Superman

Superman (Superhome n'asturianu) ye un superhéroe creáu polos norteamericanos Joe Shuster y Jerry Siegel, apaeciendo per primer vegada en Action Comics #1, datáu en xunu de 1938. Siendo un sobreviviente d'un planeta destruyíu, unviáu a la Tierra de naciellu, tien capacidaes mui penriba de los humanos y úsales pa lluchar escontra'l crime y les amenaces a la humanidá.

Superman
Personaxe d'Action Comics (es)
Universu	Universu DC
Creador/a/es	Jerry Siegel y Joe Shuster
Información
Sexu	masculín
Ocupación	superhéroe y reporteru
Cónxuxe	Lois Lane (es)
Padres	Jor-El (es) y Jonathan Kent (es) Martha Kent (es) y Lara Lor-Van (es)
Fíos	Jonathan Samuel Kent (es) , Superboy (Kon-El) (es) , Chris Kent (es) y Jordan Kent (en)
Residencia	Smallville y Metrópolis (es)
Nacionalidá	Estaos Xuníos
[editar datos en Wikidata]

Pa ello viste una maya de color azul, coloráu y mariellu, basada na de otros personaxes de cómic como Flash Gordon o The Phantom al empar que na de los forzudos de circu, anque cola novedá de llevar una capa colorada. Estes traces foron imitaes pá la creación de munchos otros superhéroes.

Superman tien una identidá secreta, amarutándose d'home común, un periodista torpe y con gafes llamáu Clark Kent. El nome ye una mestura de los de Clark Gable y Kent Taylor, actores nos que los autores se basaron pal aspeutu, y la ciudá na que vive llamóse Metropolis (DC Cómics) pola película del mesmu nome.

Gerard Jones y Brad Metzer piensen que tuvo que ver na creación del personaxe que'l pá de Jerry Siegel morriera cuando-y atracaron la tienda tienda un añu enantes. «To pá muerre nun asaltu y tú inventes un home a prueba bales que se convierte nel mayor héroe del mundu. Perdona, pero hai una historia ehí», dixo Meltzer.

Nun entamu, Jerry Siegel y Joe Shuster producíen toles histories ya ilustraciones, pero la vista de Shuster empezó a deteriorase y, col aumentu de les apaiciones del personaxe debíes al ésitu que tenía, aumentó tamién la carga de trabayu, conque creó un estudiu que lu ayudara masque insistió en dibuxar el rostru de Superman en cada viñeta. La escritura los guiones tamién se compartió.

Problemes llegales

Hebo munchos enguedeyos sobro la propiedá del personaxe pos, nun entamu, Siegel y Shuster vendiéronlu por solo ciento trenta dólares a DC Comics, pero llueu engarriáronse munches vegaes, inclusive despidiéronlos. Esta griesca yera tanto polos drechos de Superman como polos de Superboy (les histories de Superman siendo un rapaz), discutiendo sobre si yera una creación independiente o los sos drechos taben yá incluyíos nel alcuerdu.

En 1975, Warner Communications decidió da-yos una pensión pa tola vida en saliendo d'un documental que los mostraba aprobetaos, pero esto nun terminó col problema. Estos duraron hasta 2007, siguiendo nos tribunales DC Comics y los herederos llegales de Siegel y Shuster hasta entós.

Anguaño toles apaiciones de Superman apunten qu'a esti lu crearon Siegel y Shuster.

Historia ficticia

A lo llargu de los años camudaron delles vegaes la continuidá del Universu DC, y con ella la historia del personaxe.

El Superman orixinal (Tierra-Dos)

Kal-L nació en Krypton en 1916, poco enantes de qu'esti planeta esplotara. So pá, científicu, descubre qu'esto va pasar y llánzalu al espaciu nun cohete pa salvalu. El cohete choca escontra la Tierra, nun pueblu llamáu Smallville, onde un motorista atopa'l nácaru y lu lleva pa una inclusa. Ehí yá muestra tener una fuercia increyible, y poco dempués afíalu un matrimoniu de granxeros. Éstos nómenlu Clark Kent.

