Chin Na

	Artes marciales de China
Llista de les artes marciales de China
Términos
	Kung fu (功夫); Wushu (武術); Qigong (氣功);
Llugares históricos
	Monesteriu Shaolin (少林寺); Montes Wudang (武當山); Monte Emei (峨嵋山); Montes Kunlun (崑崙山);
Personaxes históricos
	Cinco Ancestros (五祖); Yim Wing-chun / Yan Yongchun (嚴詠春); Hung Hei-gun / Hong Xiguan (洪熙官); Fong Sai-yuk (方世玉); Dong Haichuan (董海川); Yang Luchan (楊露禪); Wu Quanyou (吳全佑); Diez Tigres de Cantón (廣東十虎); Chen Fake (陈发科); Chan Heung / Chen Xiang (陳享); Wong Fei-hung / Huang Feihong (黃飛鴻); Sun Lu-t'ang (孫祿堂); Huo Yuanjia (霍元甲); Yip Man / Ye Wen (葉問); Bruce Lee / Li Xiaolong (李小龍);
Figures llexendaries
	Bodhidharma / Putidamo / Damo (菩提達摩); Zhang Sanfeng (張三丰); Ocho Inmortales (八仙);
Rellacionáu
	Cine d'aición de Hong Kong; Wushu (deporte); Wuxia (武俠);

Chin Na o Qinna (擒拿, pinyin: qín ná; Wade-Giles: ch'in² na²) ye un términu chinu referíu a téuniques usaes nes artes marciales de China basaes nel control o torga de les articulaciones o músculos/tendones d'un oponente pa que nun pueda movese, neutralizando asina la so habilidá de llucha. Tamién chin na su, (術, shù significa "téunica”) tórnase lliteralmente a téunica de garrar y torgar. Delles escueles usen cenciellamente la pallabra na pa describir les téuniques. El Chin Na carauterízase por téuniques d'agarre tanto de pie como en suelu.

Unos instructores de les artes marciales de China céntrense más qu'otros nes sos téuniques chin na. Esta ye una de les principales razones poles que’l chin na d'una escuela pue estremase del d'otra. Hai más de 700 téuniques tradicionales solamente de Chin Na nel estilu de la Grulla Blanca, y quiciabes más n’otros estilos. Munches téuniques Chin Na aseméyense a les que s’atopen n’otres artes basaes n’agarres como’l Jiu Jitsu Brasilanu. Dependiendo de la escuela y del instructor, el Chin Na estructúrase de distintes formes. Dellos sistemes Chin Na aseméyense al Jiu Jitsu brasilanu per aciu del so enfoque na llucha de suelu. Otros pue que seyan más asemeyaos al Yudu per aciu del so enfoque nel Rou Dao (les téuniques "suaves" del Chin Na) de pie. Otra escuela igual se paez más al Hapkido per aciu del so enfoque en llaves de moñeca y d'articulaciones pequeñes. Anguaño nun hai una forma sistematizada universalmente aceptada de Chin Na, sinón que cada escuela estrémase por mor de la formación del instructor o pola so preferencia o enfoque personal.

Téuniques

Mentanto les téuniques de les llinies del chin na son prauticaes en dalgún grau pola mayoría de les artes marciales de tol mundu, munches artes marciales chines son famoses pola so especialización en tales aplicaciones. Estilos como la Garra d'Águila (Yingzhuaquan 鷹爪拳), qu'inclúi 108 téuniques chin na diferentes; la Mantis Relixosa (Tanglangquan 螳螂拳); les téuniques de "Garra de Tigre" del Hung Gar (洪家), y el shuai jiao, son exemplos de sonadía.

Pue facese una clasificación xeneral del Chin Na d'esta miente:

"Fen Jin" o "Zhua Jin" (fender el músculu/tendón, garrar el músculu/tendón). Fen significa "fender", zhua ye "garrar" y jin significa "tendón, músculu". Refiérense a téuniques qu'esgañen los músculos o tendones d'un adversariu.
"Cuo Gu" (tracamundiar el güesu). Cuo significa "equivocáu, desordenáu" y gu significa "güesu". Poro Cuo Gu refierse a téuniques que coloquen los güesos en posiciones equivocaes, y aplícase davezu a les articulaciones.
"Bi Qi" (sellar l'aliendu). Bi significa "zarrar o sellar" y qi, o más concretamente kong qi, significa "aire". "Bi Qi" ye la téunica de torgar l'aliendu del adversariu. Esto estrémase del simple estrangulamientu en que pue aplicase non solamente sobre’l gargüelu direutamente, sinón tamién sobre los músculos qu'arrodien los pulmones, supuestamente pa colapsar el sistema nuna contraición que desapareya l'aliendu.
"Dian Mai" o "Dian Xue" (zarrar la vena/arteria o cavidá d'acupresión). Asemeyaes al dim mak cantonés, éstes son téuniques de zarrar o golpiar vasos sanguíneos y puntos de chi.
"Rou Dao" o "Rou Shu Dao" (téuniques “suaves”) que xeneralmente se refieren a les téuniques que se xulguen segures pal “sparring” y/o propósitos d'entrenamientu.

Chin significa coyer o garrar, na significa inmovilizar o francer, y mentanto estes aiciones fáense de cutiu nesi orde (garrar y llueu inmovilizar), les dos pueden tamién intercambiase nel entrenamientu y na defensa personal. Ello ye, un agarre nun va siempre siguíu d'una inmovilización o rompimientu, y una inmovilización o rompimientu nun tienen por qué venir daos necesariamente por un agarre.

Hai della superposición ente la teoría y téunica del chin na y les rames de la medicina tradicional china conocíes como tui na (推拏), asina como un emplegu del qigong ofensivu y defensivu como complementu del entrenamientu del chin na en dellos estilos.

Referencies

Enllaces esternos

Authentic Shaolin Chin Na - Liu Jin Sheng. CHIN NA FA: Skill of Catch and Hold /Shanghai, 1936/(Tornáu del chinu al inglés)
Téunica Chin Na carauterística del estilu Chen de Tajiquan Archiváu 2007-04-09 en Wayback Machine
Shaolin Chin Na Demo (enllaz rotu disponible n'Internet Archive; ver l'historial y la última versión).