Quesu d'Urbiés

Quesu d'Urbiés
Otros nomes	Quesu picón, quesu de vexiga, quesu de fonte, quesu l'odre
Zona d'orixe	Asturies
Rexón	Centro-occidental
Ciudá	Urbiés
Pasteurizao	Non
Testura	pastosa/cremosa
Materia graso	Non aplicable
Conteníu proteínicu	Mínimu: 25%
Avieyamientu	6 meses

El quesu d'Urbiés ye un tipu de quesu que s'ellabora artesanalmente n'Asturies.

Zona de producción

El so nome provién de l'aldea d'Urbiés, na parroquia de Santa María, a unos 12 quilómetros de la capital del conceyu de Mieres. Tamién s'ellabora n'otres llocalidaes como Turón, Proaza, Quirós, Ḷḷena, Teberga y Somiedo.

Certámenes

N'Urbiés se celebra un festival gastronómicu dedicáu a esti quesu'l primer o segundu domingu de xunu.
En Proaza, tien llugar una feria a primeros d'añu.
En Bermiego (Quirós) esiste una feria del Quesu de Bota a mediaos d'agostu.

Ellaboración

Utilízase lleche entero de vaca, ensin añader cuayu nin formientu. Asina'l lleche coagula por acidificación, procesu que dura ente cuatro y cinco díes, nos que se va desnatando siempre que seya posible. Una vez coagulada, la masa s'introduz en pequeños sacos de tela.

El procesu de maduración dura ente seis y nueve meses, a lo llargo d'esti hai que remover la pasta con frecuencia pa que'l mofu que se forma na superficie s'esparda homoxéneamente. al final, una vez que madura, treslládase esa masa nun recipiente. En dellos casos échase-y dalgún tipu d'aguardiente pa que tenga una mayor untuosidá.

Carauterístiques

Trátase d'un quesu blandio, untuoso y ensin materia graso ya que se retira nel procesu de coagulación. Nun tiene forma definida porque adopta la del recipiente en que se faiga. Tampoco nun tien corteya, presenta una pasta blandio y cremoso, con un fuerte aruma. El so sabor tamién ye fuerte, siendo'l quesu más picante de tolos que se producen n'Asturies.

Debío a la so consistencia pastosa úfrese en tarreñes de barru.

Variedaes

Los estremaos nomes que puede tener esti quesu vienen del sacu en que s'introduciera la pasta. Por exemplu, el llamáu quesu de vexiga failo en vexigues d'animal. Arriendes d'eso, esta variedá tien la particularidá de qu'empleguen el llamáu culiestru, que ye'l lleche de vaca producío al segundu día del partu, utilizao na primer cuayada, amestando lleche normal nes cuayes posteriores. Esta variante prautícase entá nos conceyos de Ḷḷena y Quirós.

Otra variante que se prautica en Teberga y Proaza, consiste n'añader a la masa, nel últimu amasáu, dalgo de aguardiente de caña o a falta d'esti daqué de ron o de güisqui.

Una variante prauticada en Proaza, Teberga y Somiedo, consiste n'amestar al quesu ya formentao un poco de mantega fresco dirritío meciéndolo pa homoxeneizar bien la masa. Esti amiestu provoca l'amarelláu de la masa amás de quedar un sabor más sele. Nesti casu hay que tener especial procuru ya que la mantega pue ranciase rápidamente faciendo más fuerte'l sabor.

En cualesquiera d'estes dos últimes variantes, los amiestos deben realizase al final, poco enantes de ser consumío'l quesu, especialmente si se trata de mantega.

Ver tamién

Quesos d'Asturies