Cuando ye rapaz conoz un doblu de so que vien d'otra tierra nel futuru (Superman de Tierra-Unu), que lu entrena y inspira. Tamién trabaya un tiempu nun circu como forzudu. So ma muerre y, cuando va morrer so pá, esti failu prometer que va usar los poderes pa facer el bien.

Na ciudá de Metropolis, en 1938, entama de facer xusticia col traxe azul y coloráu. Ente les sos primeres aiciones tán mostrar al gobernador qu'un condergáu a muerte yera inocente xusto primero de que lu axusticiaren (arreventando la puerta la casona pa entrar), atizar un maltratador o amenazar a un vendedor d'armes pa que nun use les sos influyencies polítiques pa llevar países a la guerra. Asina, al comienzu nun lu ven como un héroe, sinón como un vixilante fuera de la llei. Pero, col tiempu, enfréntase a villanos más evidentes y empiecen a velu como un héroe. Dalgunos villanos colos que más s'engarria son Ultra-Humanite y Lex Luthor.

Al empar, como Clark Kent, ye un periodista del Daily Star que fai reportaxes sobro les sos actividaes heroiques, y davezu fai equipu cola reportera Lois Lane. Esta anda por Superman, pero desprecia a Clark Kent por apocáu y cobarde.

Por orde del presidente Roosevelt axúntase con otros superhéroes, como Batman, Green Lantern o Flash pa una misión na Alemaña nazi, y poco dempués nómenlu miembru honorariu del equipu de superhéroes Justice Society of America. Sicasí, nun pue lluchar na Segunda Guerra Mundial porque Hitler llogra la llanza del destín, artefautu máxicu que-y impide asientrase nos países del Exe pola vulnerabilidá que tien a la maxa.

Nun combate escontra'l villanu Ian Karkull, una explosión de d'enerxía místico afeuta a Superman, Lois Lane y a otros munchos superhéroes, faciendo que dende entós avieyen más calcos. Col pasu'l tiempu los poderes de Superman van creciendo, hasta que, nos años cincuenta, el villanu Wizard-y fai reprimir la so identidá heroica per aciu d'un fechizu. Sigue lluchando escontra'l crime ensin traxe y adulces namora a Lois. Dempués de casase, ella descubre que Clark y Superman yeren la mesma persona, y fai que Wizard desfaga'l fechizu. Tres el retiro de George Taylor, editor del Daily Star, Clark adúnvialu nel llabor.

Nos años setenta llega a la Tierra la so prima, Power Girl, y Clark dexa-y l'actividá superheroica pa centrar en trabayu, anque dacuando vuelve a poner el traxe. Añalmente atópase col so doblu de Tierra-Unu na axuntanza interdimensional de la Justice Society cola Justice League, y descubre qu'esti ye más poderosu qu'él, amás de más mozu.

En 1985 reclútenlu pa lluchar escontra Antimonitor, entidá cósmica que destruye mundos a esgaya nel eventu conocíu como la crisis en tierres infinites. Como resultáu d'esta batalla desapaez el multiversu y naz un mundu nuevu, Tierra Nueva, siendo'l Superman de Tierra-Unu l'únicu qu'esiste nesta (con dellos cambeos na so biografía). Superman de Tierra-Dos queda nun güecu interdimensional cola muyer, Superboy de Tierra Prima y Alexei Luthor Jr. de Tierra-Tres, onde puen contemplar el mundu nuevu.

Más de venti años después, tres de la muerte de Lois y azuzáu por Superboy Prime y Alexei Luthor Jr., ayuda a estos a combatir escontra los héroes de Tierra Nueva y reconstruyir l'universu, pos ye demasiao escuru pa él. Pero a la fin fai lo correuto y muerre engarriándose con Superboy Prime.

Tolos socesos ocurríos dende 1985 cambien pola aición de Brainiac, que, viaxando pel tiempu, rescata la ciudad de Metropolis enantes de la Crisis y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula que naide ye a travesar, mentanto los poderes de los superhomes d'esta tienen los poderes desactivaos. Nestes, Clark Kent asoleya qu'él yera Superman, pa mostrar asina que nun abandonara a la xente sinón qu'afrenta los mesmos problemes que los demás. Tres del añu, la cúpula desapaez, los metahumanos recuperen los poderes, y el planeta, que ta vivu, manda a les ciudaes batallar unes con otres pola sobrevivencia. La so prima, Power-Girl, engárriase con una Wonder Woman comunista d'otru mundu, pero Superman sepárales y convénceles pa lluchar escontra l'enemigu verdaderu. Tres vencer al planeta, Brainiac devuelve les ciudaes a los sos universos, reconstruyíos.

