Ausiàs March
Ausiàs March (1397, Beniarjó – 3 de marzu de 1459, Valencia) foi un poeta y caballeru valencianu medieval, orixinariu d'una familia de la pequeña nobleza con aficiones poétiques. Foi unu de los poetes más importantes del Sieglu d'Oru valencianu y de la lliteratura en valencianu.
Ausiàs March | |
|---|---|
 | |
| Vida | |
| Nacimientu | Beniarjó, 1397[1] |
| Nacionalidá | Corona d'Aragón |
| Llingua materna | catalán |
| Muerte | Valencia, 3 de marzu de 1459[2] (61/62 años) |
| Familia | |
| Padre | Pere March |
| Estudios | |
| Llingües falaes |
castellanu catalán[3] |
| Oficiu | poeta, escritor, caballeru |
| Xéneru artísticu | poesía |
| Graduación | caballeru |
 | |
Biografía
editarFoi fíu del tamién caballeru y poeta Pere March y de Leonor Ripoll. Según distintes versiones, el llugar de la so nacencia podría ser Valencia, anque tradicionalmente creyíase-y nacíu n'Alacant, mientres una tercer versión sostién que nació en Beniarjó (pueblu cercanu a Gandia). De mozu participó nes espediciones que'l rei Alfonsu V el Magnánimu realizó pel Mediterraneu.
Foi Señor de Beniarjó, Pardines y Vernissa, y falconeru mayor del rei de la Corona d'Aragón (Alfonsu V el Magnánimu). Foi armáu caballeru en 1419. Participó na espedición d'Alfonsu V a Córcega y Cerdeña, y n'otres espediciones escontra los pirates del Mediterraneu. En 1425 retírase a les sos posesiones valencianes, instalándose en Gandía en 1428. Rescampla nesti periodu la so rellación personal y lliteraria col príncipe Carlos de Viana, herederu al tronu de Navarra.
De magar los ventisiete años yá nun saldría de la so tierra, permaneciendo primeru en Gandía, onde se dedicó a l'alministración de les sos propiedaes, y dempués en Valencia. Empezó a escribir en 1430. Tres años más tarde, l'infante Xuan, Duque de Gandía, confirmó los sos privilexos como señor feudal.
En 1439, a los cuarenta años, casa con Isabel Martorell, hermana de Joanot Martorell, autor de Tirán el Blancu. Dos años más tarde Isabel morrió y Ausiàs March contraxo segundes nupcies, en 1443, con Joana Escorna, quien morrió pocu dempués. Les sos dos esposes, según dellos miembros de la so familia, tán soterraes nel Monesteriu de San Jerónimo de Cotalba.
Ausiàs March morrió'l 3 de marzu del añu 1459 en Valencia, dexando cinco fíos bastardos pero nengún llexítimu. Foi soterráu na catedral de Valencia, onde entá pue topase la so llosa sepulcral, cerca de la Porta de la Almoina.
Obra
editarAusiàs March abandona la tradición de la poesía trovadoresca y la so retórica rellumante pero artificiosa y distante, lo que-y dexa la espresión de la íntima meditación personal d'un home poeta qu'apaez desprovistu de toa ficción y dispuestu a falanos de too aquello que-y encegola: l'amor, les rellaciones del home con Dios, el dolor y la muerte, el pecáu y la virtú. Estos problemes son reales y personales, de la mesma que lo son les muyeres qu'apaecen na so obra, que yá nun son les distantes y platóniques Beatriz y Laura –pures idees con nome propiu–, nin les idealizaes midons –la mio dueña– de los poetes provenzales, sinón muyeres reales, colos sos vicios y virtúes, que son amaes o odiaes por razones concretes y non por un enfotu d'idealización.
La obra de March ta constituyida por cientu ventiocho poemes. En 1539 arrexuntáronse 46 de les sos composiciones en Valencia, traducíes al castellán por Baltasar de Romanín. Otra edición vallisoletana integrada por 124 poesíes foi supervisada por Juan de Resa, capellán de Felipe II, en 1555. La traducción de Jorge de Montemayor, que data de 1560, foi impresa en Valencia y darréu en Zaragoza (1562) y Madrid (1579). La so obra influyó de forma notable na poesía española del Renacimientu.
La mayoría d'estudiosos decántense por clasificar la so obra en ciclos temáticos. Ello ye que caún d'estos ciclos forma una unidá de sentíu, y repara una evolución formal y conceutual nos distintos ciclos, polo que se llegó a considerar la so obra completa como un inmensu poema.
Los cantares d'amor
editarNa so producción l'amor ye una tema tan importante que llega a xenerar otros con entidá propia, pero siempres como causa o efeutu d'esti. Na obra de March la muyer ye una persona real, humana ya individual y, arriendes d'ello, la rellación home-muyer va ser l'amiestu del amor sensual (sentíos) y l'amor inteleutual (contemplación y pensamientu).
L'autor namái va caltenese de la poesía trovadoresca'l fechu de dedicar los sos poemes a una muyer, a la que se refier per aciu una senhal pa esconder el so verdaderu nome. Podemos estremar estos cantares en cinco señales que representen cinco etapes de la vida del autor.
