Xosé Lluis Rodríguez Alberdi
Xosé Lluis Rodríguez Alberdi (12 d'abril de 1955, Xixón) ye un escritor asturianu. Foi maestru del Colexu Públicu Bernardo Gurdiel-La Cruz, defensor y profesor de llingua asturiana tantu pa neños como p'adultos, primer secretariu y dempués presidente munchos años de l'Asociación Cultural Valentín Andrés, auténticu entamador de la vida cultural del conceyu de Grau onde entamó y collaboró n'infinidá d'iniciatives y actividaes, escritor con delles noveles xuveniles publicaes, collaborador de revistes lliteraries, pedagóxiques y llocales como les Fueyes de Foru de la Biblioteca o l'Ecu de Grau, traductor y collaborador altruista de distintos proyeutos públicos y de munchos autores llocales que facíen los sosgalanes col bable.
Xosé Lluis Rodríguez Alberdi | |
|---|---|
 | |
| Vida | |
| Nacimientu | Xixón, 12 d'abril de 1955 (69 años) |
| Nacionalidá |
 España |
| Estudios | |
| Estudios | Universidá d'Uviéu llicenciatura |
| Llingües falaes |
asturianu castellanu |
| Oficiu | escritor, profesor |
| camientos.blogspot.com | |
 | |
Biografía
editarXosé Lluis Rodríguez Alberdi nació en Xixón el 12 d'abril de 1955, llugar onde trabayaba daquella'l so pá. Enantes de cumplir tres años va vivir a Grau onde fai los estudios primarios y el bachiller elemental, como dicíen entós. Nun hai daquella bachiller superior en Grau, polo que tien que dise a Uviéu, cursándolu nel colexu Auseva. Dempués fai la carrera que siempres quixo: Maxisteriu.
Con ventitrés años aprueba les oposiciones y destínenlu a Grullos (Candamu); llueu a Naraval (Tinéu), onde vivió cinco años y empieza la so afición pola espresión escrita n'asturianu. Entra en contactu con otres persones esmolecíes polo mesmo y, de secute, atópase faciendo los cursos de l'Academia de la Llingua Asturiana y un ensame de cursinos de perfeccionamiento. Dende entós nun dexó d'aborronar cuartiyes y folios con relatos, poesíes y otros testos.
El so nuevu destín como maestru va ser La Mortera (Tinéu); ellí imparte Llingua Asturiana a los neños, atópase cola falta de material de llectura pa los rapazos de la zona occidental y entós decide a escribir dellos cuentos ensin otru oxetivu que'l que tuvieren daqué pa lleer. Al empar, estos años imparte tamién dalgún cursu d'asturianu pa maestros de la zona de Tinéu.
De La Mortera cola pa Grau, al colexu públicu Bernardo Gurdiel - La Cruz, onde da clase (ente otres asignatures) d'asturianu y exerz de xefe d'estudios per tres años y de secretariu llueu munchos años; al par imparte tamién cursos de llingua asturiana p'adultos.
Alberdi educó y marcó a xeneraciones de moscones dende'l so puestu de docente, tuvo presente en diversos movimientos asociativos, participó viviegamente en foros llocales d'opinión y trabayu nel Plan Estratéxicu de Grau, la radio municipal, revistes llocales, etc.
Obra
editarLlevó siempres con arguyu'l nome de Grau más allá de les sos fronteres como reconocíu escritor de lliteratura xuvenil n'asturianu, con dellos premios y llibros como[1]ː
- El Milanu, Principado de Asturias. Serviciu Central de Publicaciones / 978-84-86795-94-8.[2]
- Menuda nuetiquina, 1989, Academia de la Llingua Asturiana / 978-84-86936-15-0.
- El fervíu máxicu d'medrar, 2000, Editorial Trabe, 84-8053-078-2
- El xuegu de los bolos de Tinéu, Editorial Trabe.
- Lina, Uviéu, Trabe, 2003. con dibuxos de María Fernández. Ediciones Trabe / 978-84-8053-248-8.[3][4]
- Otros cuentos n'Asturianu- variante occidental de la Llingua Asturiana- Colección Dayures, nᵘ 3- Principáu d'Asturies
- En Payares de 2024 publica el so Poemariu, "Mecigayu, versos al debalu". ISBN: 978-84-09-65008-8. D.L: AS 02178-2024. [5][6]
Alberdi trabayó altruistamente pola cultura na Villa de Grau. El so interés pol conceyu fízose patente nel so Blog “Camientos: Moliciones lliteraries y d'opinión d'un asturianu de Grau (Asturies)” qu'anició en 2008, y onde publicó más de 700 artículos, ya inda sigue publicando, d'opinión, lliterarios, unos centraos en Grau, otros que falen d'Asturies polo xeneral, de l'actualidá, sobre lliteratura y sobre la Llingua.
Por toos estos méritos, a Xosé Lluis Rodríguez Alberdi concediéron-y, amás de tamién pola so talla humana, el Moscón d'Oru Llocal nel añu 2015.[7][8][9]
Referencies
editar- ↑ https://www.todostuslibros.com/autor/rodriguez-alberdi-xose-lluis Sobre dalgunos llibros publicaos por Xosé Lluis Rodríguez Alberdi
- ↑ http://www.araz.net/escritores/rodalber.htm Llibros en llingua Asturiana.
- ↑ http://www.grao.net/avisos/avisos1.htm Referencies a llibros publicaos.
- ↑ https://lletresasturianes.alladixital.org/pdf/1385032382Llibrer%C3%ADa%20Asturiana.pdf Academia de la Llingua.
- ↑ En Payares de 2024 publica el so Poemariu, Mecigayu, versos al debalu. ISBN: 978-84-09-65008-8. D.L: AS 02178-2024, Foru de Creación y Llectura de la Biblioteca de Grau.
- ↑ entrevista en LNE
- ↑ https://www.elcomercio.es/oviedo/201510/04/grado-entrega-moscones-20151004011459-v.html X.L.R. Alberdi, Premiau con el Moscón de Oro llocal. El Comercio.
- ↑ https://www.lne.es/multimedia/fotos/asturias/2015-10-03-8303-premio-moscon-oro-real-federacion-futbol-principado-asturias-xose-lluis-alberdi.html Alberdi Moscón de oro local LNE.
- ↑ http://lavozdeltrubia.es/2015/09/28/todo-preparado-para-la-entrega-de-los-moscones-de-oro-2015/ La Voz del Trubia
Enllaces esternos
editar
Datos: Q98609618