El Superman clásicu (Tierra-Ún)

Kal-El nació en Krypton unos trés o cuatro años enantes de que'l planeta esplotara. So pá, científicu, descubre qu'esto va pasar y llánzalu al espaciu en direición a la Tierra, u la radiación del sol mariellu va da-y grandes poderes. El cohete choca nun pueblu llamáu Smallville, onde unos vieyos, Jonathan y Martha Kent, atopen el neñu. Estos afíenlu y edúquenlu pa qu'use los poderes p'ayudar a la xente. Yá de neñu, con ocho años, Clark Kent toma la identidá de Superboy al empar que lleva una vida normal colos sos amigos, Lana Lang y Peter Ross. Lana ye la primer moza de la que se namora y ella tenta de probar milenta vegaes que Clark y Superman son la mesma persona, pero ensin ésitu. Peter ye'l primeru en descubrir la so identidá, pero xura nun dicí-ylo a naide. Tamién tien un perru kryptonianu colos mesmos poderes, Krypto, que so pá unvió nun prototipu del cohete que lu salvó.

Con doce años yá lu reconocen como l'héroe de Smallville y quiérenlu toos, anque la so presencia suel trayer problemes. Desafortunadamente, un científicu acerca-y un cachu de kryptonita verde cuando les cámeres tan grabándolu y el mundu descubre qu'esta lu perxudica enforma.

Dacuando, Superboy axúntase a Aquaboy pa lluchar escontra'l crimen. Amás, Lana Lang tresfórmase na superheroína Insect Queen, y una andecha de superhéroes del sieglu XXX, la Llexón de Superhéroes, viaxa pel tiempu, contauta con Superboy y reclútalu, polo que vive con ellos aventures a esgaya en dambes dos dómines.

Cuando un meteoritu de kryptonita fiere gravemente a Superboy, un rapaz llamáu Lex Luthor ayúdalu y declara ser el so mayor siguidor. Superboy regala-y un llaboratoriu pa agradece-ylo, col que Lex tenta de crear un sueru pa que la kryptonita nun manque a Superboy, pero provoca un incendiu y cuando Superboy trata de salvar a Lex arrevienta una probeta, calviándolu dafechu. Lex piensa que lo fizo adré y por ello trata de quita-y el puestu d'héroe de Smallville per aciu de los sos inventos. Con estos produz más mal que bien, polo que va alloriando y termina diseñando máquines p'acabar col héroe.

En golpiándolu por accidente un rayu duplicador, créase un doblu de Superboy feu, con retrasu y pelleyu blanco. Muerre llueu, pero ye'l primer Bizarro al que s'enfrenta Superboy/Superman. Daquelles tamién apaez Mister Mxyzptlk, una mena de trasgu revolvín y perpoderosu d'otra dimensión, y Superboy descubre la Zona Pantasma, una dimensión inmaterial que sirvía de prisión pa los kryptonianos y, por ello, ta averbenada villanos naguando por fuxir.

Dempues d'ayudar a Superboy y la Lexón, Lana descubre por fin la identidá del so amigu, pero entós Superboy aborra-y la memoria con hipnosis. Una lexonaria, Duo Damsel, namoríscase d'él, pero Superboy acaba arrenunciando a ser miembru de la Lexón pa evitar qu'acusaren a estos de fuximientu d'impuestos, anque sigue como reserva del grupu. Ellos, estimosos, faen-y una estatua d'oru y pónenla en cuartel.

Siendo Clark tovía un rapaz, so pá y so ma muerren de fiebre tropical, polo que marcha de Smallville y finca en Metropolis, onde estudia periodismu y sigue cola vida de superhéroe. Na universidá conoz a Lori Lemaris, una moza en siella de ruedes cola que cortexa y que resulta ser una serena de l'Atlántida.