- Plena de Seny (Enllena de razón)
- Llir ente Cards (Lliriu ente cardos)
- Amor, amor
- Mon darrer bé (El mio postreru bien)
- Oh, foll amor (Oh, llocu amor)
Los cantares de muerte
editarLa tema de la muerte nun ye esclusiva d'esti ciclu, formáu solo por seis poemes dedicaos a plañir la muerte d'una sola muyer, ensin usar "senhal". La destinataria paez ser la so segunda esposa, Joana Escorna. El poeta cavilga sobre les temes más comunes que la muerte d'una muyer amada puede causar: el destín de l'alma, el dolor pola so ausencia y l'alcordanza del pasáu. El poeta siéntese, inclusive, culpable de la muerte de la so muyer.
La gran dolor que llengua no pot dir
- del qui.s veu mort e no sap on irà
- (no sab sson Déu si per a si el volrà
- o si.n infern lo volrà sebollir) [...]
- O cruel mal qui tols la joventut
- e fas podrir les carns dins en lo vas!
- l'esperit, ple de paor, volant va
- a l'incert loch, tement l'eternal dan;
El Cantar espiritual
editarEl Cant espiritual, dirixíu a Dios, ye una llarga oración (224 versos), escrita en segunda persona. Ta consideráu como unu de los poemes más importantes del Sieglu d'Oru valencianu. El poeta amuésase esmolecíu en consiguir el camín de Dios y tarrez condergase por cayer nel amor llocu, de lo cual pénase; inclusive-y pide a Dios que-y encurtie la vida pa nun incurrir en más pecaos.
Equí repara al poeta más esmolecíu por espresar el so pensamientu y les sos reflexones más qu'íntimes que por siguir los preceptos de la poética tradicional. Por eso utiliza versu llibre, gracies a lo cual la so espresión resulta más natural que'l restu de composiciones realizaes a base de versos duros y ásperos, qu'enzanquen la so llectura.
Si com los rius que a la mar tots acoren,
- Així les fins totes en tu se n'entren.
- Puix te conec, esforça'm que jo t'ame:
- Vença l'amor a la por que jo et porte.
Estilu
editarMarch allóñase de too preciosismu y adecua l'estilu a la tema que trata: cultu y concisu nos poemes filosóficos, pero ensin arrenunciar a los xiros populares y el tonu desenvueltu cuando la situación lo riquir. El versu predominante a lo llargo de tola so obra ye'l decasílabu en coples cruciaes o encadenaes. Utiliza un catalán bien depuráu, desprovistu per vegada primera de provenzalismos qu'hasta entós poblaben la tradición poética catalana.
Métrica
editarLa estructura de les sos obres sigue los cánones provenzales, como por casu versos decasílabos en dos hemistiquios cesuraos na cuarta sílaba, arrexuntaos n'estrofes d'ocho versos cola presencia d'una tornada final que contién la señal (seudónimu).
Importancia d'Ausiàs March
editarAusiàs March ye probablemente l'home de lletres más reconocíu de la lliteratura medieval valenciana.
Esti xuiciu sofítase no siguiente:
- Foi un poeta bien lleíu y exerció fonda influyencia en grandes poetes castellanos como Boscán, Garcilaso, Fernando de Herrera y Gutierre de Cetina). Amás, tola poesía en catalán del sieglu XVI ye un intentu d'imitación de la so obra.
- La cantidá de manuscritos que nos llegaron, según les numberoses traducciones que se fixeron de les sos obres.
- La so obra alloñóse de tolo anterior, y adquirió un tonu bien personal, sinceru y depuráu, qu'oldeaba cola artificiosa retórica del amor cortés.
Ver tamién
editar- Sieglu d'Oru Valencianu
- Vicent Mariner, traductor valencianu del sieglu XVII.
- Monesteriu de San Jerónimo de Cotalba
Bibliografía
editar- Rafael Matoses, Salvador Vendrell. Ausiàs March. El poeta i el seu temps. Bromera. ISBN 84-7660-343-6.
- Ausiàs March; A cura de Francesc J. Gómez i Josep Pujol. Per haver d'amor vida. Antologia comentada. ISBN 978-84-7226-739-8.
- Josep Piera. Jo sóc aquell que em dic Ausiàs March. ISBN 84-297-4952-7.
Referencies
editar- ↑ Afirmao en: Biblioteca del Congresu d'Estaos Xuníos. Identificador d'autoridá de la Biblioteca del Congresu d'EEXX: n79084170.
- ↑ Afirmao en: autoridaes BNF. Identificador BnF: 12101376x. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ Identificador CONOR.SI: 12183907. Afirmao en: CONOR.SI.
Enllaces esternos
editar
Wikimedia Commons acueye conteníu multimedia sobre Ausiàs March.- Ausiàs March (obra completa) na Biblioteca Virtual Cervantes Virtual (castellán)
- Ausiàs March, material pedagògic i obra completa Archiváu 2007-02-05 en Wayback Machine (en catalán)
- Videu Ausiàs March Archiváu 2019-10-17 en Wayback Machine (en catalán)
- Ausiàs March (en catalán)
- Documental sobre l'autor (en catalán)
- Pàgina de lletrA sobre l'autor (en catalán)
- Torna al asturianu de la obra completa por Pablo Suárez (enllaz rotu disponible n'Internet Archive; ver l'historial y la última versión). (n'asturianu)
Datos: Q465675- Multimedia: Ausiàs March
