Richard Deacon
Richard Deacon (14 de mayu de 1921, Filadelfia – 8 d'agostu de 1984, Los Angeles) foi un actor, chef, actor de televisión, actor de cine y actor de teatru d'Estaos Xuníos.
Richard Deacon | |
|---|---|
 | |
| Vida | |
| Nacimientu | Filadelfia, 14 de mayu de 1921[1] |
| Nacionalidá |
 Estaos Xuníos |
| Llingua materna | inglés |
| Muerte | Los Angeles, 8 d'agostu de 1984[1] (63 años) |
| Causa de la muerte | enfermedá |
| Estudios | |
| Estudios | Bennington College |
| Llingües falaes | inglés |
| Oficiu | actor, chef, actor de televisión, actor de cine, actor de teatru |
| IMDb | nm0212586 |
 | |
Carrera
editarNacíu en Filadelfia, Pennsylvania, foi un actor de calter conocíu pola so carauterística imaxe, calvu y con gafes, ya intérprete de personaxes sobeyosos ya imperiosos. Actuó en The Jack Benny Show nel papel de vendedor y barberu, y na serie de la NBC Happy como direutor d'un hotel. Tuvo un curtiu papel nel filme d'Alfred Hitchcock The Birds (Los páxaros) (1963), y unu de mayor importancia en Invasion of the Body Snatchers (1956).
Tamién encarnó al históricamente infame Presidente de Columbia Aircraft Corp., Charles A. Levine, quien, en febreru de 1927, negóse a vender a Charles Lindbergh pal so vuelu tresatlánticu, el monoplanu Bellanca acabante adquirir pola so compañía, sacantes que ésta pudiera escoyer a la so tripulación. Deacon inmortalizó la escena na adautación qu'en 1957 estrenaron Billy Wilder y James Stewart del rellatu Premiu Pulitzer del so famosu vuelu, The Spirit of St. Louis.[2]
Los papeles más conocíos de Deacon foron el de Mel Cooley en The Dick Van Dyke Show (1961–1966) y el de Fred Rutherford en Leave It to Beaver (1957–1963), anque Deacon tamién foi Mr. Baxter nel episodiu pilotu de "Beaver" "It's a Small World" (1957).[3] Amás foi'l mayordomu de Tallulah Bankhead nun clásicu episodiu de The Lucy-Desi Comedy Hour tituláu "The Celebrity Next Door". Otru de los sos personaxes foi Roger Buell na segunda temporada de la serie televisiva The Mothers-in-Law (1967–1969), trocando nel papel al actor Roger C. Carmel.
Nel filme Carousel (1956), adautación pa la gran pantalla del musical de Richard Rodgers y Oscar Hammerstein II, Deacon tenía'l papel del policía qu'alvierte a Shirley Jones (Julie) y a John Dehner (Mr. Bascombe) sobre Gordon MacRae (Billy Bigelow). Foi unu de los pocos títulos nos que nun llevaba gafes, al igual qu'asocedió en Abbott and Costello Meet the Mummy (1955) y en Désirée (1954), filme nel qu'encarnaba al hermanu mayor de Jean Simmons. Deacon interpretó al mayordomu de Morton Stearnes, George Archibald, en The Young Philadelphians (1959), filme protagonizáu por Paul Newman.
Deacon actuó en delles sitcoms: It's a Great Life; How to Marry a Millionaire; Get Smart; The Addams Family, na que usa con Cousin Itt una batería de tests psicolóxicos nel episodiu de 1965 "Cousin Itt and the Vocational Counselor";[4] y el capítulu de The Munsters "Pike's Pique". En 1966 tamién intervieno na serie de curtia trayeutoria de Phyllis Diller The Pruitts of Southampton.
En 1969 trabayó como actor teatral nel circuitu de Broadway interpretando a Horace Vandergelder nel musical Hello, Dolly!, nel que volvió actuar xunto a Diller, qu'encarnaba al personaxe del títulu.
Vida personal
editarNa vida real Deacon yera un cocineru y gastrónomu. Asina, nes décades de 1970 y 1980 escribió diversos llibros de cocina y presentó una serie televisiva canadiense dedicada a la cocina con fornu de microondes.[5]
Richard Deacon finó por causa d'una cardiopatía hipertensiva en 1984 en Los Angeles, California. Tenía 63 años d'edá. Los sos restos foron amburaos.
Referencies
editar- ↑ 1,0 1,1 Afirmao en: Internet Broadway Database. Identificador de persona d'Internet Broadway Database: 102593. Apaez como: Richard Deacon. Data de consulta: 9 ochobre 2017. Llingua de la obra o nome: inglés.
- ↑ The Spirit of St. Louis, 1993 Minnesota Historical Society Press, pp 71-76
- ↑ Leave It to Beaver (1957 TV series), episode: "It's a Small World" at IMDb
- ↑ The Addams Family TV series, episode: "Cousin Itt and the Vocational Counselor" at IMDb
- ↑ «Richard Deacon Dead at 62;A Comic Film and TV Actor». The New York Times (NYTimes.com). 11 d'agostu de 1984. http://www.nytimes.com/1984/08/11/obituaries/richard-deacon-dead-at-62-a-comic-film-and-tv-actor.html?scp=1&sq=richard+deacon+actor&st=nyt. Consultáu'l 22 de xunu de 2011.
Enllaces esternos
editar- Richard Deacon na Internet Movie Database (n'inglés)
- Richard Deacon na Internet Broadway Database (n'inglés)
- «Richard Deacon». en Find a Grave. (n'inglés)
Datos: Q1289785
Multimedia: Richard Deacon (actor)
