Los traps siberianos o escaleres siberianes (en rusu: Сибирские траппы, Sibirskie trappi) formen una gran rexón de roca volcánica, conocida como gran provincia ígnea, en Siberia, Rusia. L'eventu d'erupción masivu que dio llugar a los traps, unu de los mayores na historia xeolóxica de la Tierra, prollongóse demientres millones d'años y foi clave na estinción masiva del Permianu-Triásicu, fai 250-251 millones d'años.

Estensión de los traps siberianos (mapa n'alemán)

El términu «traps» provién de la pallabra sueca «escaleres» (trappa o trapp), en referencia a les llombes gradiaes que componen el paisaxe de la rexón, típicu de les formaciones de basaltu.

Estensión xeográfica editar

Los traps siberianos aniciaos nel eventu de formación basáltica cubren na actualidá aproximao dos millones de quilómetros cuadraos, equivalentes a la superficie d'Europa Occidental. Les estimaciones sobro la so estensión orixinal amuesen cifres cercanes a los siete millones de quilómetros cuadraos, con un volume de llava d'ente unu y cuatro millones de quilómetros cúbicos.

L'área allúgase ente los 50º y 75º de llatitú Norte, y 60º y 120º de llargor Este.

Formación editar

L'orixe de los traps siberianos foi atribuyíu a diversos motivos, talos como una pluma de mantu qu'impautó la base de la corteza terrestre y trespasó'l cratón siberianu, o a un procesu rellacionáu cola tectónica de plaques.[1]

Ente los posibles causantes del eventu tamién s'atopa l'impautu que formó'l cráter de la Tierra de Wilkes, na Antártida, que pudo soceder nel mesmu periodu. Esta teoría caltién que los traps siberianos fueron la resultancia d'una serie de retruques sísmicos nel interior de la Tierra que remataron nuna erupción xigantesca nun puntu próximu a les antípodes del llugar de choque del asteroide.[2] Los científicos siguen aldericando la factibilidá d'esta hipótesis.[3]

Créese que los traps siberianos entraron n'erupción al traviés de numberoses fontes demientres más d'un millón d'años, en rexones asitiaes al este y sur de Norilsk, Siberia. Ye posible que dalgunes de les erupciones individuales llegaren a emitir volumes de llava superiores a los 2000 km³.

La presencia d'una amplia toba volcánica y de depósitos piroclásticos suxer qu'una serie de grandes erupciones esplosives tuvieron llugar enantes de les erupciones de llava basáltica o demientres les mesmes. La presencia de roques volcániques silíciques como la riolita, indiquen tamién erupciones de calter esplosivu.

 
El pandu de Putorana, Patrimoniu de la Humanidá pola Unesco, pertenez a los traps siberianos

Impautu na vida prehistórica editar

Esti eventu volcánicu estiéndese a lo llargo de la llende ente'l Permianu y el Triásicu, hai unos 250 millones d'años, y ye citáu como una de les posibles causes que provocaron la estinción masiva de dichu periodu, conocida como la Gran Morrina (la mayor na historia de la Tierra).[4][5] Anguaño, desconozse si la responsabilidá de los traps siberianos nel eventu d'estinción foi direuta o si, otra manera, fueron causaos por un eventu mayor, como l'impautu d'un asteroide.

Apocayá surdió la hipótesis de qu'esta erupción masiva pudo traer una crecedera desafranada na población de Methanosarcina, un microorganismu anaerobiu productor de metanu (un gas d'efeutu ivernaderu ventitrés vegaes más potente que'l dióxidu de carbonu).[6] Los gases emitíos polos traps siberianos pudieron provocar de por sí un efeutu ivernaderu qu'aumentara la temperatura de los océanos hasta un puntu críticu nel que los depósitos d'hidratu de metanu del fondu marín reaccionaren, lliberando grandes cantidaes adicionales de metanu a la superficie y agravando el calentamientu global.

L'eventu d'estinción del Permianu-Triásicu afectó a tola vida na Tierra y envalórase que pudo finar col 90 % de les especies.[7] Los estudios realizaos al respeutu indiquen que'l planeta precisó más de 30 millones d'años para recuperase de les perturbaciones climátiques derivaes d'esta serie d'erupciones.[8] Los cálculos de la temperatura del mar realizaos con delta-U-18 (un indicador del ratio d'isótopos estables), revelen que les temperatures oceániques ecuatoriales llegaron a superar los 40 °C (105 ºF).

