Alcuentru Medieval de L'Entregu
L'Alcuentru Medieval de L'Entregu ye una actividá que se celebra dende l'añu 2006 entamada pola Sociedá Cultural y de Fiestes de L'Entregu, na capital del conceyu asturianu de Samartín del Rei Aurelio.
| Alcuentru Medieval de L'Entregu | |
|---|---|
 | |
| Información xeneral | |
| Tipu | mercáu medieval |
 | |
Orixe
editarEsta actividá naz cola idea de dar un xiru a les tradicionales Fiestes de La Laguna nes que ta enmarcáu, y sobre too, de recuperar la historia del conceyu a traviés de la figura del rei Aurelio.
Desendolcu
editarCada añu escuéyese un rei Aurelio, que va ser dalguien destacáu de la vida social, cultural o deportiva del conceyu. Esta persona va ser coronada rei nel Teatru Municipal de Samartín del Rei Aurelio nel trescursu d'una obra teatral que la Sociedá Cultural y de Fiestes de L'Entregu encarga cada añu a un escritor diferente.
Dempués de la coronación y la representación teatral organízase una cena medieval que ta presidida pol recién nomáu rei Aurelio, representantes del Ayuntamientu de Samartín del Rei Aurelio, autoridaes, y toles persones que-yos preste asistir y vayan vistíes con ropa medieval.
Durante los tres díes que dura esti Alcuentru instalase un mercáu medieval nel entornu del Parque de La Llaguna nel que tienen llugar actividaes de marcáu calter medieval como lluches d'espades, representaciones teatrales de cai, espectáculos de cetrería o tornéu de caballeros a caballu, ente otres munches.
Una de les actividaes que xenera más espectación ye'l desfile medieval, que se desendolca'l sábadu pela tarde y nel que participa'l rei yá coronáu pa recibir l'apoyu de los sos súbditos peles cais del pueblu. El rei va acompañáu de gaites, autoridaes, grupos d'animación y de toes aquelles persones que vayan vistíes con traxes medievales.
Estes actividaes celébrense siempre'l tercer fin de selmana de xunetu, vienres, sábadu y domingu, nel marcu de les Fiestes de La Llaguna, que son les fiestes patronales del pueblu con más d'un sieglu de tradición.
Tola cartelería y publicidá rellacionada col Alcuentru Medieval faise n'asturianu.
Historia
editarEl I Alcuentru Medieval tien llugar nel añu 2006 cola coronación de José María López Suárez y cola representación de la obra teatral "Ente querelles y doncelles", de Pablo Rodríguez Medina, que foi puesta n'escena pol Grupu Teatru Refaxu.
En 2007 celébrase la segunda edición cola coronación como rei de Chechu García. La obra representada ye "Texedora d'orbayu", de Pablo Rodríguez Medina y representada pol Grupu Teatru Refaxu.
El III Alcuentru Medieval tien como rei Aurelio a Mario Efrén García Villar, que ye coronáu nel trescursu de la obra "Les siete novies del rei", escrita por Xulio Arbesú y representada pol Grupu Teatru Refaxu.
En 2009 celébrase'l IV Alcuentru Medieval cola coronación d'Ana Rosa Suárez y la representación de la obra "Apocalipsis: el camín que mos marca" de Xosé Ramón Martín Ardines, puesta n'escena pol Grupu Teatru Refaxu.
El V Alcuentru Medieval corona a Graciano Torre y pon n'escena la obra de teatru "De bruxes, muyeres y reyes", escrita por Pedro Alberto Marcos y representada pol Grupu Teatru Refaxu.
La sesta edición de 2011 celébrase cola coronación del futbolista Secundino Suárez (Cundi) y la representación de la obra "Ensayu xeneral", escrita por Chechu García y Roberto Corte y puesta n'escena pol Grupu Teatru Refaxu.
El séptimu Alcuentru Medieval del añu 2012 corona al escritor Pablo Xuan Manzano nel trescursu de la obra "Bienveníu rei Aurelio", escrita por Elisabeth Felgueroso y puesta n'escena pol Grupu Teatru Refaxu.
Nel octavu Alcuentru Medieval de 2013 corónase al ilustrador Alfonso Zapico durante la representación de la obra musical "El rei y otres frebes" del músicu y escritor Nacho Fonseca, que foi puesta n'escena y cantada pol grupu de teatru y coru Padre Coll.
Referencies
editarEnllaces esternos
editar- Páxina web de la Sociedá Cultural y de Fiestes de L'Entregu Archiváu 2016-05-04 en Wayback Machine
- Facebook de la Sociedá Cultural y de Fiestes de L'Entregu
Datos: Q25579237
