Fiesta de les Cebolles Rellenes
La Fiesta de les Cebolles Rellenes ye una fiesta gastronómica que se celebra a finales del mes de payares en L'Entregu (Samartín del Rei Aurelio, Asturies) y tien como protagonista a esti platu típicu de la gastronomía d'Asturies.[1][2] [3] [4]
| Fiesta de les Cebolles Rellenes | |
|---|---|
 | |
| Información xeneral | |
| Tipu |
fiesta gastronómica de Galicia (es)  |
| Epónimu |
Cebollas rellenas (es) |
 | |
La fiesta
editarLa fiesta de les Cebolles Rellenes entama a celebrase nel añu 1972, anque la so historia entama muncho enantes, concretamente en 1927. Nesi añu, Aniceta Fueyo, conocida como La Nina, dueña y cocinera del Restaurante La Laguna, alcuéntrase col problema de que ta en Vienres Santu, vienres de vixilia, y nun tien más qu'unes cebolles y unes llates de bonitu pa da-yos a los sos clientes, lo que fai que se-y ocurra la idea de rellenar les cebolles.
La Nina foi la qu'inventó'l platu, pero dizse que foi Aurora, del Restaurante La Conda, quien fizo que'l platu algamare la fama que tuvo dempués, yá que foi ella la que más lu preparó nel so llocal. Mario Antuña, el nietu de la Nina, escribió un emotivu pregón nel añu 2004 pa la fiesta de les Cebolles Rellenes, onde contó como nel añu 1972 un grupu d'entreguinos, con José Manuel Blanco a la cabeza, propunxeron crear la Fiesta Gastronómica de Les Cebolles Rellenes, idea que la creadora del platu acoyó con entusiasmu.
Esi añu convidóse a un grupu de periodistes a comer y presentóse-yos la fiesta y el platu. La propia Nina corrió colos gastos, y gracies a esta iniciativa y l'entusiasmu de los sos promotores, les cebolles rellenes algamaron col tiempu'l rangu de Fiesta d'Interés Turístico Rexonal.[5]
Asina, cada 30 de payares, toles cais del pueblu s'enllenen del golor d'esti platu tan sabrosu, y L'Entregu conviértese en puntu d'alcuentru de familiares y amigos. Les cebolles formen parte d'un menú qu'inclúi tamién callos y postres como casadielles, arroz con lleche o frixuelos.[5]
-
Frixuelos o fayuelos -
Casadielles -
Arroz con lleche -
Cazuela de callos
Nos últimos años la organización de les fiestes cuerre a cargu de la Sociedá Cultural y de Fiestes de L'Entregu. Amás, nos últimos años les xornaes gastronómiques acompáñense d'eventos festivos ente los que destaquen verbenes, una carrera popular, la fiesta de la cerveza y de representaciones de teatru.[6] Nes últimes ediciones llegaron a sirvise más de 10.000 quilos de cebolles.[2]
El platu
editarEllaboración
editarLes cebolles pélense y agüéquense. Nun sartén ponse aceite a calentar, añádese-y l'ayu, la cebolla que se saca de dientro y el pimientu, too ello picao mui fino. Cuando yá ta pasao añádese-y tomate, sal y guindilla. Cuando tea la salsa apártase la metá. Cola otra metá y el bonitu esmenuzao faise'l rellenu: rellénense, pónense nuna pota, añádese-y la salsa restante, el lloréu, el vinu blanco, el pimentón, el caldu, sal y picante al gustu. Tienen de quedar cubiertes.
Cuécense suave durante tres hores como poco. Sírvense tres cebolles por ración adornándolo col güevu, el pimientu y el perexil, too pica o. [7]
Ingredientes
editarCebolles, aceite y sal
Rellenu
editarBonitu o Picadiellu, pimientu morrón, tomate, lloréu, pimentón dulce, guindilla, caldu de pita concentrao, ayu y vinu blanco.
Adornu
editarPerexil, güevu cocío y pimientu, too picao.
Referencies
editar- ↑ RTPA (ed.): «L'Entregu celebra la fiesta de Les Cebolles Rellenes» (castellanu) (29 de payares de 2013). Consultáu'l 6 de febreru de 2018.
- ↑ 2,0 2,1 Carmen Basteiro (1 d'avientu de 2013). La Nueva España (ed.): «El Entrego saca juego a les cebolles rellenes» (castellanu). Consultáu'l 6 de febreru de 2018.
- ↑ La Cuenca del Nalón (ed.): «Fiestas Gastronómicas de SMRA: Les Cebolles Rellenes» (castellanu). Archiváu dende l'orixinal, el 2018-02-05. Consultáu'l 6 de febreru de 2018.
- ↑ El Comercio (ed.): «Les cebolles rellenes inundan El Entrego» (castellanu) (30 de payares de 2013). Consultáu'l 6 de febreru de 2018.
- ↑ 5,0 5,1 Turismo Asturias (ed.): «Les cebolles rellenes en El Entrego» (castellanu). Consultáu'l 6 de febreru de 2018.
- ↑ Julio Vivas (27 de payares de 2017). La Nueva España (ed.): «El Entrego acoge la fiesta de les cebolles rellenes el próximo fin de selmana» (castellanu). Consultáu'l 6 de febreru de 2018.
- ↑ [1] Condimentación de les cebollas rellenes.
Enllaces esternos
editar- Páxina web de la Sociedá Cultural y de Fiestes de L'Entregu Archiváu 2016-05-04 en Wayback Machine
- Facebook de la Sociedá Cultural y de Fiestes de L'Entregu
Datos: Q23658020
