Ray Corrigan

Raymond Benard (14 de febreru de 1902, Milwaukee – 10 d'agostu de 1976, Brookings ^(es) ), más conocíu como Ray Corrigan, foi un actor y actor de cine d'Estaos Xuníos.

Ray Corrigan
Vida
Nacimientu	Milwaukee, 14 de febreru de 1902
Nacionalidá	Estaos Xuníos
Llingua materna	inglés
Muerte	Brookings (es) , 10 d'agostu de 1976 (74 años)
Sepultura	Cementerio Inglewood Park (es)
Causa de la muerte	infartu de miocardiu
Estudios
Llingües falaes	inglés
Oficiu	actor, actor de cine
Seudónimu	Ray Corrigan
IMDb	nm0181003

Biografía

Ye conocíu principalmente pol so trabayu nel cine western de serie B. Tamién foi especialista d'escenes d'aición, y actuó con frecuencia con un disfraz de gorila, propiedá so, tantu nel entamu como nel final de la so carrera artística.

En 1937 Corrigan adquirió tierra nos Montes Santa Susana y llevantó un ranchu cinematográficu llamáu "Corriganville Movie Ranch." La instalación foi utilizada pa rodaxe de seriales, llargumetraxes y programes televisivos, según pa la exhibición d'espectáculos western pa turistes. Bob Hope mercó la propiedá en 1966 llamándola 'Hopetown,' y na actualidá ye un Parque Rexonal y reserva natural.

Carrera cinematográfica

El verdaderu nome de Corrigan yera Raymond Benard, y nació en Milwaukee, Wisconsin.

La so carrera en Hollywood empecipióse como instructor de fitness y culturismu de les estrelles. Nos entamos de los años trenta trabayó como especialista y actuó en pequeños papeles. Munchos d'ellos yeren sol so disfraz de simiu - por casu, como un gorila en Tarzan and His Mate (1934) y un "Orangopoide" nel serial Flash Gordon. En 1936 llegó-y el so oportunidá interpretando papeles en dos seriales de Republic Pictures, The Vixilantes Are Coming y Undersea Kingdom, nesti postreru como protagonista.

A la vista de too ello, Republic robló un contratu con él, válidu dende'l 25 de mayu de 1936 al 24 de mayu de 1938. Foi escoyíu pa formar parte del tríu protagonista del serial The Three Mesquiteers, interviniendo en 24 d'ellos. En 1938 dexó Republic por discrepancies salariales.

Con Monogram Pictures empezó un nuevu serial, The Range Busters (una copia barata de Three Mesquiteers), con un personaxe col so propiu nome. Corrigan actuó en 20 de los 24 filmes de la serie, ente los años 1940 y 1943.

Tres estes actuaciones, el so trabayu en pantalla volvió depender en gran midida de les sos carauterizaciones simiesques - por casu, nes películes Nabonga (1944), White Pongo (1945) y Unknown Island (1948, carauterizáu como un galbaniegu prehistóricu). La "mázcara" orixinal de gorila vista en filmes como The Ape (1940) foi reemplazada por un diseñu más sutil con un quexal de mayor movilidá. En 1948 vendió los sos traxes de gorila y entrenó a Steve Calvert, un camareru del pub Ciro's. Calvert siguió los pasos de Corrigan, y empezó nun filme de Jungle Jim. Calvert y Corrigan nunca actuaron xuntos col disfraz de simiu, y toles actuaciones col "traxi Corrigan" posteriores a 1948 son de Calvert.

En 1950 Corrigan tuvo un programa televisivu tituláu Crash Corrigan's Ranch, y planió una serie televisiva col so vieyu sociu Max Terhune, de títulu Buckskin Rangers. L'últimu filme de Corrigan foi It! The Terror from Beyond Space, nel qu'interpretaba a la criatura del títulu.

Corriganville

En 1937 Corrigan taba nun viaxe de caza con Clark Gable cuando tuvo la idea d'adquirir tierra nel Valle Simi de California y preparar el so propiu ranchu western, similar al Iverson Movie Ranch. Dio forma al Corriganville Movie Ranch, una propiedá utilizada pa munches producciones western, tanto cinematográfiques como televisives, y na qu'había diversos tipos de terrén pa los rodaxes, tales como llagos, montes y cueves. Al contrariu de lo qu'asocedía nos decoraos simples, Corriganville tenía edificios reales nos que podía vivir el personal y almacenar l'equipu con cuenta d'aforrar tiempu y dineru, según evitar los desplazamientos diarios pal rodaxe d'esteriores. Dalgunes de les producciones rodaes en Corriganville fueron les siguientes:

• Drums of Fu Manchu (1939)
• Fort Apache (1948)
• El llaneru solitariu (1949-1957)
• The Cisco Kid (1950-1956)
• The Adventures of Kit Carson (1951-1955)
• The Adventures of Rin Tin Tin (1954-1959)
• Have Gun - Will Travel (1957-1963)
• Casey Jones (1957)

Col arriendu d'estes instalaciones y el montaxe d'espectáculos western pal públicu a partir de 1949, Corrigan consiguió bonos ingresos económicos. Corriganville foi finalmente vendida a Bob Hope en 1966, pasando a llamase Hopetown.

Moteyo

L'orixe del llamatu "Crash" nun ta claru. Puede debese a la constitución física de Corrigan o a la so poca habilidá como caballeru. Según el mesmu Corrigan nun episodiu de You Bet Your Life (11 de xunu de 1959), foi moteyáu "Crash" pola manera en que placaba a otros xugadores cuando practicaba fútbol americanu. Según la información dada nel California Corrigan Steak House and Bar propiedad del actor, l'orixe del llamatu "Crash" provenía del so trabayu como especialista y, en concretu, de los númberos nos que tenía de saltar al traviés d'una ventana rompiendo los cristales.

Fallecimientu

Ray Corrigan finó por causa de un infartu agudu de miocardiu en 1976 en Brookings, Oregón. Foi soterráu nel Campusantu Inglewood Park d'Inglewood, California.

Enllaces esternos

• Esta obra remanez de la traducción de Ray Corrigan de Wikipedia - inglés, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.
• Ray Corrigan na Internet Movie Database (n'inglés)
• Ray "Crash" Corrigan en B-Westerns
• Páxina sobre la hestoria de Corriganville Archiváu 2006-05-16 en Wayback Machine
• Páxina oficial sobre Corriganville Park Archiváu 2017-02-17 en Wayback Machine

• Datos: Q442728
• Multimedia: Ray Corrigan