Taxus

Taxus;
Clasificación científica
Reinu:	Plantae
División:	Coniferophyta
Clas:	Pinopsida
Orde:	Pinales
Familia:	Taxaceae
Xéneru:	Taxus
Especies
	Ver testu
Consultes
Royal Botanic Gardens, Kew	Royal Botanic Gardens, Kew
World Flora Online	World Flora online
	[editar datos en Wikidata]

Los texos (Taxus) son un xéneru d'árboles coníferos de la familia Taxaceae, propios de zones montañoses, con ambientes frescos y llentos, y que prefieren los terrenos caliares.

Descripción

Los texos puen algamar un altor d'hasta 20 m. Anque la so apariencia amuesa desendolcos desiguales, la so groma ye piramidal con muncha xamasca en sentíu horizontal. El tueru ye gruesu y con corteya delgada de forgaxes pequeñes de color paro-colorao, algamando diámetros de 1,5 m. Son perllonxevos, pudiendo superar los 1.000 años. Tien fueyes perennes de 10 a 30 mm dispuestes en dos fileres opuestes, de color verde escuru pela facha y marelludo pel envés. Ye una especie dioica, con pie masculín y femenín. Frutia en forma d'arilu carnosu qu'arrodia la semiente, de color intensu coloráu y tastu agradable. Madura pela seronda. Raramente forma viesques, siendo común atopar exemplares aisllaos. Cuasi toles partes de la planta son riques n’alcaloides tóxicos: taxina, taxol y baccatina, pudiendo llevar a la muerte en pocos minutos. L’arilu o baga ye la única parte llibre de taxina, pudiendo ser inxeríu cola precaución de retirar la semiente. La so madera ye perdura, de granu fino y apertáu, lo que la fai mui apta pa ebanistería y talla, anque la so escasez de pieces de suficiente grosos, por mor del so espollete lentu y corta abusiva, llenda’l so usu. Demientres la Edá Media foi perutilizáu nes Islles Britániques pa la ellaboración del arcu llargu, pola so resistencia y flexibilidá, fechu que produxo cuasi la so estinción nesi ámbitu xeográficu.

Usos y tradiciones

Silius Itálicus, Lucius Anneus Florus y San Isidoru de Sevilla señalen l'usu d'esta grana na Península Ibérica por parte de los antiguos pueblos del norte, cántabros, astures y otros pobladores de Gallaecia como venenu pa suicidase cuando s’atopaben sitiaos o prindaos pol enemigu. Estos pueblos celtes veneraben al texu, dao que formaba parte de dellos rituales al ser consideráu árbol sagráu, problemente por mor de la estraordinaria llonxevidá de la planta, que la fai paecer inmortal. Por esta mesma razón, n’España foi plantáu profusamente na Cordelera Cantábrica al abrigu d'ermites, ilesies y cementerios dende tiempos remotos, como símbolou de la trescendencia de la muerte, y ye habitual atopalu nes places de los pueblos embaxo’l que se realizaba’l conceyu abiertu. Too esto ye lo que-y permitió perpetuar esi aldu de misteriu y sacralidá qu'endolca tolo venceyao con esta especie. Pa la tradición y cultura cántabra, asturiana y parte de la provincia de Lleón, esti árbol constituyó un auténticu vínculu del so pueblu cola tierra, los antepasaos y la relixón antigua. Tanto en Cantabria como n’Asturies yera vezu’l llevar a los difuntos una caña de texu pel Día de Tolos Santos pa que los guiara na so torna al País de les Solombres. Demientres la nueche de San Xuan yera, asinamesmo, usual que los mozos depositaren estes mesmes cañes nes ventanes o puertes de la casa de les so pretendíes, mientres elles-yos aventaben bagues d'esti mesmu árbol.

Taxonomía y etimoloxía

El xéneru foi descritu por Carl Von Linné y asoleyáu en Species Plantarum 2:1040. 1753. Taxus ye’l nome xenéricu dau en llatín al texu.

Especies

Grupu: Baccata

Alliance: Baccata

- Taxus baccata, texu común.

- Taxus contorta West Himalayan yew

- Taxus fastigiata Irish yew

- Taxus recurvata English yew

Alliance: Cuspidata

- Taxus biternata Delicate branch yew

- Taxus caespitosa Caespitosa yew

- Taxus canadensis Canada yew

- Taxus cuspidata Rigid branch yew, Japanese yew

- Taxus umbraculifera Umbrelliform yew

Grupu: Sumatrana

- Taxus celebica Celebes yew

- Taxus kingstonii Kingston yew

- Taxus mairei Maire yew

- Taxus sumatrana Sumatera yew

Grupu: Wallichiana Group

Subgrupu: Chinensis

- Taxus calcicola Asian limestone yew

- Taxus chinensis China yew

- Taxus obscura Obscure yew

- Taxus ocreata Scaly yew

- Taxus phytonii Phyton yew

- Taxus rehderiana Rehder yew

- Taxus scutata Scutaceous yew

Subgrupu: Wallichiana

- Taxus brevifolia, texu del Pacíficu.

- Taxus florinii Florin yew

- Taxus globosa Mesoamerican yew (inclúi Taxus floridana)

- Taxus suffnessii Suffness yew

- Taxus wallichiana Wallich yew, East Himalayan yew

Especies estintes

Taxus engelhardtii – Oligocenu, Bohemia, similar a T.mairei
Taxus inopinata – Miocenu superior, similar a T. baccata
Taxus masonii – Eocenu, Formación Clarno; Oregon, USA
Taxus schornii – Mioceno, norte d'Idaho

Híbridos

Taxus x media = Taxus baccata x Taxus cuspidata
Taxus x hunnewelliana = Taxus cuspidata x Taxus canadensis