Superboy construye una base secreta, la Fortaleza de la Solitú, n'espaciu, pero tres l'ataque d'un ser estraterrestre decide llantala en polu norte. Adulces, va añadiendo estatues y recuerdos de les aventures que vive y los amigos que tien, siendo cuasi un muséu.

Tres llicenciase, Clark empieza un trabayu en Daily Planet como periodista d'investigación, con Lois Lane como colega. Esta, magar los calteres estremados, entama a sospechar que Clark Kent y Superman son la mesma persona, y tenta de probalo como años enantes Lana Lang. Lois y el nuevu meyor amigu de Clark, el fotógrafu Jimmy Olsen, viven dende entós aventures n'abondanza, tamién por sí solos, anque Superman ha salvalos davezu.

Al empar, Superman sigue engarriándose colos enemigos, sobremanera con Lex Luthor, amiga con Batman y otros superhéroes colos que s'alía nel supergrupu llamáu Justice League of America, y enfréntase con enemigos nuevos como Brainiac, un superrobó estraterrestre que coleiciona ciudaes tres apequeñales a unos centímetros. En venciéndolu, llogra salvar la ciudá kryptoniana apequeñada de Kandor (con tolos habitantes), y guárdala na Fortaleza. Llueu otra sobreviviente de Krypton, la prima de Superman, Supergirl, llega a la Tierra, y él ayúdala a afayase. Tiempu dempués Clark Kent dexa'l trabayu na prensa escrita pa trabayar pa la canal de televisión WGBS-TV, onde entama como reporteru de noticies y acaba presentando'l noticiariu.

Como miembru de la Justice League, Superman alcuéntrase periódicamente col so doblu de Tierra-Dos, y una de les vegaes oblíguenlos a engarriase hasta que frayen, pero nun queda claro quién ganaría. En Xunetu de 1985, na "Crisis en Tierres Infinites" la entidá nomada Anti-Monitor destruye tolos universos alternos, creando ununnuevu. Por embargu, Brainiac rescata la ciudá de Gotham de Tierra-Unu (con Superman y Supergirl dientro) y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, y los poderes de los superhomes desactivaos.

Filmes

La primera apaición de Superman nel cine (non dibuxos animaos) foron:

1948: Superman un 15-serie capítulu dirigíu por Spencer Gordon Bennet y Thomas Car, interpretáu por Kirk Alyn y Noel Neill.

1950: Atom Man vs. Superman una serie en 15 partes interpretáu por Kirk Alyn, Noel Neill y Lyle Talbot.

1951: Superman ya'l Home Topu, Una película protagonizada por George Reeves y Phyllis Coates.

Christopher Reeve deicidió el 10 d'ochobre de 2004, l'encarnación en la gran pantalla del personax de Superman de 1978 en:

Superman (1978).

Otres filmes:

Superman II L'aventura continúa (1980)

Superman III (1983)

Superman IV Cara a cara (1987).

Videu Xuegos

Xuegos de Superman

--1993: Superman: The Man of Steel (Master System), X-Box.

--1994: La muerte ya'l retornu de Superman (Megadrive y Super Nintendu).

--1999: Superman 64 (Nintendu 64).

--2002: Superman: Shadow of Apokolips (Playstation 2), GameCube.

--2006: Superman Returns, Play adautáu de la película (X-Box 360, Playstation 2, GameCube, X-box, Playstation Portable y Nintendu DS).

--2006: Superman Returns: Fortaleza de la Soledá (Game Boy Advance)

Xuegos con Superman y otros personaxes

Con Justice League of America

--1995: Justice League Task Force (Megadrive y Super Nintendo)

--2002: Justice League: Injustice For All (Game Boy Advance)

--2003: Cróniques Lliga de la Xusticia (Game Boy Advance)

--2006: Héroes de la Lliga de la Xusticia (Playstation 2, X-box, Nintendo DS, Playstation Portable y Game Boy Advance)

Con otros

--2008: Mortal Kombat vs DC Universe xunto con munchos de los personaxes

Xuegos con Superman non como personax xugable

--2006: Héroes de los xueces metálicos: Flash

--2009: DC Universe Online

Enllaces esternos

• Wikimedia Commons acueye conteníu multimedia sobre Superman .

• Datos: Q79015
• Multimedia: Superman and his cast