destacaos	Ernesto Winter Blanco (es)

Biografía

Ye Pablo Maojo un escultor de formación autodidacta, qu'esperimentó a lo llargo de la so trayeutoria como artista los campos de la pintura, el dibuxu y el grabáu. Realizó la so primera esposición individual en La Espuma de Villaviciosa en 1982, muestra a la que siguirán varies na galería Cornión, de Xixón, en 1988, 1992 y 2000; na galería Vértice, d'Uviéu, en 1994; nel Muséu Antón, de Candás, en 1990 y 1993; y nel Muséu Juan Barjola, de Xixón, en 1993. Participó cola galería Cornión nes muestres d'ARCO, dende 1993. Recibió mención especial del xuráu na Bienal La Carbonera de 1983, primer premiu nel concursu de pintura de Tazones (1987), accésit nel certame de pintura de Ḷḷuarca (1990) y beca Antón d'ayuda a la creación plástica en 1990 y de la Casa Velázquez, de Madrid, 1992. Participó na Bienal d'Arte Ciudá d'Uviéu de 1992.

Tien obra pública na sablera de Rodiles, en 1985, l'Homenaje a los primeros caminantes de la Sierra en Navarrulaque, provincia de Madrid, y El oriciu pa los aviadores en Villaviciosa, en 1988, arriendes del Homenaje a Ernesto Winter Blanco n'Uviéu, 1989; Escalada, pa los xardinos del palaciu de los deportes de Xixón, en 1992, y obres pal Parque escultóricu del Muséu Antón de Candás (1990) y pa los xardinos de la Fundación Muséu Evaristo Valle, 1991. Igualmente tien un mural de so na estación Gregorio Marañón, del metro de Madrid, y una obra nel parque d'Uxo (Mieres).

La so obra ta representada en bien de coleiciones privaes, instituciones y museos: Muséu de Belles Artes d'Asturies, Muséu Antón de Candás, Fundación La Caixa (Barcelona), Cajastur, Fundación Evaristo Valle, E.P. Alto Lindoso (Portugal), … Nesta obra pública vien emplegando otros materiales como'l fierro, el bronce o l'acero.

Trabayó sobre too la madera n'estáu puru, un material al que somete a cortes y relieves de xestu xeométricu, que recuerden a dellos de los trabayos d'otru escultor asturianu, Fernando Alba. Los sos troncos, a diferencia de los d'Alba, anímense col cromatismu de colores primarios, localizaos rítmicamente, buscando l'ampliación de les sensaciones delicaes que s'esperimenten ante la so obra. Na muestra de la galería Cornión de 2000 treslladó eses esperiencies básicas y intuitives al papel, como final del procesu industrial dende'l troncu hasta la manufactura papelera. En tou casu, siempre persiguió una identificación cola naturaleza y una simboloxía enraigonada nes tradiciones asturianes.

Enllaces esternos

• Datos: Q17564700