Joaquín Sorolla
Joaquín Sorolla y Bastida (27 de febreru de 1863, Valencia – 10 d'agostu de 1923, Madrid) foi un pintor y artista gráficu español.
Biografía
editarCuando apenes cuntaba con dos años d'edá, morrieron los sos pás por mor d'una epidemia de cólera. Al quedar güérfanos la so hermana Eugenia y él, foron agospiaos por Isabel, hermana de so ma. En pasando dellos alvirtieron les sos dotes pa pintar.
En 1874 entamó a estudiar na Escuela Normal Superior u aconseyaron-y que tamién se matriculase nes clases nocheriegues de dibuxu na Escuela d'Artesanos. Nesta escuela recibió, en 1879, una caxa de pintures y un diploma como premiu “pola so constante aplicación nel dibuxu de figura”. Nesi mesmu añu ingresó na Escuela Superior de Belles Artes de San Carlos a la par que trabayaba nel taller del so tíu.
Foi na Academia de San Carlos u conoció a otru alumnu, Juan Antonio García, hermanu de quien más tarde acabaría siendo la so esposa, Clotilde García. En 1880 consiguió una Medaya de Plata pola so obra Moro acechando la ocasión de la so venganza na esposición de la sociedá l'Iris.
Acabando la so formación, entamó a unviar les sos obres a concursos provinciales y esposiciones nacionales de belles artes, como la de Madrid en mayu de 1881, u presentó tres marines valencianes que, anque formidables, pasaron ensin pena nin gloria pues nun entraba no que yera la pintura oficial, de temática histórica y dramática.
Al añu siguiente, estudió la obra de Velázquez y otros autores nel Muséu del Prado. Por fin, en 1883, Algamó daqué de reconocimientu con una medaya na Esposición Rexonal de Valencia y, en 1884, algamó la gloria dafechu cola Medaya de Segunda Clase na Esposición Nacional gracies a la so obra Dos de Mayu, obra melodramática y escura fecha espresamente pa la esposición, tal y como-y dixo a un collaciu suyu: “Equí, pa dase a conocer y ganar medayes, hai que facer muertos.”
Tuvo otru gran ésitu en Valencia cola so obra El crit del palleter sobro la Guerra de la Independencia. Asina, foi pensionáu pola Diputación Provincial de Valencia pa viaxar a Roma onde, al empar que trabayaba, conoció l'arte clásicu y renacentista, asina como los grandes museos, contautando, con otros artistes.
Col so amigu'l pintor Pedro Gil coló a París el primer semestre de 1885, viviendo de cerca la pintura impresionista la cuál fizo, que variara la so temática y estilu, llegando a pintar el cuadru relixosu L'entierru de Cristu, col que fracasó dafechu.
En 1888 casóse con Clotilde García en Valencia, pero viviríen un añu más n'Italia, esta vegada na llocalidá d'Asís. En 1889 instaláronse en Madrid y, n'apenes cinco años, Sorolla algamó cierta fama y prestixu como pintor. En 1894 viaxó de nuevu a París, u desendolcó'l lluminismu, que sería carauterísticu de la so obra a partir d'agora. Entamó a pintar al aire llibre, dominando con maestría la lluz amestándola con escenes cotidianes y paisaxístiques de la vida mediterránea. N'obres como La vuelta de la pesca, La playa de Valencia o Triste herencia, describió'l sentimientu que-y producía la visión del mar Mediterraneu, comunicando l'esplendor d'una mañana na sablera con un coloríu vibrante y un estilu sueltu y vigurosu. Con Triste herencia recibió, en 1900, el Grand Prix nel certame internacional de París. Amás siguió cola so pintura de denuncia social que tantos ésitos-y había reportao nos caberos años con obres como I encara diuen que el peix és car (1895).
Naquel tiempu, Valencia nomólu fíu predileutu y meritoriu, y diéron-y el so nome a una cai. Tres abondos viaxes per Europa, principalmente Inglaterra y Francia, celebró una esposición en París con más de mediu millar d'obres, que-y dieron un reconocimientu internacional inusitao, conociéndose la so obra pictórica per toda Europa y América. Amosó la so obra en Nueva York en 1909 y acollechó un ésitu ensin precedente, con obres como Sol de tarde o Nadadores, ente munches otres. Tamién lo fizo, en 1911, nel City Art Museum de Saint Louis y nel Art Institute de Chicago. En payares d'esi mesmu añu, firmó un encargu pa la Hispanic Society of America pol que fadría catorce murales que decoraríen les sales de la institución. Con esta obra, fecha ente 1913 y 1919 y de tres metros y mediu d'altu por setenta metros de llargu, alzó un imborrable monumentu a España, pues nella representábense escenes carauterístiques de diverses provincies tanto españoles como portugueses. Necesitó de casi too 1912 pa viaxar per tol territoriu, realizando bocetos y trabayos de costumes y paisaxes. D'esta obra destaquen los óleos pintaos en 1916 dedicaos a nenos y muyeres nes sableres de Valencia, u predomina la llibertá de pincelada y la lluz de la so tierra. Dellos exemplos son Ma y fía o Pescadora valenciana. Tamién destacaba, fuera d'esta temática, el so inconmensurable llenzu Visión d'España.
Otra importante faceta suya foi la de retratista, de figures importantes como foron Juan Ramón Jiménez, el rei Alfonsu XIII, Vicente Blasco Ibáñez, Ortega y Gasset, etc. Tamién, en 1914, foi nomáu académicu y, cuando terminó los trabayos pa la Hispanic Society, trabayó como profesor de composición y color na Escuela de Belles Artes de Madrid. La so pintura representó l'aplicación direuta del lluminismu al paisax y la figura, acercando por tanto esta tendencia a la sociedá de la época.
En 1920, mientres pintaba'l retratu de la señora Pérez de Ayala nel xardín de la so casa en Madrid, padeció un ataque d'hemiplexía que mermó abondo les sos facultaes físiques y mentales. Morrió na so casa de Cercedilla el 10 d'agostu de 1923.
Obres destacaes
editar- Niños en la playa (1910).
- La comida en la barca (1898).
- Después del baño (1911).
Referencies
editar- ↑ Afirmao en: Gemeinsame Normdatei. Data de consulta: 14 avientu 2014. Llingua de la obra o nome: alemán. Autor: Biblioteca Nacional d'Alemaña.
- ↑ 2,0 2,1 Afirmao en: Gemeinsame Normdatei. Data de consulta: 27 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ URL de la referencia: https://datos.gob.es/es/catalogo/e00123904-autores-espanoles-en-dominio-publico-fallecidos-desde-1900.
- ↑ Afirmao en: Gran Enciclopedia Soviética (1969–1978). Sección, versículu o párrafu: Соролья Хоакин. Data de consulta: 28 setiembre 2015. Editorial: Большая Российская энциклопедия. Llingua de la obra o nome: rusu. Data d'espublización: 1969.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ Identificador del Boletín Oficial del Estado: BOE-A-1902-8284.
- ↑ URL de la referencia: https://www.nationalgallery.org.uk/exhibitions/past/sorolla/what-you-need-to-know-about-sorolla.
Enllaces esternos
editar
Wikimedia Commons acueye conteníu multimedia sobre Joaquín Sorolla.- «Joaquín Sorolla». en Find a Grave. (n'inglés)
Datos: Q351746- Multimedia: Joaquín Sorolla
Cites famoses: Joaquín Sorolla