Les evidencies paleontolóxiques indiquen, amás, que la distribución global de los tetrápodos esmorecióse, con rares esceiciones na rexón de Pangea anguaño ocupada por Utah, ente les llatitúes 40ºS y 30ºN. La fienda coincide cola escasez de carbón del periodu entendíu ente'l final del Permianu y el Triásicu Mediu, de resultes de la perda de los banzaos d'alteria. La formación d'alteria, un productu resultante del podrén de vexetación na agua ácedo de marismes, banzaos y humedales en condiciones de baxa actividá microbiana; nun se restableció hasta l'Anisiense (fai 245-237 millones d'años) y solo n'altes llatitúes del sur. Sicasí, los montes de ximnospermes apaecieron con anterioridá, anque n'altes llatitúes del norte y del sur.

En Panxea Ecuatorial, la repoblación forestal de montes apoderaos por coníferes riquió'l pasu de millones d'años tres la estinción. Les primeres reserves de carbón posteriores al eventu d'estes llatitúes, daten del Carniense (trescurríos 15 millones d'años del final del Permianu). Estos signos indiquen que les temperatures ecuatoriales fueron bien cimeres a les toleraes pola mayoría de vertebraos marinos siquier mientres dos máximos térmicos, ente que les temperatures ecuatoriales terrestres yeren lo suficientemente alzaes como pa suprimir la bayura de plantes y animales mientres la mayor parte del Triásicu tempranu.[9]

Depósitos de níquel editar

El gran depósitu de níquel, cobre y paladiu de Norilsk-Talnakh reside ente los conductos de magma na parte principal de los traps siberianos.

Na cultura popular editar

Los traps siberianos, l'episodiu eruptivu que los formó y l'estinción en masa del Permianu-Triásicu, fueron cubiertos por dellos documentales, ente ellos Animal Armageddon y The Day The Earth Nearly Died. Tamién fueron mentaos na serie Cosmos: A Spacetime Odyssey, presentáu por Neil deGrasse Tyson, nel episodiu tituláu Evolución molécula a molécula.

Ver tamién editar

  • Traps del Decán

Referencies editar

  1. Foulger, G.R. (2010). Plates vs. Plumes: A Geological Controversy. Wiley-Blackwell. ISBN 978-1-4051-6148-0.
  2. von Frese, R. R. B.; Potts, L. V.; Wells, S. B.; Leftwich, T. E.; Kim, H. R.; Kim, J. W.; Golynsky, A. V.; Hernandez, O.; Gaya-Piqué, L. R.. «GRACE gravity evidence for an impact basin in Wilkes Land, Antarctica». Geochemistry Geophysics Geosystems 10:  páxs. Q02014. doi:10.1029/2008GC002149. Bibcode2009GGG....1002014V. http://www.agu.org/pubs/crossref/2009/2008GC002149.shtml. Consultáu'l 20 de xunu de 2012. 
  3. Czamanske, Gerald K.; Fedorenko, Valeri A. The Demise of the Siberian Plume, January 2004.
  4. "New Studies of Permian Extinction Shed Light On the Great Dying", New York Times, April 30, 2012. Retrieved on May 2, 2012.
  5. "Could Siberian volcanism have caused the Earth's largest extinction event?", Eurekalert!, 9 January 2012. Retrieved on 12 January 2012.
  6. "Methane-spewing Microbe Blamed in Earth's Worst Mass Extinction" Scientific American, April 2014, Retrieved on April 7,2014.
  7. Benton M J (2005). When Life Nearly Died: The Greatest Mass Extinction of All Time. Thames & Hudson. ISBN 978-0-500-28573-2.
  8. Sahney, S. and Benton, M.J.. «Recovery from the most profound mass extinction of all time». Proceedings of the Royal Society: Biological 275 (1636):  páxs. 759–65. doi:10.1098/rspb.2007.1370. PMID 18198148. PMC 2596898. http://journals.royalsociety.org/content/qq5un1810k7605h5/fulltext.pdf. 
  9. Sun, Yadong; Joachimski,Wignall,Yan,Chen,Jiang,Wang,LaJoachimski,Wignall,Yan,Chen,Jiang,Wang,La (27 d'ochobre de 2013). «Lethally Hot Temperatures During the Early Triassic Greenhouse». Science 338:  páxs. 366–70. doi:10.1126/science.1224